2 Ɩya-ɩya 10
10
Isareli bete bɛ tɔ be yela Rehobwam wo koro
1Rehobwam ɛ tɔ ɛ san Sekem, yema Isareli bete powu bɛ da dʋkɔ bàà màà sɩ̀ wɔ bugyu. 2Gɛtɛ Nebati wobi-teni Yerobwam gɛtɛ e tì serenti e ye egyu Solomon wakʋn ɛ da Egyipiti fɔ ɛ nʋn gɛlɛ fɔ, e biri ɛ ba. 3Okoro bɛ sa bɛnɩ bɛ ma kpèlè Yerobwam, gɛ ɛwɔ ma gatala gɩɩ gɩlan gii-ifoli fɔ powu bɛ ma dɔ̀ Rehobwam alan, 4<<Aate ɛ ka ditola ma ɔdʋrʋ ɛ kyɔlɔga tɩ gigyen, mɔ nkele awɔ tɩyɛra dɩkpankpasan dɩɩ gʋtʋn, ma ditola ma ɔdʋrʋ gɛtɛ aate ɛ ka ɛ sa ti gigyen fɔ. Gɛlɛ fɔ taà sʋma wɔ̀.>>
5Gɛ Rehobwam e tiri wuunyun alan, <<Ɩ san, gɩsarama fɔ yàà biri ba.>> Okoro be ye wakʋn bɛ da.
6Ɛwʋ gɛ egyu Rehobwam ɛ ma to amɩnlɛ e ye bɛndɩrɛ gɛtɛ bɛ sʋma wote Solomon, wɔ nkpa wawi yaanɩ fɔ baakʋn alan, <<Amɩnlɛ-mɔmɔ gɛ yaà tɛ mɩ nan ka n tiri bɛnɩ nyabɛ baade fɔ yiinyun n tɛ bɛ?>>
7Gɛ be tiri wuunyun alan, <<Gengyi à mɛ gɩnɩ-kpara a tɛ bɛnɩ nyabɛ, gɛ à sʋma bɛ, gɛ à mɛ ade gɛtɛ ii di bɛ gʋnʋn, gɛ a tiri baade fɔ yiinyun gepe a tɛ bɛ fɔ, ɛbɛ mɔ baà mɛ aa bɛsaranyan gakpaakpa.>>
8Mɔ Rehobwam e terema bɛndɩrɛ fɔ baamɩnlɛ gɛtɛ bɛ dɔ̀ wɔ fɔ, gɛ ɛ ma lila bɛsaranyanbi gɛtɛ ɛwɔ ma ɛbɛ bè di akʋsʋ, gɛ bɛɛ sʋma wɔ fɔ. 9E lila bɛ alan, <Amɩnlɛ-mɔmɔ gɛ yaà tɛ mɩ? Lan gɛ taà tiri ade nyayɩ yiinyun tɩ tɛ bɛnɩ nyabɛ gɛtɛ bɛ dɔ̀ mɩ alan, <<Tɩyɛra ditola gɛtɛ aate ɛ ka ɛ kyɔlɔga tɩ gigyen fɔ> lɛ?>>
10Gɛ wakʋsʋ yɩɩ bɛsaranyanbi fɔ be tiri wuunyun bɛ tɛ wɔ alan, <<Dɔ̀ bɛnɩ gɛtɛ bɛ dɔ̀ wɔ̀ alan, <Aate ɛ ka ditola-dɩrɛ e tola tɩ, mɔ awɔ bɩrɛ, tɩyɛra dɩ tɛ tɩ> fɔ alan, <Aburuburu ɩ lɛ, adɩrɛ-adɩrɛ ɩ̀ sa gama. 11Miinte e tola yɩ ditola ma ɔdʋrɔ, mɔ nmɩ nan yɛ dàà biri mɛ ɔdʋrɔ fɩya. Miinte ɛ ka gɛ binyanibi ɛ lanla yɩ, mɔ nmɩ bɩrɛ, nan ka gɛ bikpemani n lanla yɩ.> >>
12Awi asiyee yɩɩ gama fɔ, Yerobwam ma bɛnɩ fɔ powu be biri bɛ san Rehobwam wakʋn, anlɛ gɛtɛ egyu-dɩrɛ ɛ fʋrʋma ɛ dɔ̀ bɛ fɔ. 13Egyu-dɩrɛ ɛn ka wɔ bɛndɩrɛbi baamɩnlɛ gɛtɛ bɛ tɛ wɔ fɔ, ɛ ŋmanyan bɛ gɛ. 14Ɛ ka gɛ bɛsaranyanbi fɔ baamɩnlɛ gɛtɛ bɛ tɛ wɔ̀ fɔ, gɛ ɛ dɔ̀ bɛ alan, <<Miinte e tola yɩ ditola ma ɔdʋrɔ, mɔ nmɩ miinyo daà nɩ da woyo fɔ. Miinte ɛ ka gɛ binyanibi ɛ lanla yɩ, mɔ nmɩ nan ka gɛ bikpemani n lanla yɩ.>>
15Okoro egyu-dɩrɛ fɔ ɛn nʋn bɛnɩ fɔ baakʋn, yema ade gɛtɛ i sere lɛ i ye gɛ Yahwe wakʋn, fɔ wàà yɛ Yahwe wade gɛtɛ ɛ dama Silon-te Ahiya wo koro ɛ tabʋrʋ ɛ tɛ Nebati wobi Yerobwam fɔ yàà ba waanɩ.
16 #
2 Sa 20:1
Gɛtɛ Isareli bete powu be we gɛtɛ egyu-dɩrɛ ɛn nʋn baakʋn fɔ, bɛ dɔ̀ wɔ alan,
<<Anʋn gɛ ɛtɩ ma Dafidi wɔnana tɩ̀ ba?
Anʋn gɛ taà wura ti ye Yese wɔnana fɔ wakʋn?
Oo Isareli bete, ɩ san yaakwo yaanɩ!
Dafidi wɔnana, kpà ma aa dɩkpaara!>>
Okoro Isareli bete fɔ bɛ da baakpaara yaanɩ. 17Mɔ Isareli bete gɛtɛ bè si Yuda watele yaanɩ fɔ bɩrɛ, Rehobwam ee di bugyu ɛ tɛ bɛ.
18Ɛwʋ gɛ egyu-dɩrɛ Rehobwam ɛ sa Adoniram, gɛtɛ nafɔ ɛɛ nya dɩkpankpasan dɩɩ gʋtʋn gii koro fɔ Isareli bete baakʋn, mɔ Isareli bete be fun wɔ ataa be wolo. Wʋ ba gɛlɛ fɔ, egyu-dɩrɛ Rehobwam ɛ mɛ bilen e gyu wotiiramisan wanɩ gɛ e serenti ɛ da Yerusalem. 19Okoro Isareli bete bɛ tɔ be yela Dafidi dɩkpaara dii koro bè sere ma ǹdò.
اکنون انتخاب شده:
2 Ɩya-ɩya 10: ADE
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Ghana Institute of Linguistics Literacy and Bible Translation