2 Ɩya-ɩya 18
18
Yehosafati e terema ade ɛ tɛ Ahabi
1 Begyu-dɩrɛ 22:1-28
1Yuda wogyu Yehosafati e wura koro gaanyan gepepe ma gebù, gɛ ɛ yɛ ɛwɔ ma Isareli wogyu Ahabi bɛ dɔ̀ be yera gɛtɛ wɔ dɩkpaara dɩɩnɩ gɩna. 2Bɩkyan bɛrɛɛ bʋkɩ bʋʋ gama fɔ, Yehosafati ɛ san ɛ ma silin Ahabi Samariya ditele daanɩ. Gɛ Ahabi e wolo bɛyɛran ma bɛkwɔ kpekpesi e kpele anyandilɛ e to Yehosafati ma bɛnɩ gɛtɛ bɛ fɩya ma ɛwɔ fɔ. Gɛ Ahabi ɛ fɔ Yehosafati alɛ ɛ bɛ kpà wɔ baà kpà ma Ramoti-Gileyadi. 3Ahabi e lila Yehosafati alan, <<Aà fɩya ma nmɩ nan ma kpà ma Ramoti-Gileyadi?>>
Ɛwʋ gɛ Yehosafati e tiri wuunyun alan, <<Miinyo wù di aayo, gɛ mɩɩn bɛnɩ bè di aa bɛnɩ. Taà fɩya ma awɔ tɩ ma kpà. 4Gɛ Yehosafati e biri ɛ dɔ̀ Isareli wogyu Ahabi alan, <<Gyegeye lila Yahwe gelenbi pɛ.>>
5Okoro Isareli wogyu-dɩrɛ ɛ kʋla Wurubwarɛ bɛtabʋrʋlɛ fɔ powu gɛtɛ baà mɛ anlɛ bɛnɩ nkpɩn bʋnyɔɔ (400), gɛ e lila bɛ alan, <<N san n ma kpà ma Ramoti-Gileyadi ditele, abɛɛ n kara n san?>> Gɛ Be tiri wuunyun alan, <<San, yema Yahwe ɛɛ̀ ka dɩ ɛ sa awɔ egyu-dɩrɛ aa gʋlɔ.>>
6Mɔ Yehosafati e lila alan, <<Yahwe wɔtabʋrʋlɛ ɛkɩ ɛn mɩnɩ ma fɩya gɛtɛ taà lila ti ye wakʋn?>>
7Gɛ Isareli wogyu e tiri wuunyun ɛ tɛ Yehosafati alan, <<Ɛkɩ ɛ̀ sangba ɛ̀ sa gɛtɛ taà talɩ ti lila wɔ Yahwe gelenbi, mɔ n tɛ kyʋn wɔ, yema ɛn tɛ dɔ̀ ade-kpara ka dama miin koro nya, mɔ ɔya-kamasɛ fɔ, ade-kpen yiiko-yiiko gɛ ɛɛ dɔ̀. Ɛwɔ n di Imila wobi Mikaya.>>
Gɛ Yehosafati ɛ dɔ̀ alan, <<Egyu-dɩrɛ Ahabi, kara dɔ̀ gɛlɛ!>> 8Okoro Isareli wogyu ɛ sa wɔsaranyan ɛkɩ alan, <<San ma ka Imila wobi Mikaya ba nfan nkenkele.>>
9Fɔ Isareli wogyu Ahabi, ma Yuda wogyu Yehosafati bɛ̀ sa baagyu-nyan bè si bugyu-bɩya buu koro ɔkʋn gɛtɛ bee tiba afabi Samariya ditele diitunu-yon fɔ. Fɔ bɛtabʋrʋlɛ fɔ powu bè si bɔɔ bʋnʋn bɛɛ tabʋrʋ. 10Gɛ Baanɩ ɛkɩ gɛtɛ bee kpèlè wɔ alɛ Sedekiya gɛ wote n di Kenaana fɔ, ɛ mɛ awɔrɔnyan yaakantan, gɛ ɛ dɔ̀ alan, <<Yahwe ɛɛ dɔ̀ alan, <Akantan nyayɩ gɛ aà ka a kpà ma Siriya bete ma sere gɛtɛ aà muru bɛ.> >>
11Bɛtabʋrʋlɛ-do fɔ powu bɛɛ dɔ̀ gɛ ade-kɩlɩn alan, <<Ma kpà ma Ramoti-Gileyadi ditele, fɔ àà di dii koro, yema Yahwe ɛɛ̀ ka di ɛ sa egyu-dɩrɛ gʋlɔ.>>
12Ɛsalɛ gɛtɛ ɛ san ɛ ma kpèlè Mikaya fɔ ɛ dɔ̀ wɔ alan, <<Nya, bɛtabʋrʋlɛ-do fɔ powu bɛɛ dɔ̀ gɛ ade-kɩlɩn be wùlà gɛtɛ egyu-dɩrɛ eè di akpa fɔ yii koro. Okoro yɛ aanyun-gyebi yàà mɛ dɩkɩlɩn ma booyo, fɔ àà tabʋrʋ ade-kpara.>> 13Mɔ Mikaya ɛ dɔ̀ wɔ alan, <<Na nya Yahwe alɛ, nan bɔ n dɔ̀ wɔ gɛ ɛwʋ gɛtɛ Yahwe ɛɛ̀ dɔ̀ mɩ fɔ.>>
14Gɛtɛ e be gyu fɔ, egyu-dɩrɛ e lila wɔ alan, <<Mikaya, n ma kpà ma Ramoti-Gileyadi, abɛɛ n kara san?>> Gɛ e tiri wuunyun alan, < Ma kpà, aà di boo koro, yema Yahwe ɛɛ̀ ka bɛ ɛ sa aa gʋlɔ.>>
15Gɛ egyu-dɩrɛ ɛ dɔ̀ wɔ alan, <<Disere dilen gɛ aa le mɩ nan yɛ wɔ̀ àà kan ntam tɛ mɩ alɛ an taa dɔ̀ ade-fon ɩkɩ mɔ fɔ nʋnkwarɩ gɛ aa dɔ̀ mɩ Yahwe diyere daanɩ?>>
16Gɛ Mikaya e tiri wuunyun alan, <<Na we Isareli bete powu bɛ yasɩ idon yii koro, anlɛ bɛyɛran gɛtɛ bɛn ma ɛnyalɛ, gɛ Yahwe ɛ dɔ̀ alan, <Bɛnɩ nyabɛ bɛn ma ɛnyalɛ. Yɛ ɛkamasɛ ɛ̀ɛ̀ san wɔ dɩkpaara olila waanɩ.> >>
17Gɛ Isareli wogyu ɛ dɔ̀ Yehosafati alan, <<Mɩn dɔ̀ wɔ̀ alɛ, ɛn taa dɔ̀ ade-kpara ka dama miin koro, mɔ ade-kpen yiiko-yiiko?>> 18Mikaya e biri ɛ dɔ̀ alan, <<Nkele nʋn ade gɛtɛ Yahwe ɛɛ dɔ̀, <Na we Yahwe è si wo gigyu-bɩya gii koro, gɛ gatala gɩɩ dɩtɩnpan fɔ powu bè yela wɔ dɩbɩyan ma wologyi. 19Gɛ Yahwe e lila alan, <Ɛnyan nan ma gban Ahabi, ɛ̀ɛ̀ ma kpà ma Ramoti-Gileyadi bàà wolo wɔ dʋkɔ?> Gɛ <<ɛkɩ ɛ dɔ̀ anlɛ, gɛ edo mɔ ɛ dɔ̀ lɛ.>> 20Gamama fɔ gifiye-kpen gɩkɩ gi ye gi be yela Yahwe bʋnʋn gɛ gɩ dɔ̀ alan, <Nmɩ nan ma gban wɔ.>
Gɛ Yahwe e lila wɔ alan, << <Osele-mɔmɔ gɛ aà ka?
21Gɛ gifiye fɔ gi tiri wuunyun alan, << <Nan ye n san nan ma mɛ didebila dii gifiye wɔ bɛtabʋrʋlɛ fɔ powu boonyun waanɩ.>
Gɛ Yahwe ɛ dɔ̀ wɔ alan, << <Aà talɩ a gban wɔ, okoro san fɔ àà ma mɛ gɛlɛ.>
22Okoro Yahwe ɛ ka didebila dii gifiye ɛ sa aa bɛtabʋrʋlɛ nyabɛ powu boo-inyun yaanɩ. Yahwe ɛ wɛrɛ mɛ gɛtɛ eè muru wɔ̀.>>
23Gɛ Kenaana wobi Sedekiya ɛ bʋn ɛ ma gbɛrɛ Mikaya ɔtan gɛ e lila wɔ alan, <<Osele-mɔmɔ gɛ Yahwe gifiye gi ye maanɩ gɩ ma tabʋrʋ ma awɔ?>>
24Mikaya e tiri wuunyun alan, <<Duwi gɛtɛ aà ma bu dikwo dɩɩ gamɩ fɔ, gɛ aà we a nyɩnla.>> 25Gɛ Isareli wogyu ɛ dɔ̀ alan, <<Ɩ Ka Mikaya, fɔ yàà birima wɔ ɩ ma tɛ Amon, gɛtɛ ɛɛ nya ditele dii koro fɔ, ma egyu-dɩrɛ wobi Yowasi, 26fɔ yàà dɔ̀ bɛ alan, <<Egyu-dɩrɛ alan, <Ɩ ka wɔ ɩ ma tan dikwo, gɛ ɩ kara tɛ wɔ gɩnyankɩ ɩ fɩya ma boroboro, ma butu buuko, ma sere gɛtɛ nan biri n ba olila waanɩ.> >>
27Ɛwʋ gɛ Mikaya ɛ dɔ̀ alan, <<Gengyi à biri à ba olila waanɩ fɔ, ɛwʋ bɩrɛ Yahwe ɛn dama miin koro ɛ tabʋrʋ.>> Gɛ e biri ɛ dɔ̀ alan, <<Ɛyɩ powu, ɩ nʋn maanyun-gyebi ɩ sɩ̀!>>
Ahabi diku
1 Begyu-dɩrɛ 22:29-35
28Okoro Isareli wogyu Ahabi, ma Yuda wogyu Yehosafati bɛ bʋn bɛ da Ramoti-Gileyadi. 29Gɛ Isareli wogyu ɛ dɔ̀ Yehosafati alan, <<Nmɩ nan sa anyɩmɩnyan n bubwa koro n gyu akpa fɔ yaanɩ. Mɔ awɔ bɩrɛ, sa aagyu-nyan.>> Okoro Isareli wogyu e foma koro, gɛ e gyu akpa fɔ yaanɩ. 30Siriya wogyu ɛ dɔ̀ wo tiiramisan ɛbɛ bɔɔ bɛndɩrɛ fɔ alan, <<Ebi oo, ɛndɩrɛ oo, Ɩ kara kpà ma ɛnɩ ɛkɩ, ɩ kpà gɛ ma Isareli wogyu woko.>> 31Gɛtɛ tiiramisan ɛbɛ bɔɔ bɛndɩrɛ fɔ be we Yehosafati fɔ, bɛ sa amɩnlɛ alɛ wù di gɛ Isareli wogyu okoro be fi bɛ̀ ma kpà ma ɛwɔ, mɔ gɛtɛ Yehosafati e tiri onyun fɔ, Yahwe e to wɔ, gɛ be kere wɔ bɛ ya. 32Yema tiiramisan ɛbɛ bɔɔ bɛndɩrɛ fɔ be we gɛtɛ nka Isareli wogyu fɔ wɔlɛ, gɛ be kere wo geserenti berema wɔ bɛ ya.
33Mɔ ɛkɩ ɛ tà wɔ gɩsɩnta ɛ sa bɛnɩ fɔ baanɩ, gɛ gɩ ma sere Isareli wogyu gɛgba fɔ gɩɩ gɛkyagakʋn gʋʋgba gɛtɛ wʋ̀ dɔ fɔ waanɩ. Gɛ egyu-dɩrɛ ɛ dɔ̀ wo tiiramisan wɔkanlɛ fɔ alan, <<Fi, fɔ àà ka mɩ ye akpa fɔ yaanɩ, yema na pira.>> 34Akpa fɔ ɩ mɛ ɔkɛma duwi fɔ powu daanɩ, gɛ egyu-dɩrɛ ɛ yɛ ɛ̀ kpasa tiiramisan fɔ anɩ, gɛ wɔ bʋnʋn bʋ yɛ bù ten Siriya bete fɔ ma ye ɔgyɔlɔ. Gɛ e ku ɔgyɔlɔ wʋtɔkɔ.
اکنون انتخاب شده:
2 Ɩya-ɩya 18: ADE
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Ghana Institute of Linguistics Literacy and Bible Translation