Rumi 11
11
Israyel dophani sakagw Kaitorni khakhamma
1Hai ang swngni naiyo, Kaitor tama Bini borogroknw yachakjiya? Oaisabwya. Ang sakse kaisa Israyelni, Abrahamni bosongni arw Binnamin dagini borog. 2Kaitor Bini je borog roknw pwilagw sayoi lajak boknw Bw kachalo hojia. Kathar elembagw Eliyoni mwngoi tama sa nokh tama siya? Eliyo jephuo Israyeliyo rokni beaita Kaitorni dayo surijak, 3aiphuo Bw sakha, "Subrai bok Nini diyariroknw buthaljak, tei Nini usrinaini jotho mangchu roknw nachra khalaijak. Angse kaisa diyari tabokbw kathang tongo tei borogrok anw buthalni chaitoklaidok." 4Matwr Kaitor Eliyonw tama joba rwjak? Kaitor sakha, "Tabokbw Ani kai dok sai borogroknw thangrwgwi larwkjak, jebwrok Anw loblai. I kai dok sai borogrok Bal mataini sakango yesu mokorom jiya." 5Kaitor obwtwijar khalayoi tabokbw khakhamwi Israyelroknw baithak kwrwngsa bokcho sayoi larwkjak. 6Kaitor jwtini khakhamwi saywi tongjak hingkhalai obwlai bw mwngsa samungni ongmungya. Jwtini obw ongw hingkhalai khaphurma arw khaphurma tongyamw. 7Halai biji jagw, Israyelrok jenw manni chaitokjak obwnw bok manjiya, matwr Kaitor jebwroknw sayoi tonjak bokse obwno manjak, tei arwrokni jothoni bakha holongni kosol karak ongwi paikha. 8Kathar elembago suijak tongo, "Kaitor boknw kwrwngsa lachima kirimani phala rwjak"#11:8 Jisaiyo 29:10 "Kaitor bokni mokolnw phwngwi rwjak, aithani bokni mokol kwboi nungya. Kaitor bokni khunjurnw muthubwi rwjak, aithani bokni khunjur kwbwinw khanaya, i kok tabokbw kwbwi."#11:8 Ditiyo biboron 29:4 9Bugra Dayudbw sajak,
bokni chamungni bajuarok
khwi tei jalni kosol ongthwk,
obwrok bokni bagwi dus chanatwi,
arw bokni jebw manthai bok obwnw mannaitwi. 10Bokni mokol kana ongthwk.
bok nungya ongnaitwi,
arw bok tektoni hilikmabai jwnwm kongwi tongthwk."
11Halai Jihudirok dus chagwi ta molbrumni bagwi kalaikha? Ohoi bwtwijarya, bokni sumsokni bagwi Bejihudirok tekhokma manni jur mankha, Jihudirok srangwi bachanaitwi. 12Jihudirokni o kronai, swngsarni bagwi hakra hamari twbwgoi phaikha. Jihudirok jebw kamajajak bokni o guna Bejihudirok amrai ongkha. Aithani Jihudi rokni sakagw Kaitorni hamari kwplwng jephuo akhogwi phainw aiphuo obwbai baksa Bejihudi rokni bagwi arw bwswkse kabangma hamari phainw. 13Tabok ang Bejihudi roknw sadok, ang Bejihudirokni bagwi kaisa pirisai, tei ang i samung sakni pharemani khalainai. 14Ang khadungo je ani sakni dopha Jihudirokni imwbai kha tentroknai tei obwtwijar khalayoi kisasa borogroknw ang chubamannai, bok tekhokma mannaitwi. 15Kaitor Jihudirokni daini makhang philwi lagwi hayungni arw borogroknw aphak khalayoi lakha. Aithani Kaitor Jihudiroknw arwbw jephuo yachagwi lanw obwni thaimri tama ongmanw? Bw tama kwthwini langma mannaini kosol haba ongalak? 16Auan gurini tal daini pwilani auannw jwtini Kaitornw abwi rwgw, hai jwtw talba kathar, Tei phangsa joipal bophangni biyarum jwtini kathar ongkhalai obwni jwto bedek bopara rokbw kathar ongnw.
17O joipal bophangni bedek deksa deknwi bayoi kalayw hingkhalai o jegao nini kosol bolongni joipalni bedek deksa, o bophangw kolob khalaywi thapagwi rwjak. Tabok nwng jai jaini Joipal bophangni turuknai bedek boparabai baksa biyarumni bwtwi tei langmani pharan swtwnwi ladok. 18Aithani, nwng o kabai bedek rokni nayoi saknw hamsajak hinwi ta lasa jakdi, Matwr jwtini khalaiyo hingkhalai bakha larwkdi, nwng biyarumnw rumoi larwkdokya biyarumse nwnw rumoi larwkdok.
19Nwng samannw, "Anw thepagwi rwni bagwise bedek bopara roknw sapaywi homani." 20Wk, daijw. Kaitornw paitokya thanise boknw sapaywi homani tei nini paitokma tongw hinwise nwng o bophangni bokchoni kosol tongw, obwni bagwi lasajakya karwi kiridi. 21Kaitor jephuo o soi soi bedek roknw tanwi pairwjak aiphuo paitokma kwrwi khalai Bw nwnwbw yakar galak.
22Aithani Kaitor je bwswk mayaganang tei karak obwnw oaisa oansogwi naidi. Jebwrok kalaywi thangjak bokni bagwi Bw rakthar, matwr Bw nini bagwi maya ganang ongnai jwtini nwng Bini khakhammani bisingw tongw. Jwtini tongya khalai halai Bw nwnw o soi bophang daini tanwi honai, 23Tei Jihudirok jwtini Kaitorni dayo philwi phayo, Bwnw paitogw hai Kaitor Jihudiroknw arwbw yachagoi lanai. Bok jedayo tong Kaitor boknw arwbw odayo thabwi rwnai. 24Bolongni joipal bophangni bedek hainohaini kosol gam joipal bophangw boljaya, Matwr nokh Bejihudirok bolongni joipal bophangni bedekni kosol phaphung nokhnw jothonw gam joipal bophangbai kwrwngrwkha. Halai jebwrok o bophangni soi bedek bopara, bwswk kalaisa khalayoi boknw sakni bophang dayo arwbw kwrwng rwjanw!
Jothoni sakago Kaitorni khakhamma
25Takhukrok, Nokh saknw mwk gnang hinwi bakha kayatwi aithani ang nokhnw kwrwngsa huijak kwbwi sagwi tonni nayo. O kwbwi ongkha Bejihudirokni rem kwplwng ongyasak jora kabangma Israyel rokni bakha karak ongwi tongnai. 26Arw araikhalaywi jotho Israyel dopha tekhokma mannai. Kathar elembago suijak tongw,
Siyon dani tekhoknaisa phainai, Bw Jakobni bosongni borogrokni bisingni ani bagwi khabomyanw khibiywi honai. 27Ang jephuo bokni sumsok yakarwi honw aiphuo imwse ongno bokni bagwi ani hamari ganag lakhna.
28Kothomani aitani nokhni gamni bagwi bok tabok Kaitorni ari. Matwr Kaitorni sayoi lajaknai aitani hodaipiri rokni bagwi bok Kaitorni hamjakmani borog. 29Kaitor jebw ruai rw tei jenw ringkho o kothoyw Bini kha Bw philya. 30Jekhalayoi nokh oaisa jorao Kaitorni gaithal tongjak matwr Jihudirokni gaithalni bagwi nokh tabok Kaitorni khakhamma mangkha, 31Thi obwtwijar khalayoi nokh khakhamma mangkha thani bokhbw tabok gaithal ongkha, jate bokhbw tabok khakhamma mannaitwi. 32Kaitor jwtonw khakhamma phunok mannaitwi obwni bagwi Bw jwtonw gaithalni bisingo chubwi tonjak.
33Kaitorni rangmai paiya. Bini mwkchak bai buju bwswkse kuthok! Bini nalchir tei jwto samung bijimanya. 34Swrw Subraini kha bijimanjak? Tei swrwphwng Bini gam hamya sanai ongjak? 35Kaitorni beaita swrwni sanma tong, je Bw ma manenai? 36Jotho lai Bini bisingtwise phaiyw arw jotho Bini bachungwse. Molbrung Bini chwngsacha ongthwk. Amen.
©️2025 Bible Students Fellowship of Bangladesh