2 Samuel 14
14
Absalonta Joab kutichimusqanmanta
1Sarviapa wawan Joabmi yacharurqa Absalonmanta rey David llakikusqanta. 2Chaymi Tecoa llaqtamanta sakri warmita pusachimuspa Joab nirqa:
Ama hina kaspayá wañuchikuq warmi hina luto pachawan churakuspayki ama aceitewanpas tallikuspa, aswanqa wañukuqninmanta unayña llakikuq warmiman rikchakuy. 3Hinaspayá reypa qayllanman yaykuspayki imam yachachisqayta willamuy, nispa.
Hinaspanmi chay warmita imakunam rimanantapas yachachirqa. 4Reypa qayllanman yaykuruspanmi pampaman kumuykuspan chay warmi nirqa:
¡Reynilláy yanapaykullaway! nispa.
5Davidñataqmi nirqa:
¿Imanantaq? nispa.
Hinaptinmi chay warmi nirqa:
Cheqaptapunim ñoqaqa viuda kani, qosaymi wañukunña. 6Ñoqapam iskay qari wawaykuna kapuwarqa, paykunam campopi peleaptinku mana pipas amachaqninku kaptin wawqenta huknin wañurachirqa. 7Chaymi ñoqapa contraypi llapallan aylluykuna hatariramuspa niwachkanku: Wawqen wañuchiq wawaykita makiykuman churamuy wawqen wañuchisqanmanta wañuchinaykupaq, chaynapi herencia chaskinantapas amaña chaskinanpaq, nispanku. Chaynaqa, reynilláy, huknin wawaytachiki nina sansa hina kachkaqta chinkarachinqaku, hinaptinchá qosaypa sutinpas chaynataq mirayninpas kay pachamanta chinkarunqa, nispa.
8Hinaptinmi chay warmita rey nirqa:
Wasikiman kutikuy, ñoqam kay sasachakuynikita allichasaq, nispa.
9Chaymi Tecoa llaqtayuq warmi nirqa:
Reynilláy, aylluykunawan ñoqayá chaymantaqa huchayuq kasaqku, amayá qamchu nitaq kamachikuqkunachu, nispa.
10Reyñataqmi nirqa:
Contraykipi rimaqta pusamuway chaynapi mana pipas imanasunaykipaq, nispa.
11Hinaptinmi chay warmi nirqa:
Reynilláy, ruegakuykim, ama wawallayta wañurachinanpaqyá yupaychasqayki Tayta Diosta mañakuy, mana chayqa huknin wawallaytawanchá wañurachinqaku, nispa.
Reyñataqmi nirqa:
Tayta Diosraykum jurani, wawaykipaqa manam umanpi huk chukchallanpas wichinqachu, nispa.
12Ichaqa chay warmim yapamanta nirqa:
Reynilláy kayllatañayá niykullasqayki, nispa. Chaymi rey David nirqa: Rimariyá, nispa.
13Hinaptinmi chay warmi nirqa:
Chaynata rimaspaykiqa, ayqekuq churikita mana kutichimusqaykiraykum kikillayki huchayuq kanki. Chaynaqa, ¿Imanasqataq Diospa llaqtanpa contranpi chaynata tanteanki? 14Lliwpas wañuqllam kanchik, pampaman yaku tallisqa hina waspiruqllam kanchik. Nitaqmi Diospas runapa vidantaqa qechunchu, aswanqa qarqosqa runa payman kutirikamunanpaqmi tukuy imata ruwaspan yanapan. 15Reynilláy, runakuna manchachiwaptinmi kaykunata niykuqniki hamurqani: “Kunanyá reyta nimusaq, icharaqpas nisqayta ruwanman”, nispay. 16Uyariykuwaspaykiqa wawaytawan kuskatam libraykuwanki Diospa herencia qowasqankumanta chinkarachiy munawaqniy runamanta. 17Reynilláy, ñoqaqa munani sonqollay tiyaykachinaykitam, qamqa Diospa angelnin hinam allin kaqta mana allin kaqtapas sumaqta reqsinki. Tayta Diosyá qanwan kachun, nispa.
18Chaymi chay warmita rey David nirqa:
Kunanmi ama pakaykuspa imam tapusqayta willawanki, nispa.
Hinaptinmi reyta chay warmi nirqa:
Reynilláy tapuykuwayá, nispa.
19Chaymi rey kaynata tapurqa:
¿Manachum tukuy kaykuna niwasqaykiqa Joabpa nimususqayki? nispa.
Chay warmiñataqmi nirqa:
Reynilláy kay niwasqaykiqa cheqapmi, arí serviqniki Joabmi ima ninaytapas sumaqta umachaykamuwaspan kamachimuwarqa. 20Payqa imam pasakusqanta allichananpaqmi tukuy kaykunata ruwarqa. Ichaqa qanmi Diospa angelnin hina ancha yachayniyuq kasqaykirayku kay nacionpi tukuy ima pasakusqanta yachanki, nispa.
21Chaymantam Joabta rey nirqa:
Mañakusqaykiyá ruwasqa kachun: Rispayki Absalonta kutichimuy, nispa.
22Hinaptinmi Joabqa pampakama kumuykuspan Davidta bendeciykuspan nirqa:
Reynilláy, kunanmi kay serviqnikipa mañakusqanta ruwaykusqaykiwan kay serviqniki kuyapayasqaykita qawaykachikunki, nispa.
23Chaymi Joabqa Gesur nacionman rispan Jerusalén llaqtaman Absalonta pusamurqa. 24Ichaqa Davidmi nirqa:
Absalonqa wasinman ripuchun, chaynapi ama rikuwananpaq, nispa.
Chaymi Absalonqa wasinman ripukuspa reyta mana rikurqachu.
25Israel nacionpiqa manam pipas Absalón hina ancha kuyayllapaqqa karqachu. Payqa chaki pampanmanta uma puyukninkama kuyayllapaqmi karqa. 26Chukchantapas llumpayta llasasqanraykum sapa wata tukuyta rutuchikuq, ruturuspanku chukchanta pesaptinkum reypa balanzanpi iskay kilo masninta llasaq. 27Absalonpam churinkuna nacerurqa, kimsa qari huk warmi. Warmi churintam Tamarwan suticharqa, payqa ancha kuyayllapaq sipasmi karqa.
28Iskay watam Jerusalenpi Absalón yacharqa, ichaqa manam reypa qayllanman yaykurqachu. 29Huk punchawmi reypa qayllanman kachananpaq Joabta Absalón qayachirqa, Joabmi ichaqa hamuyta mana munarqachu. Kaqllamanta qayachiptinpas Joabqa manam hamuyta munarqachu. 30Chaymi serviqninkunata Absalón nirqa:
Chakraypa waqtanpi Joabpa cebada chakranta kañaykamuychik, nispa.
Chaymi Absalonpa serviqninkuna Joabpa cebadanta kañaykamurqaku. 31Hinaptinmi Joabqa Absalonpa wasinman rispan nirqa:
¿Imanasqataq serviqnikikuna cebadayta kañaykamurqaku? nispa.
32Absalonñataqmi nirqa:
Ñoqam qayachimurqayki rantiypi rispa reyta kaynata nimunaykipaq: ¿Imapaqtaq Gesur nacionmanta hamurqani? Allinchá kanman karqa hinapi kamuyniy. Kunanpunim reyta qawamusaq, huchayuq kaptiyqa wañuchiwachun, nispa.
33Chaymi reypa kasqanman rispan Joab chaykunata willaykuptin Absalonta qayachirqa. Hinaptinmi Absalonqa reypa kasqanman yaykuykuspan pampaman kumuykurqa. Davidñataqmi Absalonta muchaykurqa.
Chuya Qellqa Revisión @ Sociedad Bíblica Peruana, 2012