Zakaliya 8
8
Mtuwa Mlungu kalongiti hakanyawi kayi Yerusalemu
1Mtuwa Mlungu kayoweriti na neni pakalonga. 2“Nana weya nentu kwa Sayuni, weya yawera nawu unjegera maya. 3Ali ndo lyakatakuliti Mtuwa Mlungu. Hambuyi Sayuni na kulikala Yerusalemu. Shakapanu Yerusalemu hagushemwi mji gwa nakaka, lugongu lwa Mtuwa Mlungu Yakana Makakala Goseri, halushemwi Lugongu Lwa Mlungu. 4Neni Mtuwa Mlungu gwa Mashonta ntakula. Wazewi hawawoneki kayi walikala munjira za Yerusalemu, kila yumu na luhonga lwakuyi, toziya ya kulikala vinja vivuwa. 5Njira za mji hazimemi wantemba na wahinga pawashiniga amu.”
6“Mtuwa Mlungu yakana makakala goseri ntakula. Iwoneka shintu shashiwezekana ndiri kwa wantu yawasigaliti, kumbiti kwa neni iwezekana ntakula neni Mtuwa Mlungu. 7Mtuwa Mlungu yakana makakala goseri kalonga. Hawaniwalopoli wantu wangu kulawa isi ya kwagulawa mshenji na kulawa isi ya kwaguzyeta mshenji, 8na kuwatenda walikali mji gwa Yerusalemu. Womberi hawaweri wantu wangu na neni haweri Mlungu gwawu na hankolimlima kwa waminika na ntambu yayifiruwa.”
9Mtuwa Mlungu yakana makakala goseri katakula hangu, “Mulikoli mawoku! Vinu su mvipikaniri visoweru vyeni mbweleritwi na wambuyi yawaweriti shaka palitulitwi liyanjiru lya Numba yangu papanyawa syayi. 10Pamberi pa shaka ashi, paweriti ndiri na shibena mgongu ama wankanyama. Kwahera muntu yakaweziti kutenda lihengu lyakuyi kwa poneka toziya ya wankondu wakuyi, su nimtenda kila muntu mnkondu kwa wapakwegera wakuyi. 11Kumbiti vinu hapaniwatenderi wantu wa isi ayi gambira makashu, Neni Mtuwa Mlungu yakana makakala goseri ntakula. 12Vinu hanjegi kayi ponga muisi na mvula hayitowi gambira ntambu yakuyi, litapaka halilaviyi viboga na mizabibu hayileli nentu. Haniwapanani wantu awa wa isi ayi goseri aga gaweri gawu. 13Mwenga wantu wa Yuda na Israeli! Mushaka shashipititi mwenga muwonekaniti kuwera wantu yampangilitwi pakati pa maisi. Kumbiti vinu neni haniwalopoli, namwenga hamuweri wantu yawatekelerwitwi. Su namtira, muligangamaziyi.”
14Mtuwa Mlungu yakana makakala goseri katakula hangu, “Ntambu yanfiriti kuwantendera mwenga makontola, toziya ya wazewi wenu wankalaziyiti nentu, naneni niwakomanga, 15Shakapanu mpanga kugutendera maheri mji gwa Yerusalemu na wantu wa Yuda. Su namtira. 16Shanfira kutenda ndo ashi. Kila yumu gwenu na kamgambiri myaguyi nakaka. Na wakulu watozi ntambu yayifiruwa. 17Muntu yoseri muwamu mwenu nakafira kutenda makontola kwa myaguyi, ama namlirapa mpayu, toziya nigalema nentu matendu aga. Neni Mtuwa Mlungu ntakula.”
18Mtuwa Mlungu yakana makakala goseri kayoweri kayi na neni pakalonga. 19“Mashaka ga kwoya kuliya ga mwezi gwa msheshi na mwezi gwa mhanu na gwa saba na gwa lirongu hagaweri ga nemeleru na kufyapilira, hayiweri misambu ya sheleku kwa wantu wa Yuda. Mfiri ponga na nakaka.”
20Mtuwa Mlungu yakana makakala goseri katakula hangu, “Wantu wavuwa wa maisi ga shihenga na wenikaya wa miji ivuwa hayizi mjini Yerusalemu. 21Wenikaya wa mji gumu hawawagenderi wenikaya wa mji gumonga na kuwagambira, tugendeni pamuhera kumguwira Mtuwa Mlungu gwa mashonta na kumluwa ntekera! 22Viraavirii wantu wa kabira zimonga na maisi yagana makakala hagizi Yerusalemu kumguwira Mtuwa Mlungu Yakana Makakala Goseri na kumluwa tekelera. 23Mtuwa Mlungu yakana makakala goseri kalonga hangu, wantu lirongu kulawa maisi ga kila luga hawambatiliri Myahudi yumu na kukola nguwu yakuyi na kumgambira, tufira kugenda pamuhera na mwenga, toziya tupikanira kuwera Mlungu kapamuhera na mwenga.”
The Bible version in the Pogoro Language. @The Word for The World International and Pogoro Language translation. All rights reserved.