Ansa 12
12
1Vuza na baci u cigai ugbari
u ciga ta̱ kuyeve,
ama vuza na u iwain kulapulu
kalau kaꞋa.
2Vuma vu usuɓi u tsu ciya̱ ta̱
mapasa ma singai u Vuzavaguɗu
ama Vuzavaguɗu u tsu takacika ta̱
vuza vu ugboji u kavama.
3Vuma wi a kushamgba mayin
n ka gbani-gbani ba,
ama i a kufuɗa kumuɗa̱ vuza vu usuɓi ba.
4Vuka vu ma̱riki okolokolo a ɗa u vali vi ni,
ama vuka vu na vi n wono ba,
u tsu okpo ta̱ an untsu e etele a̱ ni.
5Kusheshe ka aza a usuɓi ki ta̱ mejege,
ama odoki aza a gbani-gbani ma̱ya̱nsa̱ka̱ maꞋa.
6Kadanshi ka vuza vu gbani-gbani
ko tsu okpo ta̱ an maza u vuma,
ama kadanshi ka vuza vu ukuna
u mayun a̱ ka̱ɗu ka tsu wawa ta̱ vuma.
7A tsu una ta̱ aza a gbani-gbani ra̱ka̱
i o kudoku ku ene le ba,
ama kpaꞋa ka aza a usuɓi
ki ta̱ a kushamgba n utsura mayin.
8A tsu cikpa ta̱ vuma
adama o cicoꞋo ci ni,
ama o tsu goyo ta̱
aza a na i n ugboji ba.
9U laꞋa ta̱ n kugaꞋan vu yongo n unambi,
ama vi ta̱ n kagbashi,
A na va ku bonoko ka̱ci ka̱ nu avu ili i yoku i ɗa.
tana vi n ilikulyaꞋa ba.
10Vuma vu usuɓi u tsu la̱na̱ ta̱
ma̱ta̱na̱ mi ilikuzuwa i ni,
ama vuza vu gbani-gbani
ili i tsu bankai ba.
11Vuza vu na baci u cimbai kashina ka̱ ni mayin,
wi ta̱ a̱ kuciya̱ ilikulyaꞋa ba̱ri,
ama a̱yi na wi a kulapa ulapi u ni
wi n ugboji ba.
12Uma a gbani-gbani a tsu ciga ta̱
ucanuku u gbani u uma a gbani-gbani,
ama vuza vu usuɓi u tsu ka̱na̱ ta̱
kutopo tsu maɗanga.
13Kadanshi ka vuza vu gbani-gbani
ko tsu okpo yi ta̱ maza,
ama vuza vu usuɓi
u tsu laꞋaka ta̱ a̱ ka̱tsuma̱ ka atakaci.
14Katsupu ka vuma ki ta̱ a̱ ubuta̱ u kadanshi ka̱ ni
n ulinga we ekiye a̱ ni,
wi ta̱ a̱ kuciya̱ ili i na i gaꞋin ni.
15Kalau ke ci ene ta̱ uye u ni wi ta̱ derere,
ama vuza vu tsu cicoꞋo u tsu pana ta̱ odoki.
16Kalau ka tsu yotsongu ta̱
wupa u ni gogoꞋo lo,
ama vuza vu ugboji u tsu takuma ta̱
u soɗongu ishikushi.
17Magan ma mayun ma tsu dansa ta̱ kamayun,
ama magan ma aꞋuwa,
aꞋuwa a ɗa u tsu yongo a kudansa.
18Kadanshi ka wasasa
ka tsu sapa ta̱ vuma an kotokobi,
ama kelentsu ka vuza vu cicoꞋo
ka̱ tsu tuka̱ ta̱ m ma̱ta̱na̱.
19Kadanshi ka mayun ki ta̱
o kuyongo ko wannai,
ama kelentsu ka aꞋuwa
ke tsu geshe ka̱u ba.
20Ukuna u ma̱ya̱nsa̱ka̱ wi ta̱ a̱ a̱ɗu
a aza a na i e kulecengusu ka gbani-gbani,
ama aza a na i a kuyaꞋan kasingai
i ta̱ a kuyaꞋan ma̱za̱nga̱.
21Babu ili i na i ku unaku vuza vu usuɓi,
ama atakaci a̱bunda̱i a ɗa
a̱ kuciya̱ vuza vu gbani-gbani.
22Vuzavaguɗu wi ta̱ e ku ene unata
wu una̱ wa aꞋuwa,
ama u tsu pana ta̱ uyoꞋo
wa aza a na a ci yaꞋan ukuna u mayun.
23Vuza vu ugboji u tsu sokongu ta̱ kuyeve ku ni,
ama kalau ka̱ tsu utuka̱ ta̱ n tsulau ci ni e keteshe.
24Ekiye a na a ci yaꞋan ulinga makyan dem
i ta̱ a kulyaꞋa tsugono
ama ukpa̱ɗi u tsu zuwa ta̱ ulinga u tsugbashi.
25Kadanshi ka̱ a̱bunda̱i a̱ ka̱ɗu
ka̱ tsu sa̱nka̱ ta̱ vuma kuba̱ruwa̱,
ama kadanshi ka singai
ka zuwa yi ta̱ ma̱za̱nga̱.
26Vuza vu usuɓi u tsu tono ta̱
n cija̱Ꞌa̱ ci ni,
ama uye u vuza vu gbani-gbani
u tsu zuwa yi ta̱ kupuwa̱nka̱.
27Korogo ka tsu zatsuku inyama ba,
ama vuza na u tsu yaꞋan ulinga ka̱u,
wi ta̱ a̱ kuciya̱ udukuyan.
28A uye wu usuɓi wuma wi ta̱ ɗe,
uye u nanlo u tsu banka vuza ukpisa̱ ba.
©️2025 Language Development and Translation Initiative (LDTI)