2 Samuel 15
15
Davidpa contranpi Absalón hatarisqanmanta
1Tiempopa risqanman hinam Absalonqa guerrapaq carretakunata, caballokunata chaynataq pichqa chunka runakunatapas ñawpaqninta kallpanankupaq armakururqa. 2Absalonmi sapa tutapayta hatarispan llaqtaman yaykuna ñanpa patanpi sayaq, hinaspanmi pipas quejawan reyman hamuqta qayaspan tapuq:
¿Maylaw llaqtamantataq hamuchkanki? nispa.
Sichum chay tapusqan runa Israelpi hukkaqnin ayllumantam nispa niptinqa, 3Absalonmi niq:
Kay sasachakuynikiqa cheqapmi, razonninpim quejakunkipas, ichaqa manam pipas reypa rantinpi atiendesuqniki kanchu. 4Sichum kay nacionpi juez kanaypaq ñoqata churaykuwaptinkuqa llapallan quejayuqkunapaqcha allin arreglota ruwayman, nispa.
5Chaymi pipas Absalonpa ñawpaqninpi qonqorakunanpaq asuykuptinqa makinta haywarispan abrazaykuspan muchaykuq. 6Chaynatam ruwaq Israelpi runakuna allin arreglo ruwapunanpaq reyman hamuqkunawan. Chaynata ruwaspanmi Israel runakunapa sonqonta suwarqa.
7Tawa wataña pasaruptinmi reyta Absalón nirqa:
Ama hina kaspayá kachaykuway Hebrón llaqtaman rispay Tayta Diosman prometesqayta cumplimunaypaq. 8Aram law Gesur nacionpi kachkaspaymi kaynata prometekurqani: “Sichu Jerusalén llaqtaman Tayta Dios kutirachiwaptinqa ñoqam payta servisaq”, nispay.
9Chaymi rey nirqa:
Riruyá, nispa.
Hinaptinmi Absalonqa Hebrón llaqtaman pasaspan 10llapallan Israel ayllukunaman willakuqkunata kacharqa kaynata nimunankupaq:
Trompeta tocasqankuta uyarispaykichikmi ninkichik: ¡Absalonmi Hebrón llaqtapi munaychakuchkan! nispaykichik.
11Jerusalenmantam Absalón lloqsirqa qayachisqan iskay pachak runakunapiwan, paykunaqa mana imatapas yachastinmi rirqaku. 12Sacrificiota Diosman ofrecechkaspanmi Absalonqa qayachimurqa Davidpa consejaqnin Gilo llaqtapi yachaq Ahitofelta. Chaynapim reypa contranpi kaqkuna astawan miraspanku Absalonta qatirqaku.
Jerusalén llaqtamanta Davidpa ayqekusqanmanta
13Huk willakuqmi Davidpa kasqanman chayaruspan kaynata willaykurqa:
Llapallan Israel runakunam Absalonwanña kachkanku, nispa.
14Chaymi Jerusalenpi serviqninkunata David kamachirqa:
Kunanpuni ayqekusunchik, Absalonmantaqa manam lluptiyta atichwanchu, utqayman ayqekusunchik, yanqañataqmi hayparamuwaspanchik llaqtapi runakunatapas wañurachinman, nispa.
15Hinaptinmi reypa serviqninkuna nirqaku:
Ñoqaykuqa chayllam kachkaniku imam niwasqaykikuta ruwanaykupaq, nispanku.
16Chaymi rey Davidqa palacionpi kaqkunawan kuska lloqsispan, uywanakusqan chunka warminkunatañataq wasinta nanachikunankupaq saqerqa. 17Reymi llapallan runankunawan kuska lloqsirqa, hinaspam llaqtapa patanpi kaq wasipi samaykurqaku. 18Llapallan serviqninkunam paywan rirqaku, reyta waqaychaq Ceret chaynataq Pelet casta soldadokunapas Gat llaqtamanta chakiwan qatimuq soqta pachak soldadokunawan kuskam ñawpaqninta rirqaku. 19Chaypim Gat llaqtayuq Itaita rey David nirqa:
¿Imapaqtaq qamqa ñoqaykuwan riwaq? Kutispayki Absalonwan qepamuy. Qamqa llaqtaykimanta qarqomusqa huklaw llaqtayuqmi kanki. 20Qayna punchawllaraq chayamuq kachkaptikichu ¿ñoqaykuwan hakuchik nisqayki? Ñoqaqa manam mayman rinaytapas yachakunichu, wawqekikunawan kuska kutikuychik, Tayta Diosyá cheqaptapuni bendecisunki, nispa.
21Chaymi rey Davidta Itai nirqa:
Kawsaq Tayta Diosraykum hinaspa qam reyniyraykum jurani: “Wañunay otaq kawsanay kaptinpas maymi kasqaykipim ñoqapas kasaq”, nispa.
22Hinaptinmi Itaita David nirqa:
Chaynaqa, hakuchikyá, nispa.
Chaynapim Gat llaqtayuq Itaiqa llapallan tropantin hinaspa aylluntin rirqa. 23Llapallankum llumpayta waqastin rirqaku. Qepatañataqmi rey David chaynataq paywan riq runakuna Cedrón wayqopi yakuta chimpaspanku chunniq lawman llapallanku rirqaku. 24Sacerdote Sadocpas Diospa pacto ruwasqan Arcata apaq Leví ayllukunawan kuskam rirqaku, hinaspam sacerdote Abiatarpa qayllanpi Arcata churaykurqaku, llaqtamanta runakuna lloqsiyta tukunankukama. 25Ichaqa Sadoctam rey David nirqa:
Diospa Arcanta llaqtaman kutichiy. Tayta Dios kuyapayariwaspan kutichimuwaptinqa Arcatapas chaynataq yachanan carpatapas qawaykusaqraqchá. 26Sichum pay niwanqa: “Manañam munaykichu” hinaptinqa ñoqawanyá imam munasqanta ruwachun, nispa.
27Huktawanmi sacerdote Sadocta rey David nirqa:
Abiatarwan kuskayá llaqtaman hawkalla kutikuychik. Qamkunawan kuskataqyá kutichun churiki Ahimaaspas chaynataq Abiatarpa churin Jonatanpas. 28#Sal 63 tít.Ñoqañataqmi chunniqpi kachkasaq imam pasakusqanta willamuwanaykichikkama, nispa.
29Chaymi Sadocwan Abiatarqa Diospa Arcanta Jerusalenman kutichispanku chaypi qeparurqaku. 30Davidmi waqastin Olivos wichayta qespirqa, qala chakilla chaynataq uman wankisqa. Paywan riq runakunapas umanku wankisqam waqastin rirqaku. 31Davidmanmi willaykurqaku: “Ahitofelpas Absalonwan kuskam contraykipi hatarirun” nispanku. Hinaptinmi David nirqa:
Diosnilláy, Ahitofelpa tanteasqankunatayá pantarachiy, nispa.
32Davidmi chayarurqa Diosta yupaychana orqopa puntanman, chaymanmi lloqsimurqa reywan tupananpaq, Arqui castamanta kaq Husai, pachanpas llikipasqa chaynataq umanpas allpallaña. 33Chaymi David nirqa:
Ñoqawan rispaykiqa sasachakuytam qowankiman. 34Aswanqa Jerusalenman kutispa Absalonta nimuy: Reynilláy, imaynam taytayki servisqayta hinam qamtapas servisqayki, nispayki. Chaynata ruwaspaykim Ahitofelpa tanteasqankunata yanqachanki. 35Sacerdote Sadocwan Abiatarpas chaypim kachkanku, chaynaqa palaciopi imataña uyarispaykipas paykunamanmi willanki. 36Sadocpa churin Ahimaaswan Abiatarpa churin Jonatanpas chaypim kachkanku, imataña uyarisqaykitapas paykunawanmi willachimuwanki, nispa.
37Jerusalenman Absalón yaykuykuchkaptinmi Davidpa amistadnin Husaipas llaqtaman chayarurqa.
Chuya Qellqa Revisión @ Sociedad Bíblica Peruana, 2012