Ansa 11
11
1Vuzavaguɗu u tsu iwan ta̱
vuza vu kagisamkpatsu ka aꞋuwa,
ama u tsu pana ta̱ uyoꞋo
u vuza vu agisamkpatsu ka mayun.
2A̱ra̱ɗi a̱ tsu tuka̱ ta̱ n wono,
ama vuza na baci u goyoi ka̱ci ka̱ ni
vuza vu cicoꞋo ɗa.
3UgaꞋin wa aza a ukuna u mayun a̱ ka̱ɗu,
u tsu tono ta̱ n ele,
ama aza a unambi u ma̱riki a̱ tsu kuwa̱ ta̱,
adama a ka gbani-gbani ke le.
4Uciyi wi kanna ba a kanna ka atakaci
ama usuɓi u tsu utuka̱ ta̱ vuma a̱ ukpa̱.
5Usuɓi wa aza a na i unushi ba
u tsu tono a̱ n ele
a uye u na wi mejege,
ama aza a gbani-gbani a̱ tsu yikpa̱ ta̱
adama ka a gbani-gbani ke le.
6Usuɓi wa aza a na i n ukuna
u mayun u tsu wawa le ta̱,
ama a̱shi a wuya maza maꞋa
wa aza a unambi u ma̱riki.
7Vuza gbani-gbani u tsu kuwa̱ ta̱
n kusheshe ku ni dem,
ka̱ta̱ a̱pa̱Ꞌa̱ a na u keɗei a ili ra̱ka̱ a̱ na̱mgba̱.
8A̱ tsu utuka̱ ta̱ vuza vu usuɓi a atakaci,
ka̱ta̱ kucikpa o bono u vuza vu gbani-gbani.
9Aza a gbani-gbani n una̱ u le u ɗa
a tsu una vuza vu na i a̱ ida̱shi ɗeɗevu,
ama adama e kuyeve
aza a usuɓi i ta̱ a kulaꞋaka.
10Vuza vu usuɓi u lyaꞋa baci kelime
likuci i ci yaꞋan ta̱ ma̱za̱nga̱,
ama vuza vu gbani-gbani u kuwa̱ baci,
uma a tsu pana ta̱ uyoꞋo m ma̱za̱nga̱.
11Likuci i tsu gbonguro ta̱ adama a una̱singai
wa aza a na i o kutono mejege,
ama a tsu una ta̱ likuci ya
adama a̱ una̱ u uma a gbani-gbani.
12Vuza vu unambi wu ugboji u goyo ta̱
vuza vu na yi ida̱shi ɗeɗevu,
ama vuza vu na wi n kuyeve
u tsu ka̱na̱ ta̱ una̱ u ni.
13Vuza vu kuyun a̱ tsu ushuku n a̱yi ba,
Ama vuma vu ma̱riki u tsu sokongu ta̱ kakuna.
14A̱ ubuta̱ u na wi babu vuza vu kelime,
uduniyan u tsu yikpa̱ ta̱,
ama ka̱bunda̱i ka aza e kuneke odoki
ka tsu tuka̱ ta̱ n ulyaꞋi.
15Vuza na baci u shamkpai komoci
wi ta̱ a kutakacika,
ama vuza na u iwain
wi ta̱ a kulaꞋaka.
16Vuka vu ma̱riki u tsu ciya̱ ta̱ tsugbayin,
ama ali a kavama udukuyan u ɗa koci i a̱ kuciya̱.
17Vuma vu ma̱riki u tsu ciya̱ka̱ ka̱ci ka̱ ni katsupu,
ama vuza gbani-gbani
u tsu ronoko ta̱ ka̱ci ka̱ ni atakaci.
18Vuma vu gbani-gbani
u tsu ciya̱ katsupu ka makara ba,
ama a̱yi na u ca̱Ꞌi ukuna wu usuɓi
wi ta̱ a kukyaꞋa ukuna wu usuɓi.
19Vuza vu usuɓi vu mayun
u tsu ciya̱ ta̱ wuma,
ama vuza vu na u dakaki kuyaꞋan
ka gbani-gbani wi ta̱ a kukuwa̱.
20Vuzavaguɗu u tsu ene ta̱ unata
wa aza e kusheshe ku gbani-gbani,
ama u tsu pana ta̱ uyoꞋo
wa aza a na a uye u le i n unushi ba.
21Babu munla̱i. Uma a gbani-gbani i a kulaza gbani ba.
ama aza a usuɓi i ta̱ a kulaza gbani.
22Vuka vu ugaꞋin vu na wi n ugboji ba,
wi ta̱ tsu makawani ma azanari
a̱ vunu vu ma̱gurusunu.
23Kusheshe ku uma a usuɓi,
ku ɗaɗa kuyaꞋan kasingai,
ama ukeɗi wa̱ a̱pa̱Ꞌa̱
u uma a gbani-gbani u tsu tuka̱ n kawuya.
24Vuza vu yoku u tsu yaꞋan ta̱ kuneꞋe ba̱ri,
ka̱ta̱ tana u ciyi u le u yimkpa,
ama vuza vu yoku u tsu ɓa̱na̱ ta̱ ili i na wi n i ɗa,
ama ka̱ta̱ okpo nu unambi.
25Vuza vu na u tsu neke ba̱ri,
wi ta̱ a kulyaꞋa kelime n kuciya̱,
a̱yi na u tsu ɓa̱nka̱ aza o yoku,
a̱yi feu i ta̱ a̱ kuɓa̱nka̱ yi.
26Uma a ci yaꞋanka ta̱ vuza na u sokongi ishina
a kuvana i yaꞋan ikebe una̱wuya,
ama una̱singai u ɗa
u vuza na u dengei.
27Vuza na u la̱nsa̱i kasingai
u tsu ciya̱ ta̱ kasingai,
ama vuza na u la̱nsa̱i ka gbani-gbani
wi ta̱ a̱ kuciya̱ kaꞋa.
28Vuza na u zuwai katsura
a uciyi u ni wi ta̱ a̱ kuyikpa̱,
ama vuza vu usuɓi wi ta̱ a kulyaꞋa kelime
tsu a̱vuku a̱ ta̱ku a̱ ka̱kina̱ ka̱ mini.
29Vuza vu na baci u ronokoi kpaꞋa ku ni kadama,
ili yi uka̱ni i ni yi ta̱ o kutono wunla̱i,
kpamu kalau ki ta̱ o ku okpo
kagbashi ka vuza vu ugboji.
30Wuma u vuza vu usuɓi
maɗanga ma wuma maꞋan,
kpamu vuza na wi n ugboji,
utsu isa ta̱ wuma o yoku.
31Ɗa baci aza a usuɓi
a̱ ciya̱i u peci u le aduniyan,
niniɗai tamkpamu wo ku okpo
wa aza a na i n wovon u Ka̱shile ba n aza a unushi?
©️2025 Language Development and Translation Initiative (LDTI)