Ansa 13
13
1Maku mu ugboji
ma tsu zuwaka ta̱
n ugbari we esheku a̱ ni,
ama vuza vu ulami
u tsu pana uɓarangi ba.
2Kadanshi ka singai ka vuma dem
ke ci neke yi ta̱ ili i singai,
ama vuma vu unambi u ma̱riki
u tsu zuwa ta̱ kaci a̱ ubuta̱ u vishili.
3Vuza na u tsu la̱na̱ una̱ u ni,
u tsu zuwaka ta̱ n wuma u ni,
ama vuza vu kadanshi n asuvu a usuɗukpi,
wi ta̱ a̱ kukuwa̱.
4Korogo ka tsu ciga ta̱ udukuyan,
u tsu ciya̱ tana ili ba.
ama kayaꞋin ku ulinga
wi ta̱ a kuciya̱ ili i na wi a kuciga ba̱ri.
5Vuza vu usuɓi u tsu iwan ta̱
ukuna wa aꞋuwa,
ama vuza vu gbani-gbani
u tsu yaꞋan ta̱ ili i wono n i kugoyi.
6Usuɓi u tsu ere ta̱ vuza vu babu unushi,
ama ka gbani-gbani ka tsu lyaꞋa ta̱ vuza vu unushi.
7Vuza vu yoku u tsu ɗika ta̱ ka̱ci ka̱ ni
vuza vu uciyi ɗa, tana wi n ili ba,
vuza vu yoku tamkpamu
u tsu ɗika ta̱ ka̱ci ka̱ ni
vuza vu unambi ɗa,
tana wi ta̱ n uciyi ka̱u.
8Uciyi u vuma wi ta̱ a kufuɗa
kushiba̱ wuma u ni,
ama vuza vu unambi
babu vuza na u tsu gbandarasa yi.
9Kutashi ka aza a usuɓi
ku tsu akana ta̱ ka̱u,
ama kutashi kuma a gbani-gbani
ku tsu kima̱ ta̱.
10A̱ra̱ɗi a̱ tsu tuka̱ n ili i yoku ba
vishili ɗa koci,
ama a̱ tsu ciya̱ ta̱ cicoꞋo
a̱ ubuta̱ wa aza ana a tsu pana odoki.
11Udukuyan u na a̱ ciya̱i n uye usingai ba,
u tsu puwa̱nka̱ ta̱ gogoꞋo lo,
ama vuza na u ɓolongi ikebe m mele ma̱ ni
i tsu ka̱na̱ ta̱ kulyaꞋa kelime.
12Kukeɗe a̱pa̱Ꞌa̱ a ili i na yi kuciya̱ ba,
ka tsu zuwa ta̱ ka̱ɗu ka̱ ka̱na̱ mɓa̱la̱.
ama a̱ ciya̱ baci ili i na ka̱ɗu ki a mali,
wi ta̱ tsu maɗanga ma wuma.
13Vuza na baci u iwain kupana,
wi ta̱ a̱ kukpa̱ɗa̱ kene ba,
ama vuza na baci u panai kadanshi,
wi ta̱ a̱ kuciya̱ katsupu singai.
14Kuyotsongusu ku vuza vu ugboji,
a̱shi a̱ mini a wuma a ɗa,
ma na ma̱ tsu utuka̱ vuza a maza mu ukpa̱.
15Kuyeve ku singai ku tsu tuka̱ ta̱
m mapasa ma singai,
ama uye wa aza a na i m ma̱riki ba,
wi ta̱ n atakaci.
16Vuza vu ugboji u ci yeve ta̱
ili i na wi a kuyaꞋan,
ama kalau ka tsu yotsongu ta̱
tsulau ci ni e keteshe.
17vuza vu usuki vu gbani-gbani
u tsu zamaka ta̱ ka̱ci ka̱ ni kadama,
ama kalingata ku usuɓi
ka̱ tsu tuka̱ ta̱ m ma̱ta̱na̱.
18Vuza na baci u iwain ugbari,
u tsu okpo ta̱ n wono n unambi,
ama vuza na baci wu ushuki n odoki
u tsu ciya̱ ta̱ tsugbayin.
19Ili yi uyoꞌo i ɗa vuma u ciya̱
ili i na wi a mali,
ama alau e ci ene ta unata
u ka̱sukpa̱ ka gbani-gbani.
20A̱yi na wi a nwalu koɓolo n aza a ugboji
u tsu doku ta̱ ugboji,
ama ka̱ja̱Ꞌa̱ ka alau
wi ta̱ a ku unaku ka̱ ci ka̱ ni.
21Kawuya ko tsu tono ta̱
aza a ka gbani-gbani,
ama una̱singai u ɗa katsupu
ka vuza vu usuɓi.
22Vuma vu usuɓi u tsu ka̱sukpa̱ka̱ ta̱
ntsukaya n ni ili yi uka̱ni,
ama udukuyan wa aza unushi
kuzuwa ku ɗa wa aza a usuɓi.
23Kashina ka vuza vu unambi
ki ta̱ a kufuɗa kumatsa ili gbani,
ama aza a unambi u ma̱riki
a̱ tsu pura̱ngu ta̱ u ɗa ra̱ka̱.
24Yaba dem na u kpa̱ɗa̱i kugbara maku ma̱ ni,
wi a kuciga yi ba,
ama a̱yi na wi a kuciga maku ma̱ ni,
wi ta̱ a kugbara yi.
25Aza a usuɓi a ci lyaꞋa ta̱
ilikulyaꞋa i le ali a̱ cuwa̱,
ama aza a gbani-gbani,
n kambulu kaꞋa o tsu yongo ayin tutu.
©️2025 Language Development and Translation Initiative (LDTI)