Ansa 15
15
1Wu ushuki u singai
u tsu vaꞋanku ta̱ asuvu a usuɗukpi,
ama kadanshi ka asuvu a usuɗukpi
ka tsu ɗa̱ngusa̱ ta̱ wupa.
2Kelentsu ka vuza vu ugboji
ke ci neke ta̱ kuyeve,
ama una̱ u kalau
u tsu tsuwa̱n ta̱ tsulau.
3A̱shi a Vuzavaguɗu i ta̱ a̱ ubuta̱ dem,
a kinda aza a singai n aza a gbani-gbani.
4Kelentsu ka na ka̱ tsu tuka̱ m ma̱ta̱na̱,
maɗanga ma wuma maꞋa,
ama kelentsu ka aꞋuwa
ka tsu una ta̱ ka̱ɗu.
5Kalau ka tsu iwan ta̱ ugbari
we esheku a̱ ni,
ama vuza vu na wu ushuki n kulapulu,
vuza vu ugboji ɗa.
6KpaꞋa ku vuza vu usuɓi
ki ta̱ n uciyi wa̱ a̱bunda̱i,
ama kodokpotsu ka uma a gbani-gbani
ku tsu tuka̱ le ta̱ n atakaci.
7Una̱ u vuza vu ugboji
u tsu sala ta̱ kuyeve,
ama ta a̱ɗu a alau
i nannai ba.
8Vuzavaguɗu u tsu iwan ta̱
alyuka a vuza vu gbani-gbani.
Ama avasa a aza a na i o kutono mejege
a tsu zuwa yi ta̱ ma̱za̱nga̱.
9Vuzavaguɗu u tsu iwan ta̱ uye
u uma a gbani-gbani,
ama u ci ciga ta̱
aza a na i a̱ kula̱nsa̱ ukuna wu usuɓi.
10Atakaci a wuya-wuya i ta̱ a kuvana
yaba dem vu na u ka̱sukpa̱i uye,
a̱yi na u iwain kulapulu
wi ta̱ a̱ kukuwa̱.
11Ukpa̱ n munuka i ta̱ lo
e keteshe u Vuzavaguɗu,
teɗai tamkpamu a̱ɗu a uma.
12Vuza vu kugoyi u tsu ciga a lapulaka yi ba,
u tsu la̱nsa̱ odoki a vuza vu ugboji ba.
13Ka̱ɗu ka na ki m ma̱za̱nga̱
ka̱ tsu zuwa ta̱ imeshi,
ama una̱mgbuka̱tsuma̱
u tsu zuwa ta̱ a̱shi a̱ shila̱.
14Ka̱ɗu ka vuma vu ugboji
ka̱ tsu la̱nsa̱ ta̱ kuyeve,
ama ilikulyaꞋa i kalau
i ɗaɗa tsulau.
15Ayin a vuza na o doroi ra̱ka̱
u tsu yongo ta̱ a kataci,
ama ka̱ɗu ka vuza vu ma̱za̱nga̱,
makyan dem wi ta̱ a̱ ka̱tsuma̱ ka kupana uyoꞋo.
16U laꞋa ta̱ n kugaꞋan vu yongo n kenu
n wovon u Vuzavaguɗu,
ana va kuciya̱ udukuyan wa̱ a̱bunda̱i
koɓolo n atakaci.
17U laꞋa ta̱ n kugaꞋan vu lyaꞋa
tsuwa n kusaꞋan koci, n aza a na vu cigai
a na va ku takuma inyama
n aza a na i a tsurala n avu.
18Vuza va asuvu a usuɗukpi
u tsu ɗa̱ngusa̱ ta̱ vishili,
ama vuza vu uka̱ni u ka̱ɗu
u tsu vaꞋanka ta̱ n vishili.
19Wuma u vuza vu wonvoli
wi ta̱ tukpa n atakaci,
ama wuma u vuza vu mejege
wi ta̱ n una̱singai.
20Maku mu ugboji
ma̱ tsu zuwa ta̱ mmaci ni ma̱za̱nga̱,
ama kalau ko tsu goyo ta̱ mmaci n ni.
21Tsulau ci ta̱ a̱ ma̱za̱nga̱ u ka̱ta̱m,
ama vuma na wi n kuyeve
u ci yaꞋan ta̱ ili i na yi derere.
22Ofoɓuso a̱ tsu na̱mgba̱ ta̱
adama ukpa̱ɗi u kula̱nsa̱ odoki,
ama n odoki a singai a̱bunda̱i,
a̱ tsu ciya̱ ta̱ ulyaꞋi.
23Yaba dem u tsu pana ta̱ uyoꞋo
a̱ ushuku yi u kadanshi gogoꞋo lo,
kpamu ili i singai i ɗa a yaꞋan kadanshi
ka singai a makyan ma na mo yotsoi.
24Uye u wuma u tsu tono ta̱
n vuza vu ugboji,
adama a na wu ere yi
a̱ kugida̱la̱ a kubana a kasaun.
25Vuzavaguɗu u tsu fa̱da̱ ta̱
kpaꞋa ku vuza vu a̱ra̱ɗi,
ama u tsu kanza ta̱ kagapa.
26Vuzavaguɗu u tsu iwan ta̱
kusheshe ku vuza vu gbani-gbani,
ama u tsu pana ta̱ uyoꞋo
u kusheshe ka aza a̱ ma̱riki.
27Vuza vu kutsa̱n u tsu ronoko ta̱
kpaꞋa ku ni atakaci,
ama a̱yi na u iwain kalyaꞋa
wi ta̱ a kuyongo n wuma.
28Ka̱ɗu ka vuza vu usuɓi ke ci sheshe ta̱
kafu wu ushuku kadanshi,
ama kelentsu ka vuza vu gbani-gbani
ka tsu dansa ta̱ ka gbani-gbani.
29Vuzavaguɗu wi ta̱ daꞋangi
n uma a gbani-gbani,
ama u tsu pana ta̱ avasa aza a usuɓi.
30Imeshi i tsu zuwa ta̱ ka̱ɗu ma̱za̱nga̱,
kpamu arabali a singai a̱ tsu tuka̱ ta̱
m ma̱ta̱na̱ mi ikyamba.
31A̱yi na u zuwai atsuvu a uɓarangi u singai,
wi ta̱ o kuyongo a̱ ka̱tsuma̱ ka aza o cicoꞋo.
32Vuza vu na baci u iwain ugbari,
ka̱ci ka̱ni kaꞋa u goyoi,
ama vuza na baci wu ushuki n kulapulu,
wi ta̱ a̱ kuciya̱ kuyeve.
33Wovon u Vuzavaguɗu u tsu
piꞋisaka ta̱ vuma cicoꞋo,
kpamu sai vu goyo ka̱ci ka̱ nu,
yeve vu ciya̱ tsugbayin.
©️2025 Language Development and Translation Initiative (LDTI)