Isaías 14
14
Israelpa mirayninkuna allpankuman kutimunankumanta
1Tayta Diosmi Jacobpa mirayninkunamanta llakipayarikunqa, Israel runakunata yapamanta akllaykuspanmi allpankupi kawsachinqa. Huklaw nacionmanta kaqkunam Jacobpa castankunaman hukllawakunqa. 2Achka nacionkunam Israelpa mirayninkunata chaskispanku nacionninkuman riysinqaku. Israelpa mirayninkunañataqmi chay runakunata warmitapas qaritapas criadonkupaqña hapikuykunqaku, chaynaqa kanqaku Tayta Diospa qosqan allpapim. Presochaqninkutam presochanqaku, ñakarichiqninkunapim munaychakunqaku.
Babilonia reyta asipayasqankumanta
3Ñakariynikichikmantapas, waqasqaykichikmantapas, esclavo kasqaykichikmantapas Tayta Dios librasuptikichikmi, 4Babiloniapi reypa contranpi kaynata takispa asipayankichik:
¡Imaynamá ñakarichikuq reyqa kaynaqa tukurun!
¡Imaynamá hatun tukuspa ruwasqanpas kaynaqa tukurun!
5Mana allin runapa atiynintam
kaspita hina Tayta Dios pakiparun,
6payqa piñakuyninpim mana hampiy atina heridakunawan llaqtakunata ñakarichirqa,
sinchi piñakuywanmi nacionkunapi munaychakurqa,
mana llakipayarispam nacionkunata qatikacharqa.
7Kunanqa kay pachapas hawkañam kachkan,
kusikuymantam takichkan.
8Ciprés sachakunapas, Líbano orqopi cedro sachakunapas,
qampa wichisqaykimantam kusikuspa kaynata ninku:
“Qampa wañusqayki punchawmantam
manaña pipas hamuspa kuchuwankuñachu”, nispanku.
9Wañusqakunapa kasqan sitiopas qanmantaqa mancharikunmi,
wañusqakunapas rikcharispam chaskisunaykipaq lloqsimunku.
Wañusqakuna ukupi reykunapas hatarinkum,
nacionkunapi llapallan reykunapas tiyanankumantam chaskisunaykipaq hatarinku.
10Llapallankum rimarispa nisunki:
¿Qampas ñoqayku hina pisi kallpayuqchu rikurirunki?
¿Ñoqayku hinachu rikurirunki?
11Hatunchakuq kaynikitapas,
arpaykikunapa waqaynintapas
wañuymi puchukarachin,
puñunayki mastaykipas urullañam,
hawaykipi qataykikunapas urullañam.
12 #
Ap 8.10. Achikyaq chaska
¡Imaynamá cielomantaqa wichiykamunki!
Nacionkunata purmachiq kachkaspaykiqa,
¡imaynamá kay pachamanqa wischurachikamunki!
13Qanmi sonqoykipi nirqanki:
Ñoqam hanaq pachaman qespirusaq,
Tayta Diospa chaskakunapa altonpim tiyanayta churamusaq,
norte lawman rispaymi tiyamusaq,
dioskunapa huñunakunanku orqopim tiyamusaq.
14Alto-altopi kaq puyukunapa altonmanraqmi seqarusaq,
“ñoqaqa hatu-hatun Dios hinam kasaq”, nispa.
15 #
Mt 11.23; Lc 10.15. Aswanqa wañusqakunapa kasqanmanmi wischuykachikunki,
uku-ukukamaraqmi wikapaykachikunki.
16Qamta rikusuqnikikunam qawarayasuspayki
yuyaymanaspanku ninqaku:
¿Kaychum kay pachapi runakunata
llumpayta manchachiq qarisu?
¿hinaspa nacionkunatapas chaqwaq qarisu?
17¿Paychu kay pachata chunnichispan
llaqtakunatapas tuñichirqa?
¿Paychu presokunatapas wasinkuman kutinanta
mana munaq runa karqa? nispanku.
18Nacionkunapa reyninkunaqa
sepulturankupim sapakama honrasqa hawka chutarayachkanku.
19Qanmi ichaqa mana valeq kallma hina
sepulturaykimanta wischurachikamunki,
espadawan tuksipaspa wañuchisqankupa pachan hina,
sarutyasqa aya kaqlla.
Uku-uku uchkumanmi wischusqa karunki.
20Llaqtaykita pasaypaqta purmachisqaykiraykum,
runaykikunata wañuchisqaykiraykum,
mana reykunapa pampakunanpichu pampakunkipas.
Mana allin runakunapa mirayninqa
wiñaypaq qonqasqam kanqaku.
21Taytankupa huchanrayku wawa-churinkuta wañuchinapaqyá allichakuychik.
Yanqañataq kaynakunaqa allpata hapikurunmanku;
kaynakunaqa amaña maypipas llaqtayachunkuchu.
22Tukuy Atiyniyuq Tayta Diosmi nin:
Ñoqam paykunapa contranpi hatarisaq,
churinkunatawan willkankunatapas lliwtam tukurusaq,
Babilonia naciontam manaña pipapas kanankama chinkarachisaq,
23erizo animalkunapa yachananmanñam tikrarusaq,
asnarichkaq mitupa kanantañam ruwarusaq.
Pichanawan qopata pichachkaq hinam chinkachisaq,
Tukuy Atiyniyuq Tayta Diosmi chaynata nin.
Asiria nación purmachisqa kananmanta
24Tukuy Atiyniyuq Tayta Diosmi kaynata nin:
Cheqaptapunim tanteasqayman hina ruwasqa kanqa,
ñoqapa nisqayman hinam cumplisqa kanqa.
25 #
Is 10.5-34; Nah 1.1—3.19; Sof 2.13-15. Hina allpaypim Asiria runakunata puchukarachisaq,
orqoykunapim paykunata saruparusaq.
Yugonkupas manañam llaqtayta ñakarichinqañachu,
llasaq qepi churasqankupas manañam llaqtayta ñakarichinqañachu.
26Llapallan allpa pachapa contranpim
kaynata tantearuni.
Llapallan llaqtakunata puchukachinaypaqmi
makiyta haywarini.
27Tukuy Atiyniyuq Tayta Dios chaynata tantearuptinqa
¿Pitaq harkakunman?
makinta haywariptinqa,
¿pitaq asurachinman?
Filisteapa contranpi willakusqanmanta
28 # 2 R 16.20; 2 Cr 28.27. Rey Acazpa wañusqan watapim Isaías kaynata willakurqa:
29 #
Jer 47.1-7; Ez 25.15-17; Jl 3.4-8; Am 1.6-8; Sof 2.4-7; Zac 9.5-7. Filistea llaqtayuqkuna,
maqasuqnikichikpa tawnan pakirusqanraykuqa amayá kusikuychikchu.
Maqta urupa sapinmantaqa
aswan kachukuq maqta ururaqmi lloqsimunqa,
pawaq maqta ururaqmi lloqsimunqa.
30Qanmanta puchuqkunatam yarqaymanta wañuchisaq,
chaymanta puchuqkunatañataqmi ñutusaq.
Wakchakunatam ichaqa allin mikusqata uywasaq,
mana imayuqkunañataqmi hawkallaña samakunqaku.
31¡Filisteokuna,
qapariyllawanña waqaychik,
llakimanta qaparkachaychik,
nanaywan qewipakuychik!
Norte lawmantam qosni hinaraq tropakuna kallpamuchkanku,
soldadokunapas tropanmanta mana chullaykuspam hamuchkanku.
32Chay nacionkunamanta kachamusqankumanqa ¿imanisuntaq?
Nisunchikqa: Tayta Diosmi Jerusalén llaqtataqa hatarichirqa,
chaymanmi ñakarichisqa runankunapas amparakunqaku, nispam.
Chuya Qellqa Revisión @ Sociedad Bíblica Peruana, 2012