Eclesiastés 8
8
1¿Pitaq yachayniyuq runa hinaqa kanman? ¿Pitaq imakunatapas entiendeqqa kanman? Yachayqa runapa uyantam kanchaykun, qaqchu uya kaynintam tikraykun.
Reyta kasukunamanta
2Reyta kasukuy, chaynatam Diospa qayllanpi jurarqanki. 3Qayllanmantaqa amayá utqaymanqa lloqsiruychu. Mana allin ruwaykunamanqa amayá chapukuychu. Reyqa imatapas munasqantam ruwan. 4Reypa nisqanqa atiyniyuqmi, pitaq payta ninman: “¿Imatataq ruwachkanki, nispa?”
5Kamachikuyninkuna kasukuqtaqa
manam imapas pasanqachu;
yachayniyuq runaqa yachanmi
haykapim hinaspa imaynatam ruwaytapas.
6Tukuy ima munasqanchikpaqmi tiempo kan,
haykapim imaynatam ruwanapaqpas kanmi tiempo;
chaywanpas runapa hatun sasachakuyninqa,
7imakunam pasakunanmanta
hinaspa haykapim pasakunanta
mana yachayninmi.
¿Pitaq payman chaykunamanta willanman?
Kawsaymantawan wañuymanta
8Manam pipapas kawsakuyninqa rantisqachu
kawsakuyninta takyachinanpaqqa,
wañuytaqa manam pipas harkanmanchu.
Wañuymantaqa manam pipas lluptinmanchu,
qari tukuqtaqa, qari tukuq kayninpas manam libranqachu.
9Kay pachapi tukuy ima ruwasqankuta yachaypi rispaymi rikurqani huk runa runamasinta ñakarichinanpaq atiyniyuq kasqanta.
Kawsayqa sasa kasqanmanta
10Rikurqanim mana allin ruwaq runata wañuruptin
hatunchaspanku waqakuywan pampasqankuta.
Diosta kasukuq runatam ichaqa
yachasqan llaqtapipunipas chaylla qonqarunku.
Chayqa manam allinchu.
11Runata mana allin ruwasqanmanta mana chaylla castigaruptinkuqa, wakin runakunapas chayllam mana allin ruwayman qokurunqaku. 12Kanmi runakuna pachak kutikamaña mana allinta ruwachkaspapas unayta kawsaqkuna, yachanitaqmi Diosta manchakuqkunapas allin kawsakusqankuta.
13Mana allin runakunam ichaqa sasachakuyllapi kanqaku,
manam unaytachu kawsanqakupas;
Diosta mana kasukusqankuraykum
llantuy hinalla chinkarunqaku.
14Kay pachapiqa mana pasaq kaqkunallam pasakun;
kanmi allin ruwaq runakuna
ichaqa mana allin ruwaqkuna hinam ñakarinku.
Kantaqmi mana allin runakunapas
ichaqa allin ruwaqpas hinaraqmi hawka kawsakunku.
Nisqayman hinaqa yanqapaqmi chaykunaqa.
15Chayraykum ñoqaqa kusikuyman sayapakuni.
Runapa kay pachapi allin ruwayninqa
mikukuspa, tomakuspa kusikuymi.
Diospa kawsay qosqan punchawkunapi llamkasqanmantaqa chayllatam hurqonqa.
16Kay pachapi tukuy ima ruwasqankuta yachaypi rispaymi chaynataq yachayta haypaypi rispaymi, tutapas punchawpas mana puñuyta atirqanichu. 17Chaynapim Diospa tukuy ima ruwasqanta rikurqani, kay pachapi tukuy ima ruwasqantaqa manam runaqa haypayta atinmanchu. Maynataña llamkaspapas otaq maskaspanpas manam tarinqachu; yachayniyuq runapas “reqsinim” nichkaspanpas manam haypayta atinqachu.
Chuya Qellqa Revisión @ Sociedad Bíblica Peruana, 2012