2 Samuel 13
13
Panillanta Amnón abusarusqanmanta
1Davidpa churin Amnonmi panin Tamarmanta enamorakururqa. Tamarqa karqa Davidpa churin Absalonpa paninmi, payqa ancha kuyayllapaq sipasmi karqa. 2Amonmi panin Tamarmanta enamorakuruspam llakimanta onqorurqa. Tamarqa manaraq qari reqsiq kasqanraykum Amnonqa mana ima ruwaruytapas atirqachu. 3Amnonpam karqa huk amigon ancha sakri runa Jonadab sutiyuq. Payqa Davidpa wawqen Simeapa churinmi karqa. 4Paymi Amnonta nirqa:
Reypa churin ¿imanasqataq puncha-punchaw kaynatañaqa hukmanyachkanki? ¿Manachu willaykuwankiman? nispa.
Chaymi Amnón nirqa:
Wawqey Absalonpa panin Tamarmantam llumpayta enamorakuruni, nispa.
5Hinaptinmi Jonadab nirqa:
Camaykiman usturuspayki onqoq tukuruy; taytayki watukusuqniki hamuptinñataqmi ninki: “Ama hina kaspayá paniy Tamarta kacharamuway mikuyta ñawpaqniypi yanuruspa qaraykuwaptin mikunaypaq”, nispa.
6Chaymi Amnón onqoq tukuruspa camanman ustururqa. Rey watukuq riptinñataqmi kaynata nirqa:
Ruegakuykim paniy Tamar hamuspan iskay tortillakunata ñawpaqniypi yanuruspa mikuchiwananpaq, nispa.
7Hinaptinmi Davidqa Tamarta qayachispan kaynata nichimurqa:
Ama hina kaspaykiyá turiki Amnonpa wasinman rispa mikuyta ruwarapamuy, nispa.
8Chaymi Tamarqa turin Amnonpa wasinman rispan camanpi puñuchkaqta tariykurqa. Hinaspanmi harinata chapuruspan ñawpaqninpi tortillata ruwarqa. 9Tortilla ruwasqanta haywaykuptinmi Amnonqa mikuyta mana munaspan criadonkunata kaynata nirqa:
Kaymanta lloqsiychik, nispa.
Llapa runakuna chaymanta lloqsiruptinkum 10Tamarta Amnón nirqa:
Puñunayman apamuspayki simiyman mikuchiway, nispa.
Chaymi Tamarqa tortillakuna ruwasqanta turin Amnonpa puñunanman apaykurqa. 11Mikunanpaq ñawpaqninman asuykachiptinmi Tamarta hapiruspan nirqa:
Panilláy, hamuy puñusunchik, nispa.
12Tamarñataqmi qaparispa nirqa:
¡Ama turilláy! ¡Amayá abusawaychu! Israel nacionpiqa manam kaynataqa ruwanachu. Ama kay millakuypaq penqaytaqa ruwaychu. 13¿Maymantaq penqakuyniywan riyman? Qampas Israel nacionpichá penqakuypaq qawasqa kawaq. Mañakuykim reyta kunan niykamunaykipaq, payqa manam casarakunanchiktaqa harkakunqachu, nispa.
14Amnonmi ichaqa Tamarpa nisqanta mana kasuspan kallpanman hina abusarurqa. 15Chaymantam Amnonqa Tamarta llumpayta cheqnirurqa. Kuyasqanmantapas aswanraq cheqnipakuruspanmi nirqa: Hatarispayki kaymanta lloqsiy, nispa.
16Tamarñataqmi nirqa:
Turilláy, ama wischullawaychu, wischuwaynikiqa abusawasqaykimantapas aswan mana allinmi kanman, nispa.
Amnonmi ichaqa nisqanta mana kasuspa 17criadonta qayaykuspan nirqa:
Kay warmita hawaman qarqospa punkuta allinta wichqay, nispa.
18Amnonpa criadonmi Tamarta hawaman wischuruspan punkuta allinta wichqarurqa. Tamarqa rikchaqmana colorniyuq suma-sumaq pachawan pachasqam karqa, chaynataqa pachakuqku reypa sipas churinkunallam. 19Chaymi Tamarqa uchpata umanman machqekuykuspan suma-sumaq pachantapas llikiparuspan, umanta makinwan hapikuykuspan qaparispa waqastin pasakurqa. 20Chayta turin Absalón yacharuspanmi tapurqa:
Panilláy ¿turiki Amnonchu kayta ruwaramusunki? Amañayá llumpaytaqa hukmanyaychu, turiki kasqanraykuyá upallaruyña, nispa.
Chaymi Tamarqa turin Absalonpa wasinman ripukuspan llakisqallaña chaypi yacharqa. 21Chaykunamanta yacharuspanmi rey Davidqa sinchita piñakururqa, Amnontam ichaqa piwi churin kasqanrayku mana qaqcharqachu. 22Absalonpas wawqen Amnontaqa manam imatapas nirqachu, ichaqa panin Tamarta abusasqanmantam cheqnikurqa.
23Iskay wata pasaruptinmi, Absalonpa runankuna Efraín llaqtapa hichpan Baal-hazor lawpi ovejankunata rutuchkarqaku, Absalonñataqmi reypa churinkunaman convidarqa. 24Absalonmi reyman hamuspan nirqa:
Runaykunam ovejaykunata rutuchkanku, chaynaqa ruegakuykim serviqnikikunawan rinaykipaq, nispa.
25Chaymi Absalonta rey nirqa:
Churilláy, manam llapallaykuqa riymankuchu, llumpaytam gastachikikuman, nispa.
Absalón llumpayta hikutaptinpas reyqa manam riyta munarqachu, ichaqa Absalontam bendeciykurqa. 26Absalonñataqmi nirqa:
Mana riyta munaptikiqa ruegakuykim wawqey Amnón ñoqaykuwan rinanpaq, nispa.
Chaymi rey tapurqa: ¿Imapaqtaq Amnón rinanta munanki? nispa.
27Ichaqa Absalón hikutasqanraykum reyqa Amnonta wawqenkunawan rinanpaq kachaykurqa.
Absalonñataqmi convidota reypa mikunanpaq hina ruwachirqa. 28Hinaspam serviqninkunata kamachirqa:
Amnontam allinta qawankichik, sinkaña kachkaptinmi wañurachinaykichikpaq kamachisqaykichik, hinaptinmi ama manchakuspa wañuchinkichik, ñoqam kamachikichik, kallpanchakuspa qarinchakuychik, nispa.
29Hinaptinmi kamachisqanman hina Absalonpa serviqninkuna Amnonta wañurachirqaku. Chaymi reypa churinkuna mulankuman sapakama sillakuykuspanku lluptikurqaku.
30Paykuna ñanllapiraq kachkaptinkum Davidman willaykurqaku:
Absalonmi llapallan churikikunata wañurachin, manam hukllapas puchunchu, nispanku.
31Hinaptinmi Davidqa pachanta llikiparuspan llumpay llakisqa kasqanrayku pampaman wischukuykurqa, chaynallatam serviqninkunapas ruwakurqaku. 32Davidpa wawqen Simeapa churin Jonadabñataqmi hamuruspan nirqa:
Reynilláy, ama piensaychu llapallan churikikuna wañurusqantaqa, Amnonllatam wañurachinkuqa; panin Tamarta abusasqan punchawmantaraqmi Absalonqa Amnón wañurachiyta tantearqa. 33Chaynaqa, reynilláy ama piensaychu llapallan churikikuna wañurusqantaqa, Amnonllam wañurunqa, nispa.
34Absalonñataqmi ayqekurqa. Llaqta waqaychaq runa qawarispanmi rikururqa Horonaim llaqtaman riq ñanninta achkallaña runakuna uraykamuchkaqta, chaymi reypa kasqanman rispan nirqa:
Orqopa waqtantam achkallaña runakuna uraykamuchkan, nispa.
35Chaymi reyta Jonadab nirqa:
Waqaya churikikunaqa ñoqapa nisqayman hina hamuchkankuña, nispa.
36Jonadab rimayta tukuykuchkaptinmi reypa churinkuna chayaramuspanku qaparispa waqarqaku, reypas llapallan serviqninkunawan kuskam waqarqa. 37#2 S 3.3.Absalonñataqmi lluptikuspa Gesur nacionpa reynin Talmaipaman ripukurqa. Talmaiqa Amiudpa churinmi karqa. Davidñataqmi churin Amnonmanta sapa punchaw waqarqa. 38Absalonmi Gesur nacionman ayqekuspan kimsa wata chaypi yacharqa. 39Rey Davidñataqmi churin Amnonpa wañusqanmanta sonqon tiyaruptin tukuy sonqonmanta Absalonta rikuykuyta munarqa.
Chuya Qellqa Revisión @ Sociedad Bíblica Peruana, 2012