Eclesiastés 7
7
Yachayniyuq runamantawan mana yachayniyuq runamanta
1Miski asnaq perfumemantaqa
ancha reqsisqa kaymi aswan allinqa.
Nacesqanchik punchawmantaqa
wañukusqanchik punchawmi aswan allinqa.
2Convido wasiman rinamantaqa
wañuchikuqpa wasinman riymi aswan allinqa,
runakunapa tukupayninqa wañuymi
chaytam kawsaqkunaqa yuyarinanku.
3Asikuymantaqa waqaymi aswan allinqa,
uyata llakichispapas ichaqa sonqotam kusichin.
4Yachayniyuq runaqa wañuypim yuyaymanan,
mana yachayniyuq runakunam ichaqa kusikuyllapi yuyaymanan.
5Mana yachayniyuqkunapa alabasqan kaymantaqa
yachayniyuqkunapa qaqchakuynin uyariymi aswan allinqa.
6Mana yachayniyuqpa asikuyninqa
ninapi toqyaq kichka hinam.
Chaypas waspiy hina chinkaruqllam.
7Yachayniyuq runa pitapas ñakarichispanqa
mana yachayniyuq hinam ruwachkan,
sayniyuta chaskiq runaqa
sonqontam mana allinman tikrachkan.
8Imapas qallariymantaqa
imapas tukupayninmi aswan allinqa;
hatun tukuq kaymantaqa
pacienciakuymi aswan allinqa.
9Amayá chayllaqa piñakuruychu,
chaylla piñakuruyqa mana yachayniyuqkunapa ruwayninmi.
10Amayá tapukuychu imanasqam ñawpaq tiempokuna allin kasqanmantaqa;
chayqa manam yachayniyuqpa tapukuyninchu.
11Yachayqa kay pachapi kawsaqkunapaqqa allinpunim,
sichum herenciatawan kuskata chaskisqaqa.
12Yachayqa qollqe hinam waqaychakun;
chaywanpas yachaymi aswan allinqa,
hatalliqninkunaman kawsayta qosqanrayku.
13Diospa ruwayninkunatayá qawariy.
¿Pitaq paypa qewisqanta derecharunman?
14Imapas allin lloqsisuptikiqa kusikuyá,
sasachakuykuna chayamusuptikiyá ichaqa yuyaymanay.
Kusikuytapas sasachakuytapas Diosmi unancharqa,
chaynapi llapa runakunaqa
qepa punchawkuna imakunam pasakunanta mana yachanankupaq.
15Yanqa kawsayniypim kaykunata rikurqani:
Allin ruwaq runaqa
allin ruwaq kachkaspapas chaylla wañusqanta,
mana allin ruwaqñataqmi
mana allin ruwaq kachkaspapas unay kawsasqanta.
16Amayá llumpay allin runaqa kaychu,
nitaq llumpay yachaysapapas kaychu.
Chayna kaspaqa kikillaykim sasachakuypi tarikurunki.
17Amayá llumpay mana allin ruwaqqa kaychu,
nitaq llumpay mana yachayniyuqpas kaychu,
¿Imanasqataq manaraq tiempoykipi wañuwaq?
18Allin kaqta hapiynikiqa allinmi
mana allin kaqta mana kachariynikipas allinmi.
Diosta manchakuq runam ichaqa
imapipas allin lloqsinqa.
19Llaqtapi kamachikuq chunka runakunamantapas mastaqa
yachayninmi kallpanchan yachayniyuq runataqa.
20Kay pachapiqa manam hukllapas kanchu
allinllata ruwaspa mana haykapipas huchallikuq runaqa.
21Amayá lliw rimasqankutaqa kasuychu,
chaynapim criadoykipa rimakususqaykitapas
mana uyarinkichu.
22Qampas allintam sonqoykipi yachakunki
runamasikimanta achka kutipi rimasqaykitaqa.
Yachayta maskanamanta
23Tukuy chaykunata yachaywan qatipaykuspam nirqani:
“Yachayniyuqcha kasaq” nispay;
yachaymi ichaqa ñoqamanta karupi karqa.
24Tukuy ima kaqpas mana entiendey atinam,
ñoqapas manam entiendeyta atinichu,
cheqaptapuniqa mana pipapas haypay atinanmi.
25Chaymi yachaymanta imaynam kasqanta yachaykuyta munaspay qatipayta qallaykurqani,
hinaspaymi hayparurqani
mana yachayniyuq kayqa mana allin kasqanta,
mana tanteoyuq kayqa locopa ruwaynin kasqanta.
26Kaytam tarirurqani:
Warmiqa wañuymantapas aswanraq ñakarichikuq kasqanta,
wichichikuq trampa hina kasqanta,
sonqonpas toqlla hina kasqanta,
makinkunapas cadena hina kasqanta.
Diosta kasukuqkunallam chay warmimantaqa lluptiyta atinqa,
huchasapa runam ichaqa chaylla wichiykunqa.
27Ñoqa predicadormi tukuy imapas imaynam kasqanta yachaypi rispay, kayta yacharurqani:
28¡Imam maskasqaytaqa manam tariniraqchu!
Waranqa runakunamantam
allin runataqa chullallata tariruni,
warmikunamantam ichaqa
hukllatapas mana tarinichu.
29Kayllatam tariruni:
Diosqa mana huchayuqtam runataqa unancharqa,
runam ichaqa tukuy rikchaq sasachakuykunata maskakun.
Chuya Qellqa Revisión @ Sociedad Bíblica Peruana, 2012