2 Samuel 11
11
Davidpa waqllikuy huchamam wichiykusqanmanta
1 # 1 Cr 20.1. Hamuq wata chayaramuptinmi, reykunapa guerraman lloqsinanku tiempopi, Joabta chaynataq Israel tropakunata capitannintintakama David kamachirqa Amonpa tropankunawan peleamunanpaq; chaymi Amón tropakunata venceruspanku Rabá llaqtatapas muyuriqninpi churakuruspanku wichqarurqaku. Davidmi ichaqa Jerusalenpi qeparurqa.
2Hinaspam Davidqa tarde lawta camanmanta hatariruspan palacionpa altosninpi ichikachachkarqa, hinaspam ancha kuyayllapaq warmita bañakuchkaqta rikuruspan, 3pim chay warmi kasqanta yachananpaq tapuchimurqa, hinaptinmi Davidman kaynata willarqaku:
Payqa Eliampa churin Betsabeymi, Het casta Uriaspa warminmi kasqa, nispanku.
4Hinaptinmi Davidqa Betsabeyta pusamunankupaq runankunata kacharqa. Pusaramuptinkum paywan puñururqa; chaymantam Betsabeyqa wasinman kutikurqa. Payqa chayllaraqmi killanwan onqosqanmanta chuyanchakururqa.
5Betsabeymi wiksayuq rikuriruspan Davidman willaykachimurqa:
Wiksayakurunim, nispan.
6Hinaptinmi Joabman David kunarqa:
Het casta Uriasta kachamuway, nispa.
Chaymi chaynata Joab ruwarqa. 7Urías hamuruptinmi David tapurqa Joabpa imaynam kasqanmanta chaynataq tropakunapa guerrapi imaynam kasqanmantapas. 8Chaymantam Uriasta David nirqa:
Wasikiman rispa warmikiwan puñukamuy, nispa.
Palaciomanta Urías lloqsiruptillanmi Davidqa kikinpa mikunanmanta huk regalota apachirqa. 9Uriasmi ichaqa wasinman mana rispa, reypa serviqninkunawan palaciopa punkunpi puñururqa. 10Wasinman Urías mana chayasqanta paqarinnintin Davidman willaykuptinkum Uriasta tapurqa:
Guerraman risqaykimanta kutiramuchkaspaqa ¿imanasqataq mana wasikimanchu rirqanki? nispa.
11Uriasñataqmi nirqa:
Diospa Arcanpas, Israel tropakunapas, Judá tropakunapas, kamachiwaqniy Joabpas serviqninkunapiwan carpallapi hawa pampapi kachkaptinkuchu ¿ñoqañataq mikukuq, tomakuq hinaspa wasiyman yaykuyman karqa warmiywan puñukuq? Vidaykiraykum jurani, manapunim chaytaqa ruwaymanchu, nispa.
12Chaymi David nirqa:
Kunanqa kaypiraqyá qepariy, paqarinñam aviasqayki, nispa.
Hinaptinmi Uriasqa Jerusalenpi paqarinnintinkama qeparurqa. 13Davidmi mikunankupaq tomanankupaq convidarqa, hinaspam sinkanankama upyarachirqa. Chaywanpas Uriasqa manam wasinman ripurqachu, aswanqa reypa serviqninkunawan kuskam puñururqa.
14Paqarinnintinmi Joabman cartata David qellqarqa, hinaspam kikin Uriaswan apachirqa. 15Chay cartapim nirqa:
Uriasta llumpa-llumpay wañuchinakuypa chawpinman churaruy hinaspa paymanta suchurikuychik, chaynapi wañurachinankupaq, nispa.
16Chaymi Joabqa llaqtata atacaspan allinnin qari-qari soldadokunapa kasqanman Uriasta churarurqa. 17Llaqtamanta soldadokuna lloqsiramuspankum Joabwan pelearqaku; Davidpa tropankunamantam achka soldadokuna wañururqaku, Het casta Uriaspas chaypim wañurullarqa.
18Hinaptinmi Joabqa Davidman willachimurqa guerrapi tukuy ima pasakusqanmanta. 19Hinaspanmi kachasqan runata kaynata umacharqa:
Guerramanta tukuy imata reyman willaykuptikiqa 20ichapas piñakuspan tapusunkiman: “¿Imanasqataq peleanaykichikpaq llumpayta llaqtaman asuykururqankichik? ¿Manachu perqa hawankunamanta tukuy imawan choqamusunaykichikta yacharqankichik? 21#Jue 9.53.¿Pitaq Jerobaalpa churin Abimelecta wañurachirqa? ¿Manachu huk warmi Tebes llaqtapa perqanmanta pakisqa maray rumita kachaykamuspa?” nispa, hinaptinqa kaynatam ninki: “Serviqniki Het casta Uriaspas wañurunmi”, nispayki.
22Chay willakuqmi Davidpa kasqanman chayaruspan, Joabpa tukuy ima kunamusqanta kaynata willarqa: 23Contraykupi lloqsimuq soldadokuna vencewachkaptinkupas llaqtapa punkunkamam qatirurqaniku. 24Ichaqa serviqnikikunapa contranpi perqamanta flechamuptinkum wakin serviqnikikuna wañururqaku, Het casta serviqniki Uriaspas wañurunmi, nispa.
25Chaymi willakuqta David nirqa:
Kallpanchaspayá Joabta nimuy: “Ama llakikuychu, guerrapiqa pipas wañunmi. Aswanraqyá chay llaqtata atacaychik chinkachinaykichikkama”, nispa.
26Betsabeymi qosan Uriaspa wañurusqanta yacharuspan llumpayta waqallarqa. 27Lutokusqan tiempo pasaruptinmi Uriaspa viudanta palacionman David pusachimurqa. Chaymi warminña kaspan Davidpa qari churinta wachakurqa. Ichaqa Davidpa ruwarusqanqa manam Tayta Diospa munasqanman hinachu karqa.
Chuya Qellqa Revisión @ Sociedad Bíblica Peruana, 2012