रोमीकु 1
1
1ईङ पौलुस ईसु ख्रीस्त आली बंधाउवा नोःआँ चिठी लिखाअ दिंग, जे परमेसर तरअः प्रेरित चुनाव लिनींग हेके आउर हुनी आला बेस खभाईर पापरचार लःअय अलगे लिनींग हेके। 2नोःआँ बेस खभाईर परमेसर पहिल तरअः गी अनेःग आलकु आगमजानीकु तरअः पबितर धरम पुथी रे, 3अनेःग आली होपोन, आबु आली परभु ईसु ख्रीस्त रअः बारे रे करार ताही लःअय, जे, होड़ रअः भेस रे दाऊद आला बंसवाईर रे सिरजाव नेनाय 4आउर पबितर आतमा रअः मोताबिक गोएःग उनकु मेसे जिवीःड-बिरिःड रेनअः चलते समरथ लोः परमेसर आली होपोन आबु आली परभु ईसु ख्रीस्त साबित नेनाय।
5हिनी तरअः आबु के दया आउर प्रेरित बनाअः रअः हक भेटाव ताना, जेकर से, आबु हुनी आला नुमू रेनअः चलते जामा जाईत रिनकु होड़ बिसवास केते हुनी आला मनाअकु। 6हुंकू एटाअ जाईतकु रे आपे होः हेके जे ईसु ख्रीस्त आलकु योअ लःअय राअः लेनपे हेके।
7ईङ नोःआँ चिठी के आपे जामे आला नुमू रे लिखाअ दिंग जे रोम रे एदान कुआ, परमेसर आलकु दुलार होड़ आउर पबितारोअ लःअय राअः लिनकु हेके।
आबु आली बाबा परमेसर आउर परभु ईसु ख्रीस्त तरअः आपे के दया आउर सानती भेटाअः।
धन्यवाद रेनअः बिनती
8पहिल रे ईङ आपे जामेकु लःअय ईसु ख्रीस्त तरअः अपन परमेसर आला धन्यवादेईंग, एता लःअय ची आपे आला बिसवास रअः बखान गोटा दुनिया रे हुयाअः ताना। 9ईङ जे परमेसर आला सेवा, हुनी आली होपोनते आला बेस खभाईर रअः परचार दोवासते पुरा मन तरअः यींग, हिनी ईङ आली गोवाही हेके, ची ईङ अपन बिनती रे आपे के जामा बेरा उईहार पिईंग। 10आउर जामा बेरा नोःआँ बिनती यींग ची जहान लकान रे होः नहाअः दो आपे लोः भेंटोः हिजोईंग, आउर ईङ आला होरा डिंडोअ परमेसर आला मरजी रेनअः मोताबिक पुरायोअ। 11एता लःअय ची ईङ आपे लोः भेंटोः लःअय तरसाअ तानिङ, ची ईङ आपे के जहान आतमिक बरदान एमापिङ, जेकर से ची आपे बिसवास रे केटे:ग बनाल तहिनपे। 12ईङ आला क-कंहड़ी रेनअः मतलोब एदनाआ ची आबु हुनी-नुई तरअः संतवाना नामेबु, आपे आला बिसवास तरअः ईङ आउर ईङ आला बिसवास तरअः आपे।
13 #
प्रे.कामी 19:21
ए बोयहाकु, ईङ काईंग चहाआ ची नोःआँ बात तरअः अनजान आलपे ताहिन ची ईङ आपे के उ-ऊदुअ नामिंग ईङ आपे दुबाःड़े घड़ी-घड़ी हिजोअ रअः जोजना बनाव लिईङ, बकिर नहाअः जगुत जहान कोवान जहान रोक हीःग एका नेना। ईङ निआँ लःअय आपे दुबाःड़े हिजोअ नाम किनींग ची जे लकान एटाअ जाईतकु ताला रे जोअ आगु लाईङ हिना लकान आपे ताला रे होः जोअ आ-आगु नामिंग।
14ईङ युनानीकु#1:14 युनानीकु होना बेरा युनानीकु के बेस संसकार समाज रिनकु होड़कु लःअय बेवहारे केनाकु, आउर बेगर संसकार कु लःअय गैर युनानी बेवहारे केनाकु। आउर एटाअ भाखा क-कंहड़ीकु, बुधीमानकु आउर गैर युनानीकु जामेकु आली रिंड़दार एदानिङा। 15हिना लःअय ईङ आपे केहोः जे रोम रे ताही नोआपे, भाइरसक बेस खभाईर सुसुनाव लःअय तलतलाव तानिङ।
बेस खभाईर रअः समरथ
16 #
सं.मर 8:38
ईङ बेस खभाईर तरअः काईंग लाजोआ, निआँ लःअय ची होना, हुंकू जामा बि-बिसवासकु लःअय पहिल दो जाहुदी फिन एटाअ जाईतकु लःअय, उ-उधार खातिर परमेसर आला समरथ हेके। 17#हब 2:4एता लःअय ची बेस खभाईर रे परमेसर आला धरमिकता बिसवास तरअः आउर बिसवास लःअय दिसतारोआ, जे लकान पबितर पुथी रे लिखा लअः एदनाआ, “बिसवास तरअः धरमीकु जिवीःड ताही कोआकु।”
मनवा जाईत आला पाप
18सिरमा तरअः परमेसर आला खीस हुंकू मनवाकु आला जामे बरन रअः गादुस काम आउर बेलुराकु रे दिसतारोआ, एता लःअय ची हुंकू बुराई तरअः सचाई के दबाव तअकु। 19एता लःअय ची परमेसर आला बारे रअः गेयान हुंकू पसिठा पाड़ीआकु आउर परमेसर गी हुंकू के पसिठा उदूः तदकुआय। 20हुनी आला का नेलोअ वाला गुन, माने कि हुनी आला जुग-जुग ताहिनोअ वाला समरथ आउर परमेसर आला चाईल-चाकर, दुनिया रेनअः सिरजअः बेरा तरअः परमेसर आला काम तरअः नेनेल रे हिजोआ, नोःआँ जगुत ची हुंकू दुबाःड़े जबाप कनोआँ। 21#इफि 4:17,18नोःआँ चलते ची परमेसर के पाड़ी केते होः हुंकू परमेसर के परमेसर जुकूर बड़ाई आउर धन्यवाद काकु लिया, बकिर हुंकू आला बिचार रे बेकार ना, नुमिन जगुत ची हुंकू आला निरबुधी मन अंधार ना। 22हुंकू अपन के बुधीमन समझाआकु बकिर हुंकू मुरुख पाड़ीअ नाकु। 23#कन 4:16–18आउर हुंकू, का-अन्तोः वाला परमेसर आला महिमा बाई केते नासोअ वाला मनवा, आउर ओड़ेकु, आउर चाईर गोड़वा, आउर रेंगाअ खाता जीव-जन्तु आला लकान मुरती रअः भेस रे हुंकू के बदलाव लिकुआकु।
24नोःआँ चलते परमेसर हुंकू के, हुंकू आला मन रेनअः गादुस इकछा रअः मोताबिक असुधता लःअय बाई लिकुआय ची हुंकू आकु-आकु अपास रे अपन होड़ो के बदनामेकु। 25एता लःअय ची हुंकू परमेसर आला सचाई के बदलाव केते झुठा बनाव केदाकु। आउर सिसिरजावी के, जे जुग-जुग स्तुति जुकूर एदानिया! बाई केते सिरजाव लअः के उपासना आउर सेवा लअकु, आमीन।
26हिना लःअय परमेसर हुंकू के गादुस इकछा आउर घिनाअ केन काम लःअय बाई किदकुआय, नोःआँ जगुत ची हुंकू आलकु आउराईतकु होः होड़ो रेनअः उचित संबंध के बाई केते का-उचित होड़ो संबध एहेःब लआकु। 27हिना लकान मरदानाकु होः आउराईतकु लोः होड़ो रेनअः उचित संबध के बाई केते अपास रे गादुस इकछा रे लोयोअ तनाकु। आउर मरदानाकु, मरदाना लोः लाज-लाजुवा काम कामी केते अपन बगड़ाल चाईल रेनअः ठीक डांड़ नाम लअकु।
28हुंकू परमेसर आला गेयान के किमती काकु समझाव नेना, दो परमेसर होः हुंकू के, हुंकू आला गादुस सोंच-बिचार तेंग रे बाई किदकुआय ची हुंकू का-बेस काम कामी एकाय कु। 29हिना लःअय हुंकू जामा बरान रेनअः अधरम, आउर गादुस, आउर लोभ, खपतान, आउर लोयोअ तरअः पेरेःग नाकु, आउर डाह, आउर गोगोएःग, आउर झगड़ा, आउर हे-हेड़े, आउर गादुस काम तरअः फं-फसाव कु, आउर चु-चुगली वाला, 30ए-एगेर वाला, परमेसर तरअः घिंड़ोअ कु, कुरकुरु कु, घमनडी, डिंग हंकाअ वाला, गादुस-गादुस जोजना बबनाव वाला, एंगा-आपा आला हुकूम का मनाअ वाला, 31अनबुझ, करार के तोतोड़ाव वाला, बेगर सोंह-मोंह वाला आउर बेगर दया-मया वालाअः नाकु। 32हुंकू दो परमेसर आला नोःआँ रिती पड़ीआकु ची नोकान-नोकान गादुस कामीकु मराईन डांड़ लकान एदान कुआ, सेरे होः ना दो नोकान भाईर कामीयाकु बकिर ककराव वाला कु तरअः हाँ रे हाँ मिलायाकु।
اکنون انتخاب شده:
रोमीकु 1: ASR
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 NLCI CC BY-NC-ND 4.0