2 Begyu-dɩrɛ 15
15
Yuda wogyu Asariya
1Isareli wogyu Yerobwam-nyɔɔfɛ wo bugyu buu gedi wʋʋ gɩkyan dikpilin ma kwarankɩfɛ gaanɩ fɔ, Amasiya wobi-teni Asariya e sere bugyu buu gedi Yuda. 2Ɔkʋna gɛtɛ e di bugyu fɔ ɛ̀ ba bɩkyan fwo-kooron. E di bugyu Yerusalem bɩkyan akpilin anyɔɔ ma fwo bʋnyɔɔ. Wɔna diyere n di Yekoliya, gɛ e ye Yerusalem. 3Ɛ mɛ ade gɛtɛ ii di Yahwe gʋnʋn anlɛ gɛtɛ wote Amasiya ɛ mɛ fɔ. 4Mɔ en gbena asʋmakʋn fɔ, okoro bɛnɩ bɛ̀ sangba bɛɛ tɛ gedi gɛ bee kuma olifwi dʋkɔbɛ.
5Yahwe ɛ sa egyu fɔ geyeba-sɩya ka ma sere duwi gɛtɛ e ku. Ɛ sara dɩkpaara kperen dɩkɩ daanɩ woko-kwan, gɛ wobi Yotam na yɛ ɛ nya digyukpaara fɔ ma gɩfɩɩ fɔ gɩɩ bɛnɩ boo koro.
6Bɛ ŋwara ade-kurumakyɛɛ gɛtɛ Asariya ɛ mɛ wo bugyu buu gedi baanɩ, ma wade gɛtɛ ɛ mɛ powu fɔ, bɛ sa Yuda begyu boo koro gaade wʋʋ gɩkpa-dɩrɛ fɔ gaanɩ. 7Asariya e ku gɛ be lò wɔ wotu ɛbɛ bɔɔ bɩsàn baanɩ, gbɛma ɔkʋn gɛtɛ bee kpèlè Dafidi Ditele fɔ. Gɛ wobi Yotam e di bugyu e sere wɔ gɩsɩrɩ.
Isareli wogyu Sekariya
8Yuda wogyu Asariya wo bugyu buu gedi wʋʋ gɩkyan dikpilin ma fwo-nɩyɛfɛ gaanɩ fɔ, Yerobwam wobi-teni Sekariya e be di bugyu Isareli. Ɛ sara Samariya, gɛ e di bugyu fɔ bebon kooron. 9Ɛ mɛ ade-kpen Yahwe bʋnʋn anlɛ gɛtɛ wotu ɛbɛ bɛ mɛ fɔ. En foma ye Nebati wobi Yerobwam wade-kpen gɛtɛ ɛ mɛ gɛ wʋ yɛ Isareli bete be gyu ade-kpen yaanɩ fɔ yaanɩ.
10Wʋʋ gama fɔ, Yabesi wobi Salum ɛ ka amɩnlɛ-kpen Sekariya wo koro. Ɛ tɔ ɛ tàmà wɔ bɛnɩ baanɩ gɛ e wolo wɔ, gɛ e di bugyu e sere wɔ bɩsɩrɩ. 11Bɛ ŋwara ade-kurumakyɛɛ gɛtɛ Sekariya ɛ mɛ wo bugyu buu gedi baanɩ fɔ bɛ sa Isareli begyu-dɩrɛ boo koro gaade yɩɩ gɩkpa-dɩrɛ fɔ gaanɩ. 12Okoro Yahwe wade gɛtɛ ɛ dama Yahu wo koro ɛ dɔ̀ alan, <<Aadu waanɩ wuu bebi baà sara Isareli gigyu-bɩya fɔ gii koro ka ma ye gewo tama gii bebi-naafɛ>> fɔ ɩ ba waanɩ.
Isareli wogyu Salum
13Yuda wogyu Usiya bugyu buu gedi wʋʋ gɩkyan dikpilin ma fwo yɛkɩfɛ gaanɩ fɔ, Yabesi wobi Salum e be di bugyu. Gɛ e di bugyu Samariya ebon. 14Salum bugyu buu gedi ebon gama fɔ, Gadi wobi Menahem ɛ tɔ e ye Tirisa ɛ san Samariya, ɛ ma wolo Yabesi wobi Salum Samariya ditele daanɩ, gɛ e di bugyu e sere wɔ bɩsɩrɩ.
15Bɛ ŋwara ade-kurumakyɛɛ gɛtɛ Salum ɛ mɛ wo bugyu buu gedi baanɩ, ma anlɛ gɛtɛ ɛ tɔ e yela Sekariya wo koro gɛ e wolo wɔ fɔ bɛ sa Isareli begyu-dɩrɛ boo koro gaade yɩɩ gɩkpa-dɩrɛ gaanɩ.
16Ɔya wʋtɔkɔ waanɩ fɔ, Menahem e ye Tirisa gɛ ɛ ma kpà ma Tifisa gɛ e wolo ditele fɔ ma dii-ikere-ikere yɩɩ bɛnɩ powu yema be terema bɛn ka koro tɛ. E berema Tifisa gɛ ɛ tɛrɛ-tɛrɛ beborona powu baaboro.
Isareli wogyu Menahem
17Yuda wogyu Asariya wɔ gɩkyan dikpilin ma fwo yɛkɩfɛ gaanɩ fɔ, Gadi wobi Menahem e be di bugyu Isareli, gɛ e di bugyu ɛ sara Samariya ditele daanɩ bɩkyan fwo. 18Ɛ mɛ ade-kpen Yahwe bʋnʋn. Wo bugyu buu gedi bʋʋya waanɩ powu fɔ, en foma ye Nebati wobi Yerobwam wade-kpen gɛtɛ ɛ mɛ gɛ wʋ yɛ Isareli bete be gyu ade-kpen yaanɩ fɔ yaanɩ.
19Asiriya wogyu Puli ɛ ba ee to Isareli gɛtʋnkwaa, gɛ Menahem ɛ tɛ wɔ sɩka-fututu bekotoku nkpɩn ton fɔ Asiriya wogyu èè wura kpa wɔ̀ fɔ èè wura wura ɔkɛma gɛtʋnkwaa fɔ gaanɩ.
20Menahem ɛ nyɩ bɛnɩ gɛtɛ bɛ̀ ba kɔba fɔ alɛ ɛkamasɛ e le sɩka-fututu kilo-fan, fɔ ɛ̀ɛ̀ ka tɛ Asiriya wogyu. Okoro Asiriya wogyu e kpe e ye gɛtɛ ɛn mɩnɩ sara gɛtʋnkwaa fɔ gaanɩ.
21Bɛ ŋwara ade-kurumakyɛɛ gɛtɛ Menahem ɛ mɛ wo bugyu buu gedi baanɩ ma ade powu gɛtɛ ɛ mɛ fɔ bɛ sa Isareli begyu-dɩrɛ boo koro gaade yɩɩ gɩkpa-dɩrɛ fɔ gaanɩ. 22Menahem e ku gɛ be lò wɔ wotu ɛbɛ boo gelòkʋn. Gɛ wobi Pekahiya e di bugyu e sere wɔ bɩsɩrɩ.
Isareli wogyu Pekahiya
23Yuda wogyu Asariya wɔ gɩkyan akpilin anyɔɔ ma fwofɛ gaanɩ fɔ, Pekahiya wobi Menahem e be di bugyu Isareli. E di bugyu ɛ sara Samariya bɩkyan bʋnyɔɔ. 24Pekahiya ɛ mɛ ade-kpen Yahwe bʋnʋn. En foma ye Nebati wobi Yeroboham wade-kpen gɛtɛ ɛ mɛ gɛ ɛ yɛ Isareli bete mɔ be gyu ade-kpen yaanɩ fɔ yaanɩ. 25Remaliya wobi Peka gɛtɛ è di wɔ bɛndɩrɛbi fɔ baanɩ ɛkɩ fɔ ɛ tɔ e yela wo koro. Ɛ ka Gileyadi bɛnɩ akpilin anyɔɔ ma fwo ɛ fɩya ma koro gɛ e wolo Pekihiya, ma Arigobi, ma Ariye Samariya digyu-kpara daanɩ. Okoro Peka e wolo Pekahiya gɛ e di bugyu e sere wɔ gɩsɩrɩ.
26Bɛ ŋwara ade-kurumakyɛɛ gɛtɛ Pekahiya ɛ mɛ wo bugyu buu gedi gaanɩ ma ade powu gɛtɛ ɛ mɛ fɔ bɛ sa Isareli begyu-dɩrɛ boo koro gaade yɩɩ gɩkpa gaanɩ.
Isareli wogyu Peka
27Yuda wogyu Asariya bugyu buu gedi wuu gɩkyan akpilin anyɔɔ ma fwofɛ gaanɩ fɔ, Remaliya wobi Peka e sere bugyu buu gedi Isareli, gɛ ɛ sara Samariya e di bugyu fɔ bɩkyan dikpilin. 28Ɛ mɛ ade-kpen Yahwe bʋnʋn. En foma ye Nebati wobi Yerobwam wade-kpen gɛtɛ wʋ yɛ Isareli bete mɔ be gyu yaanɩ fɔ yaanɩ.
29Isareli wogyu-dɩrɛ Peka wɔya waanɩ fɔ, Asiriya wogyu Tigalati-Pilesa e be gye Iyon, ma Abeli-Beti-Maaka, ma Yanowa, ma Kadesi, ma Haso. E gye Gileyadi ma Galile, ma Nafitali wɔ ntʋnkwaa powu gɛ ɛ ka bɛnɩ fɔ e da Asiriya. 30Husiya wobi Yotam gɛtɛ è di Yuda wogyu-dɩrɛ fɔ gɩkyan dikpilinfɛ gaanɩ gɛ Ela wobi Hoseya ɛ tɔ e yela Remaliya wobi Peka wo koro, gɛ e wolo wɔ. Ɛwʋ di bugyu e sere wɔ bɩsɩrɩ.
31Bɛ ŋwara ade-kurumakyɛɛ gɛtɛ Peka ɛ mɛ wo bugyu buu gedi gaanɩ ma ade powu gɛtɛ ɛ mɛ fɔ, bɛ sa Isareli begyu-dɩrɛ boo gɩkpa-dɩrɛ fɔ gaanɩ.
Yuda wogyu-dɩrɛ Yotam
32Remaliya wobi Peka gɛtɛ è di Isareli wogyu fɔ wo bugyu buu gedi wʋʋ gɩkyan-nyɔɔfɛ gaanɩ fɔ, Husiya wobi Yotam e sere bugyu buu gedi Yuda gɩfɩɩ gaanɩ. 33E di bɩkyan dikpilin ma ton pɛ gɛ e di bugyu. Gɛ e di bugyu Yerusalem bɩkyan fwo kooron. Wɔna diyere n di Yerusa gɛtɛ è di Sadoki wobi-nanɩ fɔ. 34Ɛ mɛ ade gɛtɛ ɩ tʋna Yahwe bʋnʋn baanɩ anlɛ gɛtɛ wote Usiya ɛ mɛ fɔ. 35Mɔ asʋmakʋn fɔ bɩrɛ, ben tiri gɛ bɛnɩ bɛ bɔ bɛɛ ma tɛ gedi gɛ bee kuma ilifwi dʋkɔbɛ. Yotam na biri na sere Yahwe Dikwo-dɩrɛ fɔ dɩɩ gatala giitunu fɔ.
36Bɛ ŋwara ade-kurumakyɛɛ gɛtɛ Yonatan ɛ mɛ wo bugyu buu gedi gaanɩ ma ade powu gɛtɛ ɛ mɛ fɔ, bɛ sa Yuda begyu-dɩrɛ boo koro gaade yɩɩ gɩkpa-dɩrɛ fɔ gaanɩ. 37(Awi ɩtɔkɔ yaanɩ gɛ Yahwe ɛɛ yɛ Asiriya wogyu Resin ma Remaliya wobi Peka be sere ɔpɩ bɛɛ ma tà bɩtà ma Yuda bete.) 38Yotam e ku gɛ be lò wɔ wotu ɛbɛ bɔɔ bɩsan baanɩ ɔkʋn gɛtɛ bee kpèlè Dafidi Ditele-dɩrɛ fɔ. Gɛ wobi Ahasi e di bugyu e sere wɔ bɩsɩrɩ.
اکنون انتخاب شده:
2 Begyu-dɩrɛ 15: ADE
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Ghana Institute of Linguistics Literacy and Bible Translation