Zakaliya 9
9
Toza kwa maisi ga pakwegera
1Mtuwa Mlungu kayoweriti hangu kwa.
Isi ya Hadraki na Damasku. Mana isi ya Aramu ndo yakuyi Mtuwa Mlungu, viraa na makabila goseri ga Israeli. 2Wantu wa Hamati yawapakana na Hadraki, ntambu iraa wantu wa Tiru na wantu wa Sidoni tembera waliwona wana luhala nentu. 3Wantu wa mji gwa Tiru walinyawiriti liboma ligangamala na gulimamatilira feza gambira lidikudiku na zahabu gambira ushafu wa mumitaa. 4Kumbiti Mtuwa Mlungu hakamwusiliri lunda zakuyi na kuuwagamiziya uwezu wakuyi wa meli na mji hakagulunguziyi kwa motu.
5Wantu wa mji gwa Ashkeloni hawagawoni aga na kutira na mji gwa Gaza hagugalagati kwa utama, ata wantu wa Ekroni litumbiru lyakuyi haliwuki. Mji gwa gaza hagumwagamiziyi mfalumi gwakuyi na Ashikeloni hapeni walikali wantu. 6Wahenga hawalikali mji gwa Ashidodi na neni hanigwagamiziyi mji gwa Wafiristi. 7Hapeni mlii vinofu vyana mwazi na shiboga yashilaviyitwi tambiku. Masigala hawaweri waneni, gambira lukolu lumu mu Yuda. Wantu wa Ekroni hawaweri gambira Wayebusi 8Naneni haniyiloleri isi yangu, handeweleri mashonta nagapita amu. Na kwahera muntu yakawatabisiya kayi wantu waneni, toziya mona ntambu yawatabikiti.
Kwiza kwa mfalumi
9Mwee wantu wa Sayuni mnemeleri!
Mwee wantu wa Yerusalemu mbotangi!
Mloli mfalumi gwenu kankuwizira!
Kakwiza kwa kufyapilira na ukanka,
mnanaga na kakwena punda,
mwanapunda shananguta sha punda.
10Hambusiyi mbutuka za nkondu muisi ya Israeli,
na farasi wa nkondu kulawa Yerusalemu,
na upindi wa nkondu hawumegwi.
Hakabweri ponga kwa maisi,
ukolamlima wakuyi haweneyi kulawa bahari mpaka bahari
na kulawa lushemba Eufrati mpaka upeleru wa pasipanu.
Kuwuziwa kwa wantu wa Mlungu
11Mtuwa Mlungu kalonga hangu,
toziya ya mwazi gwa lipatanu lyangu na mwenga,
haniwatuli lekeru watatirwa waku,
walawi mulilindi lyahera mashi.
12Muwuyi muisi yenu,
mwenga watatirwa yamwana litumbiru,
ata vinu mbwera.
Haniwawuzilirani maheri kawili.
13Hanimtenderi Yuda handa upindi wagu,
na Israeli nimtenda handa msali gwangu.
Gwee Sayuni! Wantu waku haniwatenderi handa ligumba,
kuwakomanga wantu wa Ugiriki,
hawaweri gambira ligumba lya shikambaku
14Mtuwa Mlungu hakawalawiri wantu wakuyi,
hakagumi misali yakuyi gambira lumeta.
Mtuwa Mlungu hakagombi lipenka,
hakasoki pamuhera na lipuga lya kusika.
15Mtuwa Mlungu yakana makakala goseri hakawaloleri wantu wakuyi,
na womberi hawawagamiziyi wankondu wawu.
Hawabotangi munkondu gambira yawalowera
Hawiti mwazi gwa wankondu wawu,
hayinyinyiriki handa mwazi gwa tambiku mubakuli
gwawitiriki pashitalawanda sha mabuhi.
16Shaka ashi Mtuwa Mlungu gwawu hakawalopoli,
toziya womberi ndo kondolu wakuyi,
na womberi hawang'ereng'eti muisi yakuyi
gambira mabuwi ga beyi nkulu mulijenjeri
17Wantu awa hawaweri waherepa.
Wantemba hawaweri na makakala pawaliya libumunda na wahinga hawaweri na makakala pawalanda divayi ya syayi.
The Bible version in the Pogoro Language. @The Word for The World International and Pogoro Language translation. All rights reserved.