DEUTERONOMY 19
19
Katarikɔ̃ Simagɛ̃siare
1Mose ɔɣere Israel mabi sɔ: Si Bosate mi Ɣaa ɔɔwɔra nɖebi maturi ma karɔ̃ ɔto ɔ̃asu ɔtã mi fiɛ si miɔsa ma miɖi fiɛ ka misi i ma simagɛ̃ gu ayo ame ne, 2miɣɛ karɔ̃ ga i Bosate mi Ɣaa to ɔ̃asu ɔtã mi lɛ kaɖekɔ̃ aka atɛ. Iyɔ miɖi simagɛ̃siare i karɔ̃ ika biara ga miɣɛ ndɛndɛ̃ gɔ i ɔturi aawo ɔtere ɔbo mala. 3Miɖi siri mikɛlɛgu i simagɛ̃siare ame. Si ɔrere ɔɖue ɔturi ne ɔ̃atere ɔkɛlɛ i mmɔ.
4Nnɛgbe nɖe isɛra i nwɔ loɣɛrɛ kɔrɔ̃ ɔɖue ɔturi mama. Nwɔ loɣɛrɛ kɔrɔ̃ aatere ɔkɛlɛ i mmɔ si ɔɖi ɔ̃ ngbã - nwɔ loɖue ɔturi gɔ iiɖe sɔ ɔɖo ɔbara ne, ɔna adzuni nyanyariã ɔɖekatɔ̃ i ne iso. 5Si bosu sɔ, manyii inyɔ ɔsɛ ndɔrɛ̃ kakɛkɔ̃ i ipo ame. Ne ɔwɛ̃ sɔ ka ɔwuĩ kaɣɛ i kudziri iso si ɔɖaɛ kere, ne kaɣɛ iti ɔkpa kabɔrɛ i ɔdziri iso i ɔwiri ame, kasɛ kaawuĩ ɔ̃ ɔnyii nyɔare ne ɔkpi ne. Nwɔ loɔɖue ɔ̃ ɔnyii aawo ɔtere ɔkɛlɛ simagɛ̃siare itɛ dzɛgbe ɔwɛ̃ ame ala ɔ̃ ngbã iti. 6Si igu ikɛlɛ mmɔ ɔdzoro iɣede ne, iyɔ nwɔ lokpi biarase to ɔ̃atere ɔsiai wũ ku sikpã ɔtu wũ. Iyɔ ɔto ɔ̃aɖue wũ atoasɔ iikote sɔ ɔ̃akpi alasɔ ɔ̃iɖo ɔbara ne, ɔna adzuni nyanyariã ɔɖekatɔ̃ i ne iso. 7Nnɛgbe ɔso loɣɛ sɔ miɖi simagɛ̃siare itɛ misɛ so ne.
8Si Bosate mi Ɣaa ɔtã mi karɔ̃ ɔmɔ, lɛ kumɛgɔ ɔɣɛ ɔsɛ ku ndamu ɔtã mi mawa fiɛ ɔsu karɔ̃ ɔɖuɖu ga ɔɣɛ ɔsɛ ɔtã mi, 9ala misɛ i mmara ɔɖuɖu mɛ nto lotã mi nɔme iso kukaakɔ ɔso - sɔ miɖuɛ Bosate mi Ɣaa, si misɛ i ɔ̃ siri iso ɔwi biara. Iyɔ ne si miɖi simagɛ̃siare itɛ mibua mitã so i sɛ̃ itɛ ɖeakatɔ̃ kama. 10Mibara nnɛgbe si maibaɖue maturi ma loiɣɛrɛ i karɔ̃ ga i Bosate mi Ɣaa to ɔ̃atã mi lɛ kaɖekɔ̃ iso. Ana si miibaɣɛrɛ ala ima ifere i karɔ̃ iti.
11Ɣɛɛ si ɔrɛrɛ̃ ɔwɛ̃ ɔtsiri ɔ̃ ɔnyii fiɛ ɔsɛ ɔ̃awɛrɛ ɔsia fiɛ ɔta ɔbo wũ iso ɔɖue wũ, ne ɔrui ɔtere ɔkɛlɛ simagɛ̃siare dzɛgbe ɔwɛ̃ ame ne, 12iyɔ ɔ̃ mɔmɔ ɔmagɛ̃ makpakpa aasese ɔturi makɔ wũ mabɔrɛgu i ɔmagɛ̃siare ame mabɔ. Iyɔ maasu wũ matã nwɔ ɔɖue biarase fiɛ maaɖue wũ. 13Midaanyɔ wũ nnya ɖuɖuuɖu. Ikote sɔ miaɖi nwɔ loiɣɛrɛ ima ifere i karɔ̃ iɣɛrɛ i Israel, si ibiara aalɛgu mi.
Karɔ̃ Ame Kuere
14Midaasɛnɛkɛ̃ra kume adziri wa nɣɛ ku mi manyii. Ame wagbe i maturi ɖeakatɔ̃ i kaɖekɔ̃ ame ɔsia i karɔ̃ ga i Bosate mi Ɣaa to ɔsu ɔtã mi iso ne.
Aɖansiɛ Iɖe Iso Ara
15Aɖansiɛ ɔwɛ̃ iisi fiɛ maasu masiaita i ɔturi iɣɛrɛ ɣee iranyanyariã kuiwɛ̃ nɛ ɔbara iso. Ikote sɔ maturi inyɔ ɣee itɛ aaɖe aɖansiɛ i ira iso fiɛ maasiaita sɔ ɔturi ɔɣɛrɛ.
16Si ɔrere ɔbie sɔ ɔ̃aɖe aɖansiɛ nyanyariã i ɔturi mama iso, ɔkidza wũ ku iɣɛrɛ ne, 17maturi inyɔ ma mpia i atɔ̃mekaɣɛ ame aasɛ maaya i Bosate anɔ, i masɔrɛdze gu matɔ̃meɣɛdze ma nsi i kanya ku ɔwi wɔmɔ ame. 18Ikote sɔ matɔ̃meɣɛdze aafafarɛ itɔ̃me ame kukaakɔ, si manya sɔ aɖansiɛ ɖe ladze ne fiɛ ɔɖe sila aɖansiɛ i ɔ̃ ɔnyii iso ne, 19iyɔ mikpadzɛ̃ nwɔ loɖe sila aɖansiɛ kutsue lɛ ɔbie sɔ mabara ɔ̃ ɔnyii. Ikote sɔ miaɖi iranyanyariã i mi ndɛ̃. 20Maturi tsɔra to maanɔ nnɛgbe fiɛ maanigã. Iyɔ kuwɛ̃ iisibabara iranyanyariã nɛgbe igbã i mi ndɛ̃ kuiyikuiyi ana. 21Midaanyɔ nnya: ngbã i ngbã kanya, inɔmi i inɔmi kanya, inyɛ i inyɛ kanya, kɔrɔ̃ i kɔrɔ̃ kanya, kukpa i kukpa kanya.
اکنون انتخاب شده:
DEUTERONOMY 19: AKP
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2026 Ghana Institute of Linguistics, Literacy and Bible Translation