1 Begyu-dɩrɛ 15
15
Yuda wogyu Abiya
1Egyu-dɩrɛ Yerobwam wo bugyu buu gedi wʋʋ gɩkyan fwo nɩyɛfɛ gaanɩ fɔ, Nebati wobi Abiya e di bugyu Yuda. 2E di bugyu Yerusalem bɩkyan besiyee. Wɔna diyere n di Maaka, gɛtɛ è di Abisalom wobi-nanɩbi fɔ. 3Ɛ mɛ ade-kpen powu gɛtɛ wote ɛ sara gɛ ɛ mɛ fɔ, gɛ ɛn ka woturu powu tɛ Yahwe, wo Wurubwarɛ, anlɛ gɛtɛ wotu Dafidi ɛ mɛ fɔ. 4Mɔ Dafidi wo koro fɔ, Yahwe gɛtɛ è di wo Wurubwarɛ fɔ, ɛ tɛ Abiya ebi-teni gɛtɛ eè be di bugyu e sere wɔ gɩsɩrɩ Yerusalem, fɔ Yerusalem ditele dàà wura yela dɩɩ bɩsɩrɩ buu koro. 5Yema Dafidi ɛ mɛ ade gɛtɛ ɩ̀ tʋna Yahwe bʋnʋn, gɛ en kere Yahwe wo-ise yii koro yii gedi ya wɔ nkpa awi powu yaanɩ, Hiti-te Uriya woyo fɔ wuuko.
6Akpa gɛtɛ ɩ sara Rehobwam ma Yerobwam boo getite fɔ, ɩ bɔ ɩ kyaga ma ye Abiya wɔ nkpa awi powu yaanɩ. 7Gɛ bɛ ŋwara Abiya wade-mɛlɛ kurumakyɛɛ ma wo bugyu buuyo powu bɛ sa Yuda begyu-dɩrɛ bɔɔ gɩkpa fɔ gaanɩ. Akpa i sere Abiya ma Yerobwam boo getite ɩ nya. 8Abiya e ku gɛ be lò wɔ ɔkʋn gɛtɛ bee kpèlè Dafidi Ditele fɔ daanɩ. Gɛ wobi Asa e di bugyu e sere wɔ gɩsɩrɩ.
Yuda wogyu Asa
9Isareli wogyu Yerobwam gɩkyan dikpilinfɛ gaanɩ fɔ, Asa ɛ bɛ mɛ Yuda wogyu. 10Gɛ e di bugyu Yerusalem anɩ bɩkyan akpilin anyɔɔ ma dɩkɩ (41). Wonu diyere n di Maaka gɛtɛ è di Abisalom wobi-nanɩbi fɔ.
11Asa ɛ mɛ ade gɛtɛ ɩ̀ tʋna Yahwe bʋnʋn, anlɛ gɛtɛ wotu akpɩn Dafidi ɛ mɛ fɔ. 12E tiri beteni gɛtɛ bɛɛ mɛ afotoli-de fɔ powu e ye gɛtʋnkwaa fɔ gaanɩ, gɛ e tiri bekpen-maralɛ, gɛtɛ wotu ɛbɛ bɛ mɛ fɔ powu. 13E tiri wonu Maaka gba gɛtɛ en mini di egyu-nanɩ, yema e sere ekpen Asera woyon. Asa e kebi wʋ ɛ fɩna gɛ e kuma wʋ Kidiron dɩtagba daanɩ. 14Ma gɛtɛ ɛn mɩna bekpen baasʋmakʋn idon yii koro gba fɔ, Asa ɛ ka woturu powu ɛ tɛ Yahwe wɔ nkpa wawi powu yaanɩ. 15Ɛ ka sɩka-fututu, ma sɩka-sɩya, ma anyan gɛtɛ ɛwɔ ma wote bɛ ka bɛ tɛ Yahwe fɔ, ɛ ba Yahwe Dikwo-dɩrɛ fɔ daanɩ.
16Gɛ akpa ɩ sara Asa ma Isareli wogyu Baasa boo getite ɔya powu gɛtɛ be di bugyu fɔ. 17Isareli wogyu-dɩrɛ Baasa ɛ ma kpà ma Yuda, gɛ e sere ɔpɔrɩ e silin Rama ditele, gɛtɛ ɛkɩ ɛn talɩ e gyu, gɛ ɛkɩ ɛn talɩ e ye Yuda wogyu Asa gɛtʋnkwaa gaanɩ.
18Ɛwʋ gɛ Asa e kpila sɩka-fututu, ma sɩka-sɩya gɛtɛ wu kuruma Yahwe Dikwo-dɩrɛ, ma wo digyukpaara fɔ daanɩ. Ɛ ka ɛ sa wɔ bɛndɩrɛbi baalɔ yaanɩ, gɛ ɛ sa bɛ Tabirimon wobi Ben-Hadadi gɛtɛ wotu n di Esino gɛtɛ è di Aram wogyu, gɛ ee di bugyu Damasiko fɔ wakʋn. 19Ɛ dɔ̀ alan, <<Yɛ nmɩ ma awɔ taà ta dikola, anlɛ gɛtɛ aate ma miinte bɛ sara fɔ. Nya n de sɩka-fututu ma sɩka-sɩya n tɛ tɩyɛma wɔ̀, fɔ àà kebi dikola gɛtɛ a ta ma Isareli wogyu Baasa fɔ, fɔ èè kere bɩtà bʋʋ gɛtà ma nmɩ ɛ ya.
20Ɛwʋ gɛ Ben-Hadadi e yera egyu-dɩrɛ Asa wade fɔ, gɛ ɛ sa wɔ bɩtà bʋʋ bɛndɩrɛ Isareli watele-dɩrɛ-dɩrɛ yaanɩ. Gɛ e gye Iyon, ma Dan, Abeli-Beti-Maaka, ma Kinereti fɩya ma Nafitali ntʋnkwaa powu bɩtà. 21Ɔya gɛtɛ Baasa ɛ nʋn ade nyayɩ fɔ, e kere Rama ditele dɩɩpɔrɩ fɔ wuu gesere ɛ ya, gɛ ɛ ma sara Tirisa. 22Gɛ egyu-dɩrɛ Asa ɛ yɛ be gbɛrɛ digbongbo bɛ tɛ Yuda bete powu. En tiri ɛnɩ-kɩlɩn ye waanɩ, gɛ bɛ ma tola ataa, ma iyon atoo-atoo, gɛtɛ Baasa è de ee sere ɔpɔrɩ e silin Rama ditele fɔ, gɛ egyu-dɩrɛ Asa ɛ ma ka yɩ e sere Geba ma Misipa atele Benyamin gɛtʋnkwaa gaanɩ.
23Okoro bɛ ŋwara Asa wade-mɛlɛ powu wo bugyu buu gedi gaanɩ, ma wɔkɛma waade, ma atele-dɩrɛ gɛtɛ e sere powu, bɛ sa Yuda begyu-dɩrɛ bɔɔ gɩkpa fɔ gaanɩ. Mɔ wɔ ditenikwaa daanɩ fɔ, e be wura bɩsɩrɩ buu geyeba. 24Ɛwʋ gɛ Asa e ku gɛ be lò wɔ wote ɛbɛ bɔɔ dɩtaa-fwe daanɩ, ɔkʋn gɛtɛ bee kpèlè Dafidi Ditele fɔ daanɩ. Gɛ wobi Yehosafati e di bugyu e sere wɔ gɩsɩrɩ.
Isareli wogyu-dɩrɛ Nadabi
25Yuda wogyu-dɩrɛ Asa gɩkyan-nyɔɔfɛ gaanɩ gɛ Yerobwam wobi Nadabi e di bugyu Isareli. Gɛ e di bugyu Isareli bɩkyan bʋnyɔɔ. 26Nadabi ɛ mɛ ade gɛtɛ ɩn tʋna Yahwe bʋnʋn, gɛ ɛ tɛrɛma wote wo-isele, gɛ ɛ yɛ Isareli bete bɛ mɛ ade-kpen.
27Ahiya wobi Baasa gɛtɛ e ye Isaka wofoli waanɩ fɔ, ɛ sa amɩnlɛ-kpen Nadabi wo koro, gɛ e wolo wɔ Gibeton, gɛtɛ wù di Filisiti bete boo ditele-dɩrɛ fɔ ɔkʋna gɛtɛ Nadabi ma Isareli bete powu be silin Gibeton be tuma fɔ. 28Okoro Baasa e wolo Nadabi, Yuda wogyu Asa gɩkyan-siyeefɛ fɔ gaanɩ, gɛ Baasa e di bugyu e sere wɔ gɩsɩrɩ.
29Gɛtɛ ɛ bɔ e di bugyu fɔ, e wolo Yerobwam dɩkpaara dɩɩ bɛnɩ powu. En kere ɛnɩ-kɩlɩn ya nkpa, mɔ e muru dɩ powu anlɛ gɛtɛ Yahwe ɛ dama wɔsaranyan Silo-te Ahiya wo koro ɛ dɔ̀ fɔ. 30Yema ade-kpen gɛtɛ Yerobwam ɛ mɛ, gɛ ɛ yɛ Isareli bete mɔ bɛ mɛ, gɛ wʋ sa Yahwe, Isareli bete boo Wurubwarɛ owurufa fɔ wuu koro.
31Ade-kurumakyɛɛ gɛtɛ Nadabi ɛ mɛ wo bugyu buu gedi gaanɩ, ma ɛyɩ powu gɛtɛ ɛ mɛ fɔ, bɛ ŋwara yɩ bɛ sa Isareli begyu-dɩrɛ bɔɔ gɩkpa-dɩrɛ fɔ gaanɩ. 32Akpa ɩ sara Asa ma Isareli wogyu Baasa boo getite boo bugyu buu gedi wʋʋya powu waanɩ.
Isareli wogyu Baasa
33Yuda wogyu-dɩrɛ Asa gɩkyan-siyeefɛ gaanɩ gɛ Ahiya wobi Baasa e di bugyu Isareli gɩfɩɩ gaanɩ. Ɛ sara Tirisa ditele daanɩ e di bugyu fɔ bɩkyan dikpilin ma bɩnaa. 34Ɛwɔ mɔ ke ɛ nɩ mɛ ade-kpen Yahwe bʋnʋn, gɛ ɛ tɛrɛma Yerobwam wo-isele, ma wade-kpen gɛ ɛ yɛ Isareli bete mɔ bɛ mɛ ade-kpen.
اکنون انتخاب شده:
1 Begyu-dɩrɛ 15: ADE
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Ghana Institute of Linguistics Literacy and Bible Translation