Zakaliya 10
10
Mlungu kalongiti hakajegi ukombola
1Mumluwi Mtuwa Mlungu kawapanani mvula shaka viboga pavifira mvula. Mtuwa Mlungu ndo yakajega mawudi ga mvula, kawapanana wantu mvula za lufolufolu na kutenda vimeru viherepi mumalambu kwa woseri. 2Vinyagu vya wamlungu wawu viwajegera kutira, watunga wawu wutunga mpayu, watambika wawu watunga mpayu. Su wantu awa wayerayera gambira kondolu yawahera muntu gwa kuwalolera.
3Mtuwa Mlungu kalonga hangu, nana maya kwa walolera wa wantu wangu na haniwakomangi walonguziya awa. Neni Mtuwa Mlungu gwa mashonta hanishiloleri shipinga shangu, sha lukolu lwa Yuda. Haniwatendi kuwera farasi wangu wagangamala munkondu. 4Kulawa kulukolu lwa Yuda hakulawiri mkolamlima yakana makakala gambira libuwi likulu lya liyanjiru, yakawera mgangamala handa shimbangatuwa sha liringu, kana makakala handa upindi wa nkondu. 5Wantu wa Yuda hawaweri gambira vikambaku munkondu, hawawatimbangi wankondu wawu mulidiku munjira. Hawalikomangi toziya neni Mtuwa Mlungu na pamuhera nawa, womberi hawawakanki wakwena farasi.
6Wantu wa Yuda haniwagangamaziyi,
haniwalopoli wiwuka wa Israeli.
Haniwawuziyi mkaya mwawu
toziya niwawonera lusungu
na womberi hawaweri wantu wa neni.
Mana neni ndo Mtuwa Mlungu gwawu na haniwankuli maluwa gawu.
7Wantu wa Israeli hawaweri na makakala,
mioyu yawu hayinemeleri gambira wantu yawalanditi divayi.
Wiwuka wawu hawawoni na kunemelera,
na hawanemeleri toziya ya aga Mtuwa Mlungu yakagatenditi.
8Haniwashemi wantu wangu
na kuwajojonira pamuhera.
Haniwakomboli
na womberi hawaweri wavuwa nentu gambira makashu.
9Tembera niwapalasiyiti mumaisi gamonga
kumbiti hapeni wandyaluwi neni.
Womberi na wana wawu hawaweri wakomu,
na kuwuya Israeli.
10Haniwawuziyi kulawa Misri
na kuwajojonira kulawa Ashuru.
Haniwajegi muisi ya Gileadi na Lebanoni,
na hawaweri wavuwa nentu muisi.
11Pawapita mumakupala ga mashi,
neni haniganyamaziyi makupala gakuyi,
na matiwa ga mashi ga lushemba Naili hagayumi.
Mtiti gwa Ashuru hagusulusiwi
na makakala ga Misri hagagamili.
12“Haniwagangamaziyi wantu wangu,
womberi hawanguwiri na kunjimira neni.”
Ntakula neni Mtuwa Mlungu.
The Bible version in the Pogoro Language. @The Word for The World International and Pogoro Language translation. All rights reserved.