1 Begyu-dɩrɛ 3
3
Solomon e tiri onyun ɛ fɔ gɛsɛyɩ
1Solomon ɛ mɛ onyun-kɩlɩn ma Egyipiti wogyu-dɩrɛ Farawo, gɛ e to wobi-nanɩbi gɩna. Ɛ ka wɔ ɛ ba Dafidi Ditele fɔ daanɩ, ka ma sere ɔya gɛtɛ e sere wo digyukpaara, ma Yahwe Dikwo-dɩrɛ, ma ɔpɔrɩ e silin Yerusalem ditele fɔ e were. 2Ɔkʋna wʋtɔkɔ waanɩ fɔ, Isareli bete bɛ̀ sangba bɛɛ tɛ gɛ gedi asʋmakʋn-kperen-kperen yaanɩ, yema waanɩ fɔ, ben te sere Dikwo-dɩrɛ Yahwe diyere daanɩ.
3Solomon e len Yahwe wade gepepe, gɛ ɛ san wote Dafidi wo-isele yaanɩ. Mɔ fɔ ɛwɔ mɔ ɛɛ tɛ gedi, ma olifwi gekuma gii gedi, asʋmakʋn yaanɩ. 4Egyu-dɩrɛ ɛ san Gibeyon ditele ɛ ma tɛ gedi, yema dʋkɔ n di gedi gɩɩ gɛtɛ̀kʋn-dɩrɛ. Gɛ Solomon ɛ ka bɛnan ɛ tɛ gekuma gii gedi kpekpesi gedi gɩɩ gɛtɛ̀kʋn gɩtɔkɔ gii koro. 5Ɔkʋna gɛtɛ Solomon ɛ̀ sa Gibeyon fɔ Yahwe e tiri koro e wùlà wɔ okute waanɩ odente, gɛ ɛ dɔ̀ wɔ alan, <<Lila gɩnyan gɛtɛ à len nan mɛ n tɛ wɔ̀.>> 6Gɛ Solomon e tiri wuunyun alan, <<A tiri aa gelen-dɩrɛ a wùlà aasaranyan, miinte Dafidi yema e to wɔ e di gɛ e di nʋnkwarɩ ɛ tɛ wɔ gɛ wade powu ɩ tʋna aa bʋnʋn. Gɛlɛ wuu gelen-dɩrɛ fɔ gaanɩ ke gɛ a ka mɩ a tɛ wɔ gɛtɛ nan sara wo gigyu-bɩya fɔ gii koro ǹdò wuu duwi lɛ. 7<<Nkele, Oo! Yahwe, miin Wurubwarɛ, a sɩ̀ nmɩ aasaranyan bugyu a sere miinte Dafidi gɩsɩrɩ, mɔ ǹ di gɛ ebi, gɛ mɩɩn nyɩ̀ anlɛ gɛtɛ nan ka n ton miin bugyu fɔ. 8Nya, nmɩ aasaranyan n sa ma bɛnɩ gɛtɛ awɔ gbagba a tiri a mɛ aayo ɛbɛ fɔ. Be di bɛnɩ dɩtɩnpan gɛtɛ ɛkɩ ɛn talɩ ɛ kalan. 9Okoro tɛ nmɩ aasaranyan gɛsɛyɩ gɛtɛ nan ka n ton bugyu fɔ ma buusele n tɛ aa bɛnɩ, fɔ nan talɩ n we ade-kpen ma ade-kpara n nyɩnla. Nka gɛlɛ fɔ, ɛnyan nan talɩ e gyegeye aa bɛnɩ dɩtɩnpan nyadɩ dɩɩ bʋnʋn?>>
10Gɛ wʋ mɛ Yahwe ɔsɛ gɛtɛ Solomon e lila ade nyayɩ. 11Okoro Wurubwarɛ ɛ dɔ̀ wɔ alan, <<Gɛtɛ ade nyayɩ gɛ a lila, gɛ an lila nkpa ma ɔfɔ, abɛɛ koro gaanyan, abɛɛ aa bɛkyʋnlɛ boo diku, mɔ a lila gɛ gɛsɛyɩ, ma ade-yɩɩ-gɛkɛrɛ-nya, ma anlɛ gɛtɛ aà ka a dɔ̀ gɔdɔ ma giisele okoro, 12nan mɛ ade gɛtɛ a lila fɔ. Nya, nan tɛ wɔ̀ gɛsɛyɩ, ma gɛkɛrɛ-ade-nya, gɛtɛ ɛkɩ en wura gaakɩ nya, gɛ ɛkɩ ɛn nan wura gaakɩ. 13Gɛ nan biri n fɩya wɔ̀ anyan gɛtɛ an lila gba. Nan tɛ wɔ̀ gɩkyɩnyɩn ma gebù gɛtɛ aa nkpa awi powu yaanɩ fɔ egyu-dɩrɛ ɛkɩ ɛ̀ nan talɩ ɛ kɛrɛ ma awɔ. 14Gɛ gengyi à san mii-isele yaanɩ, gɛ à bu maade-wùlàlɛ ma mii-ise anlɛ gɛtɛ aate Dafidi ɛ mɛ fɔ, nan tɛ wɔ̀ nkpa ma ɔfɔ.>>
15Ɛwʋ gɛ Solomon ɛ lama, gɛ e we gɛtɛ wù di gɛ okute. E biri ɛ san Yerusalem, gɛ e yela Yahwe Dikola dɩɩ dɩdaka fɔ dɩɩ bʋnʋn, gɛ ɛ tɛ gekuma gii gedi ma olila wuu gedi, gɛ ɛwɔ ma wɔ bɛndɩrɛbi powu be di ɔsɛ-dɩrɛ.
Solomon ɛ ka gɛsɛyɩ ɛ dɔ̀ gɔdɔ ma giisele
16Duwi dɩkɩ fotoli bɛnanɩ bɛnyɔɔ bɛkɩ be be yela egyu-dɩrɛ bʋnʋn. 17Gɛ baanɩ ɛkɩ ɛ dɔ̀ alan, <<Miinfonte, nmɩ ma ɛnanɩ nyawɔ n sa dikwo-kɩlɩn daanɩ. Na wo ebi ɔya gɛtɛ ɛwɔ mɔ ɛ̀ sa dikwo fɔ daanɩ. 18Gɛtɛ na wo miinbi wʋʋ duwi-siyeefɛ fɔ, ɛwɔ mɔ e wo. Tɩɩ bɛnyɔɔ n sa dikwo fɔ daanɩ, ɛkɩ ɛn ma fɩya ma ɛtɩ. 19<<Gɛ odente fɔ, ɛnanɩ nyawɔ wobi e ku, yema ɛ dʋrɔ wo koro. 20Ɛwʋ gɛ ɛ tɔ odente wuu getite, gɛ ɛ ka miinbi fɔ e ye maakʋn, ɔya gɛtɛ nmɩ, aasʋgʋgyan na fwa bʋda fɔ. Ɛ ka miinbi fɔ ɛ dʋrɔ wɔ bɩlan baanɩ, gɛ ɛ ka woyo ekulɛ fɔ ɛ sɩ̀ mɩɩn bɩlan baanɩ. 21Gɛtɛ na lama gagyɩgyan nan tɛ miinbi dɩnyʋn fɔ, na we gɛtɛ e ku. Mɔ gɛtɛ na nya wɔ gepepe fɔ, na we gɛtɛ nka miinbi gɛtɛ na wo fɔ wɔ lɛ.>>
22Mɔ ɛna-do fɔ, alan, <<Kpakpaakpa, ebi gɛtɛ ɛ̀ sa nkpa fɔ, è di miinyo, gɛ ɛwɔ gɛtɛ e ku fɔ è di gɛ aayo!>>
Mɔ egyegeyelɛ fɔ alan, <<Kpakpaakpa, ebi gɛtɛ e ku fɔ, è di aayo, gɛ miinyo n si nkpa fɔ!>>Gɛ bɛ ka be gyu getiira egyu-dɩrɛ bʋnʋn.
23Ɛwʋ gɛ egyu-dɩrɛ ɛ dɔ̀ alan, <<Ɛwɔ nyawɔ ɛɛ dɔ̀ alan, <Miinbi n sa nkpa fɔ, gɛ aayo na ku fɔ,> gɛ edo mɔ ɛɛ dɔ̀ alan, <Kpakpaakpa, aabi na ku, gɛ miinbi n sa nkpa fɔ.> >>
24Gɛ egyu-dɩrɛ ɛ dɔ̀ alan, <<Ɩ ka tata ɩ tɛ mɩ!>> Gɛ bɛ ka tata bɛ mɔma egyu-dɩrɛ. 25Gɛ egyu-dɩrɛ ɛ dɔ̀ alan, <<Yo ebi gɛtɛ è si nkpa fɔ ifèn ɩnyɔɔ, fɔ àà ka ofen wuukɩ tɛ ɛkɩ, fɔ àà ka ofen-do mɔ tɛ edo fɔ mɔ.>> 26Gɛ wʋ mɛ ɛna gɛtɛ wobi ɛ̀ sa nkpa fɔ gutunkoro, gɛ ɛ dɔ̀ egyu-dɩrɛ alan, <<Oo, Miinfonte, ka ebi gɛtɛ ɛ̀ sa nkpa fɔ tɛ wɔ, kara wolo wɔ!>>
Mɔ ɛna edo fɔ ɛ dɔ̀ alan, <<Nmɩ oo, awɔ oo, taanɩ ɛkɩ ɛn nan wura ebi fɔ. I yo wɔ akpen anyɔɔ.>> 27Okoro egyu-dɩrɛ ɛ dɔ̀ alan, <<Ɩ ka ebi gɛtɛ ɛ̀ sa nkpa fɔ ɩ tɛ ɛna-gyangbasɛlɛ fɔ. Ɩ kara wolo wɔ, ɛwɔ n di wɔna.>> 28Gɛtɛ Isareli bete powu bɛ nʋn egyu-dɩrɛ gɔdɔ gɛtɛ ɛ dɔ fɔ, bɛ ka gebù-dɩrɛ bɛ tɛ wɔ, yema be we gɛtɛ Wurubwarɛ gɛsɛyɩ gɛ ɛ ka ɛ dɔ̀ gɔdɔ fɔ ma giisele.
اکنون انتخاب شده:
1 Begyu-dɩrɛ 3: ADE
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Ghana Institute of Linguistics Literacy and Bible Translation