2 Samuel 16
16
Sibawan David parlasqanmanta
1 # 2 S 9.9-10. Chay orqopa puntanmanta tumpa waklawnintaña David richkaptinmi Mefi-bosetpa serviqnin Siba chaskiqnin lloqsimurqa. Sibaqa hamurqa iskay silla asnokuna pusarisqam hinaspa iskay pachak tantata, pachak sarta uvas pasasta, higos pasasmanta pachak tortillakunata chaynataq huk odre vinota cargakuykuspanmi. 2Chaymi Sibata David tapurqa:
¿Imapaqtaq kaykunata apamurqanki? nispa.
Sibañataqmi nirqa:
Asnokunaqa reypa ayllunkuna sillakunanpaqmi, tantawan pasaskunañataqmi soldadokuna mikunanpaq, vinoñataqmi chunniqpi pisipaqkuna tomanankupaq, nispa.
3Hinaptinmi rey tapurqa:
¿Maypitaq patronnikipa willkanqa kachkan? nispa.
Chaymi Siba nirqa:
Jerusalenpim qeparamun, payqa tanteachkan abuelonpa munaychakusqan Israel nacionta kutichipunankutam, nispa.
4Reyñataqmi nirqa:
Kunanqa Mefi-bosetpa tukuy ima kapuqninpas qampaqñayá kachun, nispa.
Chaymi Sibaqa reypa qayllanpi qonqoraykuspa nirqa:
Reynilláy, munasqayki ruwasqa kachun, nispa.
5Bahurim llaqtaman rey David chayaruptinmi, Saulpa ayllun Gerapa churin Simei lloqsiramuspa reyta ñakarqa. 6Hinapanmi Davidta chaynataq llapallan serviqninkunatapas rumiwan chamqarqa, reyñataqmi runankunapa chaynataq waqaychaqnin soldadokunapa chawpinta rirqa. 7Kaynata rimaspanmi Davidta Simei ñakarqa:
¡Runamasinta wañuchiq mana allin runa pasaway kaymanta! 8Tayta Diosmi pagapusuchkanki rantinpi munaychakunaykipaq Saulpa mirayninkunata wañuchisqaykimanta, chayraykum Tayta Dios munaychakuynikita churiki Absalonmanña qoykun. Runa wañuchiq kasqaykimantam kay sasachakuy haypamusunki, nispa.
9Chaymi Sarviapa wawan Abisaiqa reyta nirqa:
¿Pitaq kay wañusqa allqoqa karqa reyta ñakananpaqqa? Kunallanmi wakpa kunkanta kuchuramusaq, nispa.
10Ichaqa Davidmi nirqa:
Sarviapa wawankuna, ñakawasqanmanqa ama chapukuychikchu. Kikin Tayta Dioschá ñakawananpaq kamachimun. Tayta Dios kamachimuptinqa ¿pitaq upallay ninman? nispa.
11Chaymantam Abisaitawan llapallan serviqninkunata David nirqa:
Churiypuni wañuchiwananpaq maskawaptinqa razonchiki Benjamín casta runaqa. Tayta Dios chaynata kamachiptinqa hinayá ñakawachun. 12Ichapas ñakarisqayta qawariwaspa, ñakawasqanpa rantinpi Tayta Dios bendeciykuwanmanraq, nispa.
13Davidwan serviqninkuna ñanta riptinkum, Simeiñataq ñakastin rumikunawan chamqamustin chaynataq allpata machqemustin chimpan waqtanta rirqa. 14Reyñataqmi llapallan runankunapiwan pisipasqallaña Jordán mayuman chayaruspanku chaypi samarurqaku.
Jerusalenman Absalón yaykusqanmanta
15Absalonmi Israel runakunapiwan Jerusalén llaqtaman yaykururqa, Ahitofelpas paywanmi yaykurqa. 16Davidpa amistadnin Arqui casta Husai sutiyuq runapas Absalonpa kasqanman chayaruspanmi qaparirqa:
¡Kawsachun rey! ¡Kawsachun rey! nispa.
17Hinaptinmi Husaita Absalón nirqa:
¿Kaynatachu kuyakuyninmanta Davidman kutichinki? ¿Imanasqataq mana paywanchu rirqanki? nispa.
18Chaymi Absalonta Husai nirqa:
Ñoqaqa Tayta Diospa chaynataq Israel nacionpa akllasqan reywanmi qepasaq. 19Chaynaqa, ¿Pitataq servisaq? ¿Manachum churinta? Imaynam taytaykita servirqani chaynatam qamtapas servisqayki, nispa.
20Hinaptinmi Ahitofelta Absalón nirqa:
¿Imaninkichiktaq qamkuna? ¿Imaynatataq ruwachwanchik? nispa.
21Ahitofelñataqmi nirqa:
Palaciota waqaychananpaq saqesqan taytaykipa uywanakusqan warmikunawan puñuy, hinaptinmi Israel runakuna taytaykiwan cheqninakusqaykita yachanqaku, chaynapim qanwan kaq llapallan runakuna kallpanchakunqaku, nispa.
22 # 2 S 12.11-12. Chaymi Absalonpaq palaciopa qawanpi carpata ruwarapurqaku, chaypim lliw Israel runakunapa qawasqanta, taytanpa uywanakusqan warmikunawan Absalón puñurqa. 23Chay punchawkunapiqa Ahitofelpa consejonqa Diospa rimarisqan hinam karqa, Davidpaqpas chaynataq churin Absalonpaqpas.
Chuya Qellqa Revisión @ Sociedad Bíblica Peruana, 2012