Zakaliya 11
11
Kuguwa kwa ukolamlima mngesera
1Mwee wantu wa Lebanoni mvuguli migomi yenu,
su motu gulunguziyi miyerezi yaku!
2Gwee mtera gwa misunobari mdayi
toziya mtera gwa miyerezi ilungulira,
mitera ayi mitali ihalibisiwa!
Gwee mtera gwa mialoni ya Bashani, su mdayi
toziya lidowi likulu lihengwa!
3Su gupikaniri umatu wawalolera nkanyama,
maliwuziwu gawu galunguziwa!
Gupikaniri kuguguma kwa simba,
ntundu yalushemba Yoridani ihalibisiwa!
Walolera nkanyama wawili
4Mtuwa Mlungu gwangu katakula hangu, “Gulitendi mlolera gwa kondolu weni wagenda kulikitulwa. 5Wahemera wawu wawalikitula na kwahera yoseri gwa kuwakomanga. Na washuwuzi wawu watakula, tulongi mayagashi kwa Mtuwa Mlungu! Vinu tulunda! Ata walolera weniwawawonera ndiri lusungu.”
6Neni Mtuwa Mlungu ntakula kuwera, “Hapeni niwawoneri kayi lusungu wantu wa maisi aga. Haniwatendi wabatwi na wantu wamonga ama mfalumi gwa maisi gingi. Womberi hawayihalibisiyi isi, naneni hapeni nimlopoli muntu yoseri mumakakala aga.”
7Toziya weriti mlolera mheri gwa kondolu yawagenda kulikitulwa, su mpananitwi lihengu na washuwuzi wa kondolu. Shakapanu ntoliti viboku viwili. Shimu nishishemiti “Lusungu” na shimonga “Umu hera.” Ng'enditi kulolera kondolu. 8Mumwezi gumu, niwalagiti walolera nkanyama watatu na shipinga shakondolu shinkalaliriti, naneni ntokiziwa na womberi. 9Su niwagambira, “Hapeniweri mlolera gwenu kayi. Yakafira kuhowa kahowi. Na yakafira kutenduwa katenduwi. Na yawasigala walimemeni weni gweka.” 10Shakapanu ntoliti shiboku shashishemitwi “Lusungu” na kushimega, kulangaziya lipatanu lyakatenditi Mtuwa Mlungu na wantu wakuyi. 11Lishaka lilaari lipatanu ali limegwa. Washuwuzi walii yawaweriti wankundola, wavimaniti kuwera Mtuwa Mlungu kayoweriti kupitira galii gantenditi. 12Shakapanu niwagambiriti, “Pamuwona iherepa mumpanani na pamuwona ndala namumpanana.” Su wandipiti vipandi selasini za feza.
13Shakapanu Mtuwa Mlungu kang'ambira, “Guzituli muluhanja lwa Numba ya Mlungu.” Shibena mgongu ashi shiweriti ndo malipu ga lihengu lyangu. Su ntoliti vipandi selasini avi vya feza na kuvitula mluhanja lwa numba ya Mlungu. 14Shakapanu nilumegiti luboku lwanilushemiti “Umu,” su megiti umu awu pakati pa Yuda na Israeli.
15Mtuwa Mlungu kang'ambira kayi, “Mwanja agu guweri gambira mlolera mzigizigi. 16Su hanimjegi mfalumi gwa syayi gwa kuwalolera wantu, ulii yakalolerandiri wantu waneni, hakaweri gambira mzigizigi, yomberi kawalolera ndiri walii yawana njala ama wadidini yawatenduwa ama yawahera viboga. Kumbiti kawatabisiya gambira mshugaji yakawalaga wakondolu wahelepa. 17Hakashiwoni mlolera nkanyama yakawaleka kondolu wakuyi! Ligumba na lilikituli liwoku lyakuyi na lisu lyakuyi! Mana liwoku lyakuyi hapeni liweri na makakala na lisu lyakuyi liweri lwisi.”
The Bible version in the Pogoro Language. @The Word for The World International and Pogoro Language translation. All rights reserved.