Eclesiastés 6
6
1Kanmi kay pachapi llapa runakunata ñakarichiq sasachakuy: 2Diosmi qon runaman qori-qollqeta, tukuy imata chaynataq reqsisqa kaytapas, imaña munasqanpas mana pisinankama; ichaqa chaykunawan kusikunanta Dios mana munaptinmi, mana reqsisqa runakuna chaykunamanta munaychakun. Chayqa yanqallam, manchakuypaq mana allinmi. 3Sichum huk runa pachak churiyuq kaspa unay watakunata kawsanman, ichaqa unay watakuna kawsachkaspapas allin kaqwan mana kusikuspa wañuruspa mana pampasqa kaptinqa, chay runamantaqa sullusqa wawaraqmi aswan allinqa. 4Chay sullusqa wawa kay achkiq pachata mana rikuspa mana reqsisqa kaptinpas, 5intita mana rikuspa mana imata yachachkaspapas, chay runamantaqa chay wawam hawkayayta tarirun. 6Sichum chay runa iskay waranqa watataña kawsaruspan allin kaqkunawan mana kusikuptinqa ¿manachum iskayninku huk sitiollaman rinqaku?
7Runaqa llamkan mikunallanpaqmi,
ichaqa maynataña mikuptinpas manam sonqon tiyanchu.
8¿Imapitaq yachaysapa runa mana yachayniyuq runata masyan?
¿Imataraqtaq wakcha runa hurqokun kay pachapi kawsasqanmanta sapaqta?
9Mana rikuy atina kaqmantaqa
rikuy atina kaqmi aswan allinqa.
Chaypas yanqallam, wayrata hapirunapaq qatikachay hinallam.
10Kunan kaqkunaqa ñawpaqmantaraqmi sutichasqaña karqa,
runapa imaynam kasqanpas ñam yachasqaña karqa.
Manam pipas peleanmanchu paymanta aswan atiyniyuqwanqa.
11Cheqaptapunipas achka rimayqa mana allin rimaykunatam mirachin,
chayqa manam imapipas runata yanapanchu.
12Chinkaruq waspiy hinallam runapa kawsayninqa, watankunaqa pasarunpas llantuy hinallam. Runapa kawsayninpaq imam allin kasqantaqa ¿pitaq yachan? Wañukusqanpa qepanta imakunam pasakusqantapas ¿pitaq payman willanman?
Chuya Qellqa Revisión @ Sociedad Bíblica Peruana, 2012