LUKAS 1
1
Pongohono
1-2Lukun sa terhormat, Teopilus Neke tema naan lun-lun sa neau pakai mate gagalo. Ire malayani lukun sara pahampe kabar hiyo lukun deo lun, termasuk taka. Jari, naan deo lun sa kiringo birita hiyo. Deo neke ire brusaha nulis sara piristiwa-piristiwa hiyo haot jari tei antara taka. 3Neke tema birita hiyo, ku haot nyilidik lukun tiliti kongorengne. Jari, ku bipikir asuh amun buku ti tunulis ku lukun taratur dela nu. 4Ku gawi hiyo, de nu yakin kongoreng sa kanalajar tong nu hiyo bujur-bujur tangar.
Kelahiran Yohanes Pembaptis sa dawara
5Tei waktu Herodes jari raja sa nguasa negri Yudea,#1:5 Raja Herodes nguasa kongoreng tane Israel tei uwa pemerentah Romawi lukun Kaisar Julius. naan imam agama Yahudi, sa aranne Jakaria. Ne neke kolompok imam Abia. Ohene baaran Elisabet, lului imam lei, nehiyo lului Harun. 6Jakaria lukun ohene welum bujur tei tama Allah. Ire talalahui tumun kongoreng perentah lukun praturan Tuhan. 7Tapi ire mo tau halu anak gana Elisabet pulu. Nahani, rereh haot tuha.
8Tei isa andrau, kolompok imam Abia halu giliran de malayani tei Blai Allah.#1:8 Blai Allah gin dukuhui Blai Tuhan. Gedung sa gaya ti naan tei kota Yerusalem kusus dela Allah. Blai Allah naan natat sa kinililing tembok. Lun Israel tau bodoa lukun ngokoi persembahan tei natat, tapi kohoi imam sa tau huluk Blai-Ne. Jari, Jakaria gawi tugas jari imam tei tama Allah. 9Ngunau biasa, imam-imam nampi pangantah de nantu hiye sa huluk tong huang Bait Allah, de mapui dupa, lukun Jakaria sa tepewedi. 10Tandring hiyo kongoreng umat simpun tei ongon lukun simihiang. Waktu hiyo nehiyo waktu mapui dupa.
11Maka leha lukun Jakaria erai kulun malaikat Tuhan mindri tei tuhi sanan uneng mapui dupa. 12Jakaria emah lukun bujur takut neau malaikat hiyo. 13Tapi malaikat hiyo kuhui, “Ada takut, Jakaria! Allah haot kiringo doa nu. Ohe nu Elisabet sagar nganak isa nikia laki. Nu harus ngokoi aranne Yohanes. 14Nu sagar begoh bebene. Deo lun lain sagar uma begoh ganane lahir. 15Kon begoh gana nikia hiyo sagar jari lun penting tei tama Tuhan. Ne bujur-bujur mo sagar kinum angur atawa kinum sa lain sa pahamui. Roh Allah sagar talalahui ngilinung ne neke waktu ne eso tei huang sanai inaine. 16Ne sagar gawi deo lun Israel waleng lukun Tuhan, Allah ire. 17Ne sagar hulet samale punguhulet Tuhan. Ne sagar naan sipat lukun kuasa sama ngunau nabi Elia hurap. Ne sagar ngarasih hubungan antara lun tuha lukun anakne. Lun sa mo tumun sagar pinimpinne waleng tong alan sa bujur. Lukun sara hiyo, ne sagar nyiap lun-lun de welum susuai lukun kanakan Tuhan tahui ire sagar siap nirime Tuhan.”
18Libas hiyo Jakaria kuhui lukun malaikat hiyo, “Ku ti haot tuha. Ohe ku haot tuha lei! Ngunau awe ku tau prasaya punguhui nu sagar bujur-bujur jari?”
19Samut malaikat hiyo lukun ne, “Ku ti Gabriel, malaikat sa malayani Allah. Ku haot siningku de bapaner lukun nu lukun pahampe kabar asuh hiyo lukun nu. 20Punguhui ku iroh sagar jari tei waktune. Tapi gana nu mo prasaya hiyo, subujurne nu sagar jari bisu hampe waktune birita hiyo jari.”
21Tandring hiyo, lun deo hiyo iroh rahat kandrei Jakaria. Ire lengon gana ne labih ela neke biasane tei huang Blai Allah. 22Tahui, Jakaria losek tapi mo tau paner lukun ire. Ne kohoi ngokoi siri pakai tangan gana ne bisu. Maka ire tanau ne haot dokokoi peneau tei huang Blai Allah.
23Libas tugas Jakaria haot tupon, ne mudi tong blaine. 24Mo ela libas hiyo, Elisabet, ohene tahui mampung. Elisabet ngurong arepne huang blai kengelane dime ulan. 25Uhui ne, “Tuhan haot peteau kangasuh-Ne lukun ku. Hayak ti ku mo mangan eso gana Tuhan haot ngijin ku jari mampung.”
Malaikat Gabriel mara kelahiran Yesus
26Rahat Elisabet mampung enem ulan, Allah nyingku malaikat Gabriel tulak tong desa Nasaret tei propinsi Galilea. 27Gabriel siningku tong perawan sa baaran Maria. Perawan hiyo haot butunangan lukun Yusup, lun neke lului Raja Daud.
28Malaikat hiyo hulet tong Maria, uhuine, “Keneberkat nu, wawei sa penedi Tuhan! Tuhan naan dayo lukun nu!”
29Kiringo salam malaikat hiyo, Maria emah, pungon, hampe batane-tane huang aheng, “Hiye maksud salam nu ti?” 30Maka malaikat hiyo kuhui lukunne, “Ada takut, Maria, gana Allah kakan ngokoi hal sa asuh tong nu. 31Ringo ti nu sagar mampung tahui nganak nikia laki. Nu harus ngokoi aran ne Yesus. 32Ne sagar jari agung lukun sagar dukuhui Anak Allah Sa Paling Moh. Tuhan Allah sagar pajari Ne raja ngunau Raja Daud, datu nini-Ne. 33Ne sagar merentah jari raja lului Yakub hampe selamane. Kerajaan-Ne mo sagar baahir.”#1:33 Ti janyi Allah sa dokokoi tong Raja Daud tei jaman hurap. Tunulis tei buku 1 Tawarikh 17:10-15.
34Uhui Maria lukun malaikat hiyo, “Tapi ku eso perawan, ngunau awe hal hiyo tau jari?”
35Malaikat hiyo nyamut, “Roh Allah sagar hulet tong nu. Kuasa Allah sagar ngilinung nu. Gana hiyo, nikia sa sagar lahir hiyo sagar dukuhui kudus, Anak Allah. 36Ringo: Elisabet, Jalahan nu ble ne haot tuha, tapi hayak ti rahat mampung. Hurap lun kuhui ne pulu tapi hayak ti ne rahat mampung enem ulan. 37Gana, dela Allah awe naan sa masatahir.”
38Tahui Maria kuhui, “Ku ti siap gawi kanakan Tuhan. Dihene jari lukun ku ngunau sa dukuhui nu.” Tahui malaikat hiyo tulak melah Maria.
Maria tulak musik Elisabet
39Pipire andrau libas hiyo, Maria langsung tulak tong kota tei daerah Yudea sa bobontot-bontot. 40Maria huluk blai Jakaria tahui ne nguhui salam lukun Elisabet. 41Rahat Elisabet kiringo salam hiyo, anak sa tei huang sanaine bagarak. Roh Allah naan tei Elisabet. 42Gana hiyo Elisabet bapaner lukun suara sa pehes, uhuine, “Keneberkat nu labih neke wawei lain. Keneberkat nu anak sa rahat naan huang sanai nu hiyo!” 43Hiye ku ti hampe inai Tuhan hawi tong ku? 44Ku haot tanau hiyo gana tei waktu kiringo punguhui neke nu, nikia huang sanai ku bagarak lukun begoh. 45Keneberkat nu, gana nu prasaya hal sa dukuhui Tuhan lukun nu pasti sagar jari.”
Maria manyanyi nango Allah
46Tahui uhui Maria,
“Jiwaku nango Tuhan Allah.
47Ahengku sanang gana Allah, Panyalamatku.
48Gana, ble ku lun uwa sa malayani Allah,
tapi Ne mo kelot ku.
Malai hayakti kongoreng bangsa,
sagar kuhui bahwa ku keneberkat.
49Gana, Allah Sa Paling Bukuasa gawi hal-hal sa gaya lukun ku. Ne bujur-bujur suci.
50Ne putundru kangasuh-Ne lukun lun sa nyamah-Ne turun-tumurun.
51Ne peteau kuasa-Ne lukun tangan-Ne sa perkasa.
Pinisah-darai-Ne lun-lun sa somong.
52Allah pikinau lun sa bukuasa neke tahta ne.
Tapi lun sa tei uwa, dekengkat Allah jari bukuasa.
53Lun sa lau, pinitimok-Ne lukun kongoreng kangasuh.
Tapi lun sa sugih, kunusir-Ne mo ngokoi ire hiye-hiye.
54Allah kawat bangsa taka Israel sa malayani-Ne.
Ne ingat de putundru kangasuh-Ne lukun taka.
55Hiyo susuai lukun janyi sa dakawi Ne lukun datu nini taka, nehiyo Abraham lukun luluine.
Janyi hiyo tatap naan hampe selamane.”
56Maria muneng dayo Elisabet kikira telu ulan. Libas hiyo, ne mudi tong blaine.
Kelahiran Yohanes Pembaptis
57Waktu de Elisabet nganak haot hampe lukun ne nganak nikia laki. 58Tetangga lukun puloksanai-puloksanaine kiringo birita hiyo, birita kangasuh Tuhan Allah sa gaya lukun Elisabet. Jari, begoh ire dadayo lukun ne.
59Ire kongoreng hulet de uma acara sunat tei waktu doak hiyo haot walu andrau umurne. Kongoreng puloksanai kakan ngokoi aran Jakaria, sama ngunau aran amaine, 60tapi Elisabet, hiyo kuhui, “Ada! Ne harus dokokoi aran Yohanes.”
61Tapi ire nyamut, “Awe naan erai kulun neke puloksanai nu sa baaran hiyo!” 62Tahui, ire ngokoi siri pakai tangan batane lukun Jakaria. Ire kakan tanau aran hiye sa kakan konokoi tong anakne. 63Ne onok de dokokoi alat de ne tau nulis, tahui ne nulis, “Aran doak ti Yohanes.” Kongoreng ire emah. 64Tei hayak hiyo lei Jakaria mo bisu eso. Ne guguhak nango Allah.
65Maka lengon bebene kongoreng lun sa muneng tei sikitarne. Birita kejadian hiyo jari pamaneran kongoreng daerah Yudea sa bobontot-bontot. 66Kongoreng lun sa kiringo hal hiyo batane huang aheng, “Jari hiye nikia ti uni?” Gana kuasa Tuhan kawat nikia hiyo.
Jakaria manyanyi nango Allah
67Libas hiyo, Roh Allah nguasa Jakaria, amai nikia hiyo. Gana hiyo, ne pahampe pesen Allah tentang hiye sa sagar jari. Uhui Jakaria:
68“Ayu taka nango Tuhan, Allah bangsa Israel! Ne haot hulet kawat umat-Ne lukun ngebebas ire.
69Ne nyingku erai kulun Panyalamat sa bukuasa tong bangsa Israel.
Panyalamat hiyo neke lului Raja Daud, hamba Allah.
70Susuai ngunau sa kanajanyi Allah tei jaman hurap,
janyi sa panahampe nabi-nabi sa penedi-Ne.
71Allah nyingku Ne de taka kenebebas neke musuh.
Ne ngebebas taka neke kuasa lun-lun sa gli taka.
72Allah gawi hiyo de putundru kangasuh aheng-Ne lukun datu-nini taka.
Allah nepat janyi-Ne sa suci hiyo.
73-74Janyi-Ne sa dokokoi lukun Abraham, bapak datu nini taka.
Janyi hiyo de nyalamat taka neke kuasa musuh
de taka mo takut nyamah Allah,
75nyamah Ne lukun pokoro arep neke dosa, lukun gawi hal sa bujur tei tama-Ne,
suumur welum taka.”
76Libas hiyo Jakaria kuhui lukun anakne,
“Anak ku, lun-lun sagar kinut nu jari nabi neke Allah Sa Paling Bukuasa.
Gana nu lahir samale Tuhan lahir, de nyiap aheng lun de siap nirime-Ne.
77Nu sagar mara lukun umat-Ne tentang sara ire inuh sanalamat gana dosa-dosa ire kanampun.
78Tuhan taka murah aheng lukun sayang; gunai nyalamat taka Ne hulet. Ngunau mateandrau hawi tei kiat andrau,
79ngunau hiyo lei Ne ngokoi tarawa-Ne lukun kongoreng lun sa welum tei huang mieng lukun takut. Ne ngibiming taka tei alan tong damai sejahtra.”
80Anak Jakaria hiyo batamoh gaya lukun batamoh kuat huang rohne. Ne muneng tei padang gurun hampe ne malai pahampe birita lukun bangsa Israel.
اکنون انتخاب شده:
LUKAS 1: TBDM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Development and Literacy Partners International
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
