संत.मरकुस 5
5
बाऊड़ाहा होड़ के छोड़ाव लियाय
(संत.मत्ती 8:28–34; संत.लुकास 8:26–39)
1ईसु तेकर चेला ताय डाहा होना पखी गिरासेनियाँ राईज रे सोदोर नेनाकु। 2तेकर हुनी डोंगा तरअः अड़गु होअः अड़गु नेनाय ची तुरते असुध आतमा झपाव लिनी होड़, मारघटा तरअः उडुंग केते हुनी लोः जुमाव नेनाय। 3हुनी मारघटा रे ताहिनोः केनाय, हुनी के सिक्काड़ रे होः ओके होअः काकु तोल दाड़ी केना। 4एता लःअय ची हुनी के घड़ी-घड़ी बिरी तेकर सिक्काड़ रे तोल लिनी ताहिनाय, बकिर दो सिक्काड़ के टोटअ लःअय आउर बिरी के टोटअ सेरेःड गुलताकेनाय, तेकर हुनी के ओके होअः काकु काबु दाड़ी केना। 5तेकर हुनी निदा ना सिंङ मारघटा हेतरअ बुरु रे दांड़ा-दांड़ा गुले केनाय, तेकर आएंग-आएंग टुकू रे कोटेःग घावोः केनाय।
6तेकर ईसु के लंका तरअः नेल केते नीर हीःग नेनाय हेतरअ दंडवात केते गोहराव नेनाय। 7तेकर जोड़ से गुल केते कंहड़ी लःअय, “ए ईसु, परम परधान परमेसर आली होपोन, ईङ लोः आम के एतान काम एदनाअ? परमेसर आला किरया एमा केते कंहड़ीः दिमीईंङ, ईङ के आलुम साताई।” 8(एता लःअय ची, ईसु “ए असुध आतमा, नुई होड़ तरअः उडुंग जुनोःमे!,” बेताई केनाय।)
9तेकर “आम आला एतान नुमू हेके?,” मेन केते ईसु हुनी के कुली लियाय।
हुनी “ईङ आला नुमू ‘पलटन#5:9 पलटन लिगियोन, 6000 सिपाहीकु, आलकु पलटन लकान’ हेके, एता लःअय ची आले ढेर बगरा एदान लेआ,” मेन केते कंहड़ी रूवाड़ लःअय। 10तेकर हुनी आले मुवाँकु के नोःआँ राईज तरअः एटाअ ते आलुम भेजाव केले, मेन केते ईसु तरअः गोहराव नेनाकु।
11तेकर होनाःड़े, बुरु रे मि गोहड़ा सुकरी चराअ केनाकु 12तेकर बायताल भुत “आले के हुंकू सुकरी रे भेजाव लेमे, आले सुकरी रे बोलाले,” मेन केते हुनी के गोहराव नेनाकु। 13हिना लःअय हुनी हुंकू के आचु लिकुआय, हेतरअ असुध आतमा ते हुनी तरअः उडुंग केते सुकरी रे बोलो नेनाकु, तेकर बार हजार लकान गोहड़ा सुकरी, ढेरंगा तरअः डाहा रे नीर बोलोअ नाकु, हेतरअ डुबाव गोएःग नेनाकु।
14हेतरअ सुकरी चरवाहा नीर सेन केते डिही हेतरअ सहर रे उदूः लअकु, तेकर जे हुयाव ताहीना के होड़ नेनेल लःअय हीःग नेनाकु। 15तेकर ईसु दुबाःड़े हीःग केते, हुनी बाऊड़ाहा जेके पलटन मुवाँ आतमा झपाव ताही लियाकु के, झुला सोलोंग लिनी हेतरअ बेस केन सिड़िग्या दुड़ूः ऊनी नेल केते बोरोः नाकु। 16हुनी बाऊड़ाहा जेकर रे मुवाँ आतमा ताही नेनाकु, सुकरी आला जामा खभाईर के नेनेल कु हुंकू के कंहड़ी उदूः लिकुआकु।
17तेकर हुंकू, आले आला सिमान तरअः सेनोः जुनोःमे, मेन केते ईसु तरअः गोहराव केते बेता लियाकु।
18तेकर ईसु डोंगा रे रकाबोः केनाय हिमीन रे, पहिल रे बाऊड़ाव ताहिनाय हुनी जेकर रे पहिल मुवाँ आतमा ताही नेनाकु, “ईङ के आम लोः ताहिः चाईङमे,” मेन केते गोहरअ तनाय।
19बकिर ईसु हुनी के आएंग लोः काय सेन चिलिया, तेकर हुनी के, “आम अपन ओड़ाअ सेन केते अपन होड़ के, आम एड़े परभु दया केते एतान लकान आम लःअय सेंड़ा काम कामी लःअय के ऊदूअ कुमे,” बेता लियाय।
20हिना लःअय हुनी दिकापुलिस#5:20 दिकापुलिसमियांड दस गो सहर रेनअः राईज ताहीना सेन केते, ईङ लःअय ईसु एतान लकान सेंड़ा काम कामी लःअय के, परचारे केनाय, तेकर जामाकु मोकाव जुनोः केनाकु।
गोएःग ऊनी कुड़ी तेकर बेमार ऊनी आउराईत
(संत.मत्ती 9:18–26; संत.लुकास 8:40–56)
21तेकर ईसु डोंगा रे होना पखी आउर गी रूवाड़ सेन नेनाय, हुनी डाहा दौंड़ी रेगी ताहिनाय हिमीन रे मुरुक तुन्दरा होड़ हुनी दुबाःड़े जवार नेनाकु। 22याईर नुमू रिनी मियांड बिनती ओड़ाअ रिनी अगुवा हीःग नेनाय, तेकर ईसु के नेल लियाय हेतरअ हुनी आला जांगा रे नुर केते गोहराव नेनाय, 23“ची ईङ आली दुलार माई तिंग गोजोः तनाय, आम हीःग केते आम हुनी एड़े तीः ताम के दोहोय मे, ची हुनी छुटाव अमिन केते जिवीःड तहिनोय” मेन केते कुड़ी आली आपाते ईसु लोः गोहराव नेना।
24तेकर ईसु, हुनी लोः सेनोः केनाय, हिमीन रे तुन्दरा होड़ हुनी के ओतोङ ईदी केनाकु, नुमिन मन तुन्दरा सेनोः केनाकु ची हुनी के धाकियाव ईदी केनाकु।
25तेकर मियांड आउराईत बारह बरीस तरअः महिना बेमार ताय का अटकाअः केना। 26हुनी ढेर दवहा कु तरअः मुरुक दुख सहाव लःअय, हेतरअ आएंग आला जामा खरचा के एमा चबा किद कुआय, रे होः काय बेस नेना, बकिर बेमार ताय आउर गी रोसाव सेन नेना। 27हुनी ईसु बारे आयुम केते तुन्दरा होड़ रे पछली तरअः हीःग केते हुनी आला गेन्दरअ के छुवाँव लःअय। 28एता लःअय ची हुनी, “ईङ हुनी आला गेन्दरअ भाईर के छुँवायीङ रे होः छुटाव कोईङ,” मेनोः केनाय।
29तेकर हुनी आला मयोम तुयोः केना होना तुरते हेने घड़ीक अटकाव ना, तेकर हुनी होना बेमार तरअः छुटाव निङ मेन केते होड़ो ताय रे अटकार लःअय। 30तेकर हिमीन रे ईसु आएंग तरअः सवांग उडुंग नेना के अटकार केते, तुन्दरा होड़ पखी पछली लुड़ीःग चुवेर केते, “ईङ आला गेन्दरअ के ओके छुवाँव लःअय?,” मेन केते कुली लिकुआय।
31तेकर हुनी आलकु चेलाकु, “काम नेल दीकुआ जे, तुन्दरा होड़ आमके धाकियाव देमेआकु, तेकर आम ईङ आला गेन्दरअ के ओके छुवाँव लःअय, मेन गेआम?,” बेता लियाकु।
32बकिर ईसु, जे छुवाँव ताही लियाय के, नेनेल लःअय तमानते लुड़ीःग लःअय। 33तेकर हुनी आउराईत, हुनी के एतान हुयाव नेना के अटकार केते बोरोः नाय, तेकर एकला योःते हीःग नेनाय हेतरअ गोड़ लगाव याःते जामा के सच-सच उदूः लःअय। 34तेकर हुनी, “ए माई आमके बिसवास ताम बेस तदमेआय, जु सानती से सेनमे तेकर नोःआँ दुख तरअः बंचाव ताहिन मे,” बेता लियाय।
35हुनी क-कंहड़ी केनाय गी ची याईर आला ओड़ाअ तरअः होड़ हीःग केते, “आम आली माई ताम दो गोएःग नाय, नहाअः दो गुरू के एतान लःअय परेसान दियाम?”
36हुंकू आला कंहड़ी के ईसु अनसुनी केते, याईर के, “आलुम बोर, आम बिसवासेमे भाईर,” बेता लियाय। 37तेकर पतरस हेतरअ याकुब तेकर याकुब आली बोकोते जोहन के बाई केते ओके केहोः आएंग लोः काय हीःग चिलकुआ। 38याईर आला ओड़ाअ सोदोर केते, हुनी मुरुक गुगुल तेकर ईईयाम नेल लिकुआय। 39तेकर भीतरी बोलो केते हुनी, “आपे एतान लःअय गुल-गबाड़ हेतरअ ईयाम दापे? नुई कुड़ी काय गोएःग ताना बकिर निन्दोः तनाय,” बेता लिकुआय।
40हुंकू ईसु के लान्दाय केनाकु, बकिर हुनी जामाकु के बाहरी ते उडुंग केते, कुड़ी आलकिन एंगा-आपा हेतरअ आएंग आलकु चेला लोः हुनी कुड़ी ताहिनाय दुबाःड़े सेन नेनाकु। 41तेकर हुनी कुड़ी आला तीः सःब केते, “तलीताकुमी!,” बेता लियाय, नोःआँ रअः माने “ए कुड़ी, आम के बेताः दिमीईङ, बिरिःड मे” हेके।
42तेकर हुनी बारा बरीस रिनी कुड़ी, तुरते बिरिःड केते दंड़ान तनाय। तेकर नेल केते जामाकु मोकाव चबाअः नाकु। 43हुनी नोःआँ कंहड़ी के ओके होअः आलकु पाड़ी के मेन केते बधराव लिकुआय, हेतरअ, “नुई के जहान जोजोम लःअय एमाई पे,” बेता लिकुआय।
اکنون انتخاب شده:
संत.मरकुस 5: ASR
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 NLCI CC BY-NC-ND 4.0
