Ansa 10
10
Ansa a Sulemanu
1Na ɗa ansa a Sulemanu.
Maku mo cicoꞋo ma tsu zuwa ta̱
mmaci n ni ma̱za̱nga̱,
ama kalau ka maku ka tsu zuwa ta̱,
mmaci n ni una̱mgbuka̱tsuma̱.
2Udukuyan u na a̱ ciya̱i n uye u gbani-gbani,
u tsu una ta̱
ama ukuna wu usuɓi
u tsu wawa ta̱ vuma a̱ ukpa̱.
3Vuzavaguɗu u tsu kuka̱sukpa̱ vuza vu usuɓi n kambulu ba,
ama u tsu la̱nga̱sa̱ ta̱ kataci ka̱ kula̱nsa̱
ka vuza vu gbani-gbani.
4Ukpa̱ɗi u tsu tuka̱ ta̱ vuma n unambi,
ama ka̱ga̱ga̱shi ku ulinga ka̱ tsu tuka̱ ta̱ n uciyi.
5A̱yi na u ɓolongi ili i kashina n irana
a̱yi ɗa vuza vu cicoꞋo.
ama a̱yi na u latai a ayin a kpandari
wi ta̱ o ku okpo n wono.
6Una̱singai u tsu yongo ta̱
a kaci ka vuza vu usuɓi an okolokolo,
ama kadanshi ka vuza
vu gbani-gbani ka ci lyaꞋi ta̱.
7Kuciɓasa n ukpa̱
u vuza vu usuɓi una̱singai u ɗa,
ama i ta̱ a kucinukpa n kula
ku vuza vu gbani-gbani.
8Vuza vu tsu cicoꞋo u tsu ushuku ta̱
n kuyotsongusu ku na u ciya̱i,
ama vuza vu kadanshi ka tsulau
wi ta̱ a̱ kuna̱mgba̱.
9Vuza vu ma̱riki wi ta̱ a kuwala m ma̱ta̱na̱,
ama a̱yi na wi a nwalu a uye u na u gaꞋin ba,
i ta̱ e kureme yi.
10Vuza na u tsu iwan ukuna u mayun,
u tsu tuka̱ ta̱ n una̱mgbuka̱tsuma̱,
ama vuza vu kadanshi ka kalau wi ta̱ a̱ kuna̱mgba̱.
11Kadanshi ka vuza vu usuɓi ki ta̱ tsu a̱shi a̱ mini ma wuma,
ama kadanshi ka vuza vu gbani-gbani ka ci lyaꞋi ta̱.
12Tsurala tsu zuwa ta̱ vishili,
ama ucigi u tsu pala ta̱ unushi ra̱ka̱.
13A̱ tsu ciya̱ ta̱ cicoꞋo a̱ una̱ wa aza e kuyeve,
ama mashawuri adama a̱ a̱mici.
14Aza o cicoꞋo o tsu foɓo ta̱ kuyeve,
ama una̱ u kalau u tsu tuka̱ ta̱ nu ukpa̱.
15Udukuyan wa aza a uciyi,
u tsu okpo le ta̱ tsu mashilya ma̱ likuci,
ama yali i tsu okpo ta̱ an agali wa aza a unambi.
16Katsupu ka aza a usuɓi
ka̱ tsu tuka̱ le ta̱ n wuma,
ama katsupu ka aza a gbani-gbani
ka̱ tsu tuka̱ le ta̱ n atakaci.
17A̱yi na u zuwai ka̱ɗu u ciya̱ ugbari,
wi ta̱ a̱ kuciya̱ wuma,
ama a̱yi na u inwan kulapulu,
wi ta̱ a̱ kupuwa̱nka̱.
18Vuza na u tsu sokongu
ukuna u tsurala u ni a̱ ka̱ɗu,
ku tsu zuwa yi ta̱ aꞋuwa,
vuza na u tsu la̱nga̱sa̱ ula a uma
n kadanshi ka aꞋuwa kalau kaꞋa.
19Kadanshi ka yimkpa baci,
a tsu namba punu aꞋuwa ba,
ama a̱yi na u tsu paɗa bini,
wi ta̱ n ugboji.
20Kelentsu ka vuza vu usuɓi,
ki ta̱ an azurufa a na a zagbai,
ama ka̱ɗu ka vuza vu gbani-gbani,
ki n ulinga u yoku ka̱u ba.
21Kadanshi ka vuza vu usuɓi,
ku tsu ɓa̱nka̱ ta̱ uma n a̱bunda̱i,
ama alau a̱ tsu kuwa̱ ta̱,
adama a unambi wu ugboji.
22Una̱singai u Vuzavaguɗu u tsu tuka̱ ta̱ n uciyi,
kpamu ko tsu doku atakaci ba.
23Kalau ka tsu pana ta̱ uyoꞋo
u kuyaꞋan ka gbani-gbani,
ama u vuza vu kuyeve,
u tsu pana ta̱ uyoꞋo u cicoꞋo.
24Ili i na vuza gbani-gbani wi a kusuma,
i ɗaɗa i ci ciya̱ yi,
ama ili i na vuza vu usuɓi u cigai,
i ɗaɗa e ci neke yi.
25Uma a gbani-gbani i ta̱
tsu kopo ka na wunla̱i u tsu pura̱,
ama aza a usuɓi
a tsu shamgba ta̱ n utsura ko wannai.
26Tsu na ili i kalam yi a anga,
ka̱nga̱ feu a̱ a̱shi,
ta vuza vu wonvoli wi nannai
wa aza a na a̱ suki ni.
27Wovon u Ka̱shile u tsu zuwa ta̱
wuma u vuma u geshe,
ama e ci jebe ta̱ ayin a wuma
a vuza vu gbani-gbani.
28Ili i na vuza vu usuɓi u tsu keɗeke a̱pa̱Ꞌa̱,
i tsu tuka̱ ta̱ m ma̱za̱nga̱,
ama a̱pa̱Ꞌa̱ a vuza vu gbani-gbani
a̱ tsu tuka̱ n ili ba.
29Uye u Vuzavaguɗu ubuta̱ u kusheɗeku u ɗa,
wa aza a usuɓi,
ama munuka maꞋa wa aza
a kuyaꞋan ka gbani-gbani.
30Aza a usuɓi i kumuɗa̱ ba,
ama i a̱ kuka̱sukpa̱
aza a gbani-gbani iɗika ya ba.
31Una̱ u vuza vu usuɓi
u tsu dansa ta̱ ukuna u cicoꞋo,
ama i ta̱ a kuzuwaka kelentsu
ka vuza vu gbani-gbani uteku.
32Una̱ wa aza a usuɓi
u yeve ta̱ ili i na i gaꞋin,
ama una̱ u uma a gbani-gbani,
wi n koyoku ba
kadanshi ka gbani-gbani kaꞋa koci.
©️2025 Language Development and Translation Initiative (LDTI)