लुका 3
3
बप्तिस्मा दिबइया युहन्ना
मत्ति ३:१-१२; मर्कुस १:१-८; युहन्ना १:१९-२८
1रोमि महाराजा तिबेरिअसके राज्य करल पन्दरा बरस होइल रेहे। उ बखत यहुदिया इलाकक् रोमि बन्ना हाकिम पन्तियस पिलातस रेहें, रोमि महाराजक अधिनमे रहिके हेरोद गालिल इलाकामे राज्य करें, आउर उनका भइया फिलिप इतुरिया आउर तराखोनितिस इलाकामे राज्य करें, आउर अबिलेने इलाकामे लुसानियास नाउँके मनइ राज्य करें। 2उ बखत हन्नास आउर कइयाफा सबति बन्ना पुजारि रेहें। तभि उजार जगम जकरियाके लउँरा युहन्नाकेहें परमेस्वर बचन परचार करना हुकुम दहनें। 3युहन्ना यरदन लदियक आँजरपाँजरके सब इलाकामे जाक कहनें, “अपना पापि मन बदलो आउर बप्तिस्मा लेउ तउके परमेस्वर तोइन करल पाप माफ करदिहें।” 4अइसे धरमसास्त्रमे अगम्जानि यसइयक लिखल बात पुरा होइल,
“सुनो, उजार जगम एक जनें चिल्ला-चिल्लाक अइसे कहत आहें,
‘परभु अइना डगर सपारो,
उनका निङ्गना डगर सुधे बनाउ।
5सब खत्ति-खत्ता भँठजाइ,
सब पहार आउर सब डिङ्गा बरोबर हुइजाइ।
टेंरहि-बाँगा डगर सुधे हुइजाइ,
आउर कररा डगर सहजे बनाइक परि,
6आउर सब मनइभर परमेस्वरन दहल मुक्ति दिखहें।’”#यसइ ४०:३-५
7लेंहरक लेंहरा मनइभर युहन्नातिरा बप्तिस्मा लेहे अइनें। पर युहन्ना ओइन कहनें, “ए साँपके लरका, तोइनें इ आइत रहल परमेस्वरके सजाइति भाजेक कउन कहल?#मत्ति १२:३४; २३:३३ 8पापि मन बदलल बात दिखाइक तहन बरहिया काम करो। हमरे ते अब्राहामके लउँरालउँरिया होइ, तभिकमारे पापके दन्ड हम्मर उप्पर नाआबे कहिके तोइनें नासोंचो। मइ तोइन कहत आहुँ परमेस्वर इ पथ्राकेहें फेक अब्राहामके लउँरालउँरिया बनाइ सिक्हिं। 9रुख्खक जरमे कुरहारि परसिकल आहे, तभिकमारे बरहिया फारा नाइफरइया रुख्खा काटके आगिम फँकाइलजाइ।”#मत्ति ७:१९
10मनइभर युहन्नाकेहें पुछनें, “अइसन आहे ते अब हम्हिन का करेकपरि?”
11युहन्ना ओइन जबाफ दहनें, “जेहकातिरा दुइठोर लत्ता आहे, नाइरहल मनइकेहें एकठोर देहे, उस्ते जेहकातिरा खइना चिझ आहे, उ फेक खइना चिझ नाइरहल ओइन देहे।”
12कर उठइयाभर फेक बप्तिस्मा लेहे अइनें आउर युहन्नाकेहें पुछनें, “गुरु जि हमरे का करि?”#लुका ७:२९
13युहन्ना ओइन कहनें, “सरकार जत्ता तुक्ले आहे ओहति जेदा कर नाउठइयो।”
14तउ सिपाहिभर फेक पुछनें, “हम्हिन का करेकपरि?”
युहन्ना ओइन कहनें, “दमकाक या गलत दोस लगाक रुपइया नालिजियो। बलकि अपना तनखामे सन्तुस्ट रहियो।”
15उहिबखत मनइभर मुक्ति दिबइया खिरिस्टके असरा देखत रेहें, आउर ओइनें युहन्नाकेहें “यिहि खिरिस्ट आहें कि?” कहिके सोंचत रेहें। 16तउ युहन्ना उ सबके जबाफ दहनें, “मइ ते तोइन पानिलइक बप्तिस्मा दहत आहुँ, पर एक जनें मोहति सक्तिसालि आइत आहें, जिनका जुतक टेनि खुल्ना लायकके फेक मइ नाइआहुँ। उ तोइन पबित्र आत्मा आउर आगिलइक बप्तिस्मा दिहें। 17उसइना सुपा उनका हाथम आहे। उ अनाज उसाक बक्खारिम धरहें आउर भुसा कबु नाइबुतना आगिम जरा दिहें।”
18अइसे युहन्ना अस्ते ढेरे अरति दहति मनइभरिन सुसमाचार सुनइनें। 19पर युहन्ना हेरोदकेहें डँटनें, काहिक्कि उ अपना भइयक मेहरुवा हेरोदियाससँघे बेह करले रेहें, आउर आकुर ढेरे खराब काम फेक करले रेहें। 20तउके हेरोद युहन्नाकेहें जेलमे डारके एकठोर आउ खराब काम करनें।#मत्ति १४:३-४; मर्क ६:१७-१८
येसुके बप्तिस्मा
मत्ति ३:१३-१७; मर्कुस १:९-११
21जब सब मनइ बप्तिस्मा लहत रेहें। तउके येसु फेक बप्तिस्मा लेहे अइनें आउर बप्तिस्मा लेहे बखत येसु पराथ्ना करत रेहें। उहिबखत स्वरग खुलल, 22आउर पबित्र आत्मा धउरिक रुपमे येसुके उप्पर आक बइठल आउर स्वरगमहति अबाज आइल, “तुम मोर पियारा लउँरा बाटो, मइ तुम्हिनति बहुत खुसि आहुँ।”#उत २२:२; भज २:७; यसइ ४२:१; लुका ९:३५
येसुके बन्सावलि
मत्ति १:१-१७
23जब येसु अपना सेबकाइ सुरु करनें तउ येसु तिस बरसके हुइगेल रेहें। मनइभर योसेफकेहें येसुके बाबा सम्झें।
योसेफ एलिके लउँरा रेहें। 24एलि मत्ताके लउँरा, मत्ता लेबिके लउँरा, लेबि मल्किके लउँरा, मल्कि यान्नाके लउँरा, यान्ना योसेफके लउँरा, 25योसेफ मत्ताथियासके लउँरा, मत्ताथियास आमोसके लउँरा, आमोस नहुमके लउँरा, नहुम इसलिके लउँरा, इसलि नग्गइके लउँरा, 26नग्गइ माथके लउँरा, माथ मताथियासके लउँरा, मताथियास सेमइनके लउँरा, सेमइन योसेखके लउँरा, योसेख योदाके लउँरा, 27योदा योआननके लउँरा, योआनन रेसाके लउँरा, रेसा यरुबाबेलके लउँरा, यरुबाबेल सालतिएलके लउँरा, सालतिएल नेरिके लउँरा, 28नेरि मल्किके लउँरा, मल्कि अददिके लउँरा, अददि कोसामके लउँरा, कोसाम एलमादमके लउँरा, एलमादम एर्के लउँरा, 29एर् यहोसुके लउँरा, यहोसु एलिएजरके लउँरा, एलिएजर योरिमके लउँरा, योरिम मत्तितातके लउँरा, मत्तितात लेबिके लउँरा, 30लेबि सिमियोनके लउँरा, सिमियोन यहुदाके लउँरा, यहुदा योसेफके लउँरा, योसेफ योनानके लउँरा, योनान एल्याकिमके लउँरा, 31एल्याकिम मलेआके लउँरा, मलेआ मिन्नाके लउँरा, मिन्ना मत्ताथाके लउँरा, मत्ताथा नातानके लउँरा, नातान दाउदके लउँरा, 32दाउद यिसइके लउँरा, यिसइ ओबेदके लउँरा, ओबेद बोअजके लउँरा, बोअज सल्मोनके लउँरा, सल्मोन नहसोनके लउँरा, 33नहसोन अम्मिनादाबके लउँरा, अम्मिनादाब आरामके लउँरा, आराम हेसरोनके लउँरा, हेसरोन फारेसके लउँरा, फारेस यहुदाके लउँरा, 34यहुदा याकुबके लउँरा, याकुब इसहाकके लउँरा, इसहाक अब्राहामके लउँरा, अब्राहाम तेरहके लउँरा, तेरह नाहोरके लउँरा, 35नाहोर सरुगके लउँरा, सरुग रुउके लउँरा, रुउ पेलेगके लउँरा, पेलेग एबेरके लउँरा, एबेर सेलहके लउँरा, 36सेलह केनानके लउँरा, केनान अरपछदके लउँरा, अरपछद सेमके लउँरा, सेम नोआके लउँरा, नोआ लेमेखके लउँरा, 37लेमेख मतुसेलहके लउँरा, मतुसेलह हनोकके लउँरा, हनोक येरेदके लउँरा, येरेद महलालेलके लउँरा, महलालेल केनानके लउँरा, 38केनान एनोसके लउँरा, एनोस सेतके लउँरा, सेत आदमके लउँरा, आदम परमेस्वरके लउँरा रेहें।
اکنون انتخاب شده:
लुका 3: KTHR
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2024 (Active), Mother Tongue Translators Society and Wycliffe Bible Translators, Inc. All rights reserved.
