Ansa 14
14
1Vuka vu ugboji vu tsu ɓa̱na̱ ta̱ kpaꞋa ku ni,
ama kalau ka tsu yangala ta̱
kpaꞋa ku ni n ka̱ci ka̱ ni.
2Vuza na u ci yaꞋan ukuna u mayun
a̱yi ɗa u tsu pana wovon u Vuzavaguɗu,
ama a̱yi na uye u ni u modoruko u ɗa
u tsu goyo ta̱ Vuzavaguɗu.
3Kadanshi ka kalau mashashau maꞋa
a̱ kucina̱ ku ni,
ama kadanshi ka vuza vu ugboji ka tsu ere yi ta̱.
4Ubuta̱ u na anaka i ba,
okotsu a ijanu o ci kuyongo ta̱ lekeɗi
Ama ubuta̱ u na wi
n obomburon a vicimba,
i ta̱ a̱ kuciya̱ ilikulya ya a̱bunda̱i.
5Magan ma mayun ma̱ ci ya̱nsa̱ vuza ba.
ama magan ma aꞋuwa,
ma̱ tsu ka̱na̱ ta̱ kutsungu aꞋuwa.
6Vuza vu ulami u tsu la̱nsa̱ ta̱ cicoꞋo,
ama u tsu ciya̱ ba,
ama kuyeve ki na atakaci ba u keyevi.
7YaꞋan daꞋangi n kalau,
adama a na vi a̱ kuciya̱ kuyeve a̱ una̱ u ni ba.
8CicoꞋo tsu vuza vu ugboji
ɗaɗa kusheshe a uye wu nwalu n ni,
ama tsulau tsu alau ma̱ya̱nsa̱ka̱ maꞋa.
9Alau a ci yaꞋanka ta̱ aza a na
a̱ tsu ushuku n unushi u le ulami,
ama a̱ tsu ciya̱ ta̱ kusheshe ku singai
a̱ ka̱tsuma̱ ka aza a ukuna u mayun a̱ ka̱ɗu.
10Ka̱ɗu dem ke yeve ta̱
una̱mgbuka̱tsuma̱ u ni,
kpamu babu vuza na u yevei
ma̱za̱nga̱ ma̱ ni.
11I ta̱ a̱ kufa̱da̱ kpaꞋa
ku vuza gbani-gbani,
ama kpaꞋa ku vuza na wi o kutono mejege
ki ta̱ a kulyaꞋa kelime.
12Uye wi ta̱ lo u na e kusheshe
ku vuma wi ta̱ derere,
ama a ukocishi
wi ta̱ a kubanka yi ukpa̱.
13Ko a̱ ka̱tsuma̱ ki izoshi,
una̱mgbuka̱tsuma̱ wi ta̱ punu.
kpamu ma̱za̱nga̱ mi ta̱ a kufuɗa kukotso
n una̱mgbuka̱tsuma̱.
14Aza a unambi u ma̱riki i ta̱ a̱ kuciya̱
katsupu derere tsu uye u le,
kpamu vuza vu ma̱riki
wi ta̱ a̱ kuciya̱ katsupu tsu ulinga u ni.
15ka̱mici ka̱ tsu ushuku ta̱ n ili dem,
ama vuza vu ugboji u tsu indana ta̱ mayin
kafu u yaꞋan ili i yoku.
16Vuma vu ugboji, u tsu pana ta̱
wovon u Vuzavaguɗu
ka̱ta̱ u suma ka gbani-gbani,
ama kalau ki ta̱ n a̱ra̱ɗi
ka̱ta̱ u yaꞋan ili gogoꞋo lo babu cicoꞋo.
17Vuza vu wupa gogoꞋo lo u ci yaꞋan ta̱ tsulau,
a ci iwan ta̱ vuza vu ugboji u kavama.
18ka̱mici tsulau tsu ɗa ili yi uka̱ni i ni,
ama vuza vu ugboji u tsu ciya̱ ta̱
okolokolo e kuyeve ci ili yi uka̱ni i ni.
19Aza a gbani-gbani i ta̱ a̱ ku kuɗa̱ngu
e kelime ka aza a̱ ma̱riki,
uma a gbani-gbani feu nannai
a̱ utsutsu wa aza a usuɓi.
20Vuza vu unambi, ko aza a na i a ida̱shi ɗeɗevu
a tsu suma yi ta̱,
ama vuza vu uciyi
wi ta̱ n a̱ja̱Ꞌa̱ n a̱bunda̱i.
21A̱yi na u goyoi vuza vu na
i a ida̱shi ɗeɗevu u nusa ta̱,
ama vuza vu una̱singai u ɗa vuza vu na
u yaꞋankai vuza vu unambi kasingai.
22Aza a na o tsu foɓuso ka gbani-gbani,
ele ɗa a̱ tsu ka̱sukpa̱ uye ba?
Ama aza a na o tsu foɓuso kasingai,
a̱ tsu ciya̱ ta̱ ucigi m ma̱riki.
23KuyaꞋan ku ulinga makyan dem wi ta̱ n kodokpotsu,
ama utonu u tsu tuka̱ ta̱ n unambi.
24Uciyi wa aza a ugboji
okolokolo a ɗa we e le,
ama tsulau tsu alau,
tsu tsu tuka̱ ta̱ n tsulau.
25Magan ma mayun ma tsu wawa ta̱ wuma,
ama magan ma aꞋuwa modoruko maꞋa.
26A̱yi na wi a kupana wovon u Vuzavaguɗu,
wi ta̱ n ubuta̱ u kusheɗeku,
kpamu wi ta̱ o ku okpo
ubuta̱ u kusheɗeku u muku n ni.
27Wovon u Vuzavaguɗu
u ɗaɗa a̱shi a̱ mini ma wuma,
ma na ma̱ tsu utuka̱ vuza a maza mu ukpa̱.
28Tsugbayin tsu mogono ɗaɗa
ka̱bunda̱i ka uma a na wi n a ɗa,
ama uma i lo baci ba,
tsugono tsu mogono gbani ɗa.
29Vuma vu uka̱ni u ka̱ɗu,
wi ta̱ n kuyeve ka̱ a̱bunda̱i,
ama vuza vu wupa gogoꞋo lo,
u tsu uta̱ka̱ ta̱ n tsulau ci ni e keteshe.
30Ka̱ɗu ka asuvu a̱ ida̱shi,
ke ci neke ta̱ wuma a ikyamba,
ama cisheꞋe tsu tsu tuka̱ ta̱ mɓa̱la̱ a ikyamba.
31A̱yi na u doroi vuza vu unambi,
u goyo ta̱ vuza vu na u yaꞋin i ni,
ama vuza na baci u yaꞋankai aza a yali kasingai
wi ta̱ e kuneke Ka̱shile tsugbayin.
32Ma̱dukpa̱ ma̱ ta̱wa̱ baci
aza a gbani-gbani a ɗa a̱ ci yikpa̱,
ama ko a ukpa̱
aza a usuɓi i ta̱ n ubuta̱ u kusheɗeku.
33CicoꞋo ci ta̱ a̱ ka̱ɗu ka vuza vu ugboji,
ko a̱ ka̱tsa̱ma̱ ka alau,
u tsu yotsongu ta̱ ka̱ci ka̱ ni.
34Usuɓi u tsu neke ta̱
uduniyan tsugbayin,
ama unushi u tsu tuka̱ ta̱
n wono a uduniyan dem.
35Mogono ma tsu pana ta̱ uyoꞋo
u kagbashi ku ugboji,
ama kagbashi ka na ka̱ tsu tuka̱
n wono u tsu takacika ta̱.
©️2025 Language Development and Translation Initiative (LDTI)