2 Samuel 12
12
Davidta Natán qaqchasqanmanta
1 # Sal 51 tít. Tayta Diosmi Davidman profeta Natanta kacharqa. Chayaruspanmi Natán nirqa:
Huk llaqtapim iskay runakuna karqaku, hukninmi karqa apu, hukninñataq wakcha. 2Apu runapam ovejankunawan vacankuna achkallaña karqa. 3Wakchapañataqmi rantisqan chullalla chita ovejachan karqa. Chay ovejachanmi paywan chaynataq churinkunawan kuska wiñarqa, kikinpa mikunanmanta mikuspa, tomanan vasomanta tomaspa, warmi churin hinam marqayllanpi puñurqa. 4Huk punchawmi chay apu runapa wasinman huk illakuq runa chayarurqa, hinaptinmi chay samapakuqninman mikuchinanpaq ovejankunamanta vacankunamanta nakayta mana munaspan, chay wakcha runapa ovejachantaraq qechuramuspan samapakuqninman mikurachirqa, nispa.
5Chayta David uyariruspanmi chay runapa contranpi llumpayta piñakuruspan Natanta nirqa:
Kawsaq Tayta Diosraykum jurani, chayna runaqa wañunanpunim. 6Chay ovejachapa rantinpipas tawa ovejakunatam sayachipunan, mana kuyapayarispa ruwasqanmanta, nispa.
7Chaymi Davidta Natán nirqa:
Chay runaqa qanmi kanki. Israelpa yupaychasqan Tayta Diosmi kaynata nin: “Ñoqam aceitewan tallichispay Israel nacionpi munaychakunaykipaq sapaqcharqayki, Saulpa makinmantapas libraspay. 8Saulpa ayllunkunatapas chaynataq warminkunatapas makikimanmi munaychakunaykipaq churamurqani. Israeltawan Judatam munaychakunaykipaq qorqayki, chaykunapas asllaraq kaptinqa aswan mastaraqmi yapaykiman karqa. 9¿Hinaptinqa imanasqataq kamachikuyniyta qepanchaspayki mana allinta ñawpaqniypi ruwarqanki? Het casta Uriasta wañurachispaykim warmintapas warmikipaqraq hapikuykunki. Qam kamachiptikim Uriasta Amonpa mirayninkuna guerrapi wañuchirqaku. 10Ñoqata qepanchawaspayki Het casta Uriaspa warminta warmikipaq hapikuykusqaykiraykum miraynikikunamanta espadapi wañuqkuna mana faltanqachu. 11Ñoqa Tayta Diosmi kaynata nini: Aylluyki ukumantam ñakarichisuqnikita hatarichisaq. Qawachkaptikim warmikikunata qechuspay hukkaqnin runamasikiman qoykusaq, paykunam warmikikunawan punchaw pacha puñukunqaku. 12#2 S 16.22.Qanmi pakasqallapi huchata ruwarqanki, ñoqam ichaqa lliw Israelpa rikusqanta punchawpi ruwasaq”, nispa.
13Hinaptinmi Natanta David nirqa:
Tayta Diospa contranpim huchallikuruni, nispa.
Chaymi Natán nirqa:
Tayta Diosqa pampachaykunñam huchaykitaqa, manam wañunkichu. 14Chaywanpas mana allin ruwasqaykiwan Tayta Diosta qepanchasqaykimantam naceq churikipas wañunqa, nispa.
15Chaymantam wasinman Natán kutikurqa. Tayta Diosmi Uriaspa viudanpi Davidpa churyasqan wawata onqorachirqa. 16Chaymi wawarayku Diosta mañakuspan David ayunarqa, hinaspanmi pampapi siriykuspan sapa tuta achikyarqa. 17Hinaptinmi palacionpi ancianokuna paypa kasqanman rispanku pampamanta hatarinanpaq ruegarqaku. Paymi ichaqa mana hatarirqachu nitaqmi paykunawan mikuytapas munarqachu.
18Qanchis kaq punchawpim wawa wañururqa. Chaymi serviqninkuna wawapa wañusqanta Davidman willaykuyta manchakuspanku kaynata ninakurqaku:
Wawa kawsachkaptinraq rimapayasqanchikta mana uyariwachkaspanchikqa aswanraqchiki kunan wawa wañurusqanta willaykuptinchikqa imatapas ruwakurunqa, nispa.
19Davidmi ichaqa serviqninkunapa upallallamanta rimanakusqankuta uyarispan wawapa wañurusqanta musyarurqa, chaymi paykunata tapurqa:
¿Wañurunchu wawa? nispa.
Hinaptinmi paykuna nirqaku:
Arí, wañurunmi, nispanku.
20Chaymi Davidqa pampamanta hatarispan bañakurqa, aceitewan llusikuspanmi pachantapas mudakurqa, hinaspam Tayta Diospa carpanman yaykuspa yupaycharqa. Chaymantam wasinman kutiramuspan mikuyta mañakuspan mikurqa. 21Hinaptinmi serviqninkuna nirqaku:
¿Ima ninantaq kay ruwasqaykiqa? Wawa kawsaptinraqqa ayunaspam waqarqanki, wañuruptinñataqmi hatarispayki tantata mikurunki, nispanku.
22Davidñataqmi nirqa:
Wawa kawsachkaptinraq ayunaspayqa waqarqani: “Icharaqpas Dios llakipayariwaspan wawata kawsachinmanraq” nispaymi. 23Wañuruptinqa ¿imapaqñataq ayunayman? ¿Atiymanchu kawsarichiyta? Ñoqam ichaqa paypa kasqanman risaq, payqa manañam ñoqaman kutimunqañachu, nispa.
Salomonpa nacesqanmanta
24Davidmi warmin Betsabeyta consuelarqa, hinaspam huktawan paywan puñuptin wiksayakuruspan qari wawata wachakurqa. Paytam David suticharqa Salomonwan. Diosmi chay wawata kuyarqa, 25hinaspam profeta Natanwan Davidman willachimurqa chay wawata Tayta Diosrayku #12.25 Hebreo simipi Jedidías ninanqa “Diospa kuyasqan” ninanmi.Jedidiaswan sutichananpaq.
Rabá llaqtata David vencesqanmanta
(1 Cr 20.1-3)
26Joabmi Rabá llaqtapi Amonpa mirayninkunawan pelearqa, hinaspam reypa llaqtanta hapikuykuspan 27willakuqkunata kacharqa Davidman kaynata nimunankupaq:
Rabá llaqtata atacaspaymi yakupa kasqan hatun llaqtata hapikuykuni. 28Kunanyá wakin tropaykikunata huñuy hinaspa llaqtata atacaspa hapikuykuy, mana chayqa hapikuykuptiymi sutiywan sutichasqa karunman, nispa.
29Chaymi David lliw tropankunata huñuruspan Rabá llaqtapa contranpi peleaq rirqa, hinaspam venceruspa munaychakururqa. 30Chay nacionpi reypam karqa alhaja rumikunawan adornasqa qorimanta coronan, chayta hurqoruspankum Davidpa umanman churarqaku. Chay coronapa llasayninmi karqa kimsa chunka kimsayuq kilo. Davidmi chay llaqtamanta imapas allinnin kaqkunata lliwta apakurqa. 31Llaqtapi puchuq runakunatapas hurqospam paykunata sierrakunawan, fierromanta trillanakunawan, fierromanta hachakunawan hinaspa ladrillo ruwaykunapi llamkachirqa. Chaynatam Amonpa mirayninmanta kaq llaqtakunatapas llamkachirqa. Chaymantam Davidqa llapallan tropankunawan Jerusalén llaqtaman kutikamurqa.
Chuya Qellqa Revisión @ Sociedad Bíblica Peruana, 2012