Rumi 12
12
Kaitorni bagwi langma honai
1Halai takhukrok, Kaitorni i khakhammani bagwise ang nokhnw baithak khalayoi kabokdok, nokh nokhni basaknw kwthang, kathar tei Kaitorni yachakjuai usrimung hinwi Kaitorni yago tisagwi rwdi. Obwse ongnw, nokhni chukmwng mwngma. 2Tabokni hayungni chaya borogrokni himnai thangnairokni bisingw nokh saknw taswklwkdi, obwni solai Kaitornw nokhni bakhanw katal khlaywi gathiyoi tisani rwgwi jotho katal ongwi kadi, nokh Kaitorni muchungmanw sinaitwi. Kaitorni muchungma gam, jotho koroyajar tei obwbai Kaitor khachangw. 3Ang Kaitorni daini je baithak khakhamma mankha obwni bisingtwi ang nokhnw jothonw sadok, saknw jeswk jora gara hinwi bakha kathai obwni naikhalai kabang gara hinwi nokh saknw bakha takadi, obwni solai jeswk jora tain oswk jora bakha kadi. Kaitor jenw jeswk jora paitoknaini phran rwjak kaisabw saknw obwni naikhalai kabang bakha kayatwi. 4Chini jothoni basakni kabangma bokcho tongo, matwr jotho bokcho rok samung kwrwngsanw tangya, 5Thi omwtwijar khlaywi chwng remw kabang phapwng Khristobai baksa manjogwi kwrwngsa basakse ongkha. chwng jothobw kaisa bai kaisa manjojak. 6Kaitorni khakhammani maping chwng kaisa jarkaisa ruai manjak. Bw jwtini diyari hinwi Kaitorni koktang sanaini juaima hingkhai hai bw paitoknai maping Kaitorni koktang sathwk. 7Jwtini obw mwngnai juaima hingkhai hai bw mwngthwk. Jebw phwrwngnai juaima manjak bw phwrwngthwk, 8Jebw khabaja rwnai juaima manjak bw khabaja rwthwk, Jebw arw roknw ruai rwnai juaima manjak bw uju khabai ruai rwthwk, Jebw oja ongnai juaima manjak bw srangwi twidulthwk, Jebw arw roknw chubanai juaima manjak tongthokma khabai obwnw khalaithwk.
Khristonw paitoaini langma
9Hamjakmani bisingw phatramwng tatongthwk. Jebw chaya obwnw naislidi, Jebw gam obwnw karak khalayoi rumoi larwkdi. 10Kaisabai kaisa takhukni kosol kuthuk khalayoi hamjaklaidi. Sakni naikhlai benw kabang borom rwdi. 11Kaitorni dayo jwnwmbiti nokhni khamjo tongthwk. Nokhni kha khabommabai kwplwng tongthwk. Nokh Subraini samungo kaphagwi tongdi. 12Nokhni sakango je khadung tong bini bagwi tongthok laidi. Dugu tektogw khalokdi. Jwnwmbiti suri sandi. 13Kaitorni borogrokni biyalni jorao chubadi. Nagorai rokno mwngni bagwi sarangdi. 14Jebwrok nokhno nachokma khalai bokni chayanihaba tanaidi omwni solai hamkrai se naidi. 15Jebwrok tongthoklai bokbai baksa tongthokdi, jebwrok karap bokbai baksa karapdi. 16Nokhni kaisani bai kaisani pablai kwrwngsani kosol ongnaitwi. Ganang borogni kosol hai phunokya karwi jebwrok ganangya bokbai baksa miliyoi tonglaidi. Saknw mwkgwng hinoi bakha takadi. 17Chayani solayoi arwkaisani chaya takhaidi. Jotho borogni mokolo jebw gam o kothoyw kha rwdi. 18Nokhni aitani jeswk jora phari jotho borogrokbai khachangbai tongdi. 19Khajani takhukrok, nokh sakrok yoksuma taladi, Obwni solai Kaitornwse senji rwni rwdi. Kathar Elembago Subrai sajak, "Niraini senji rwnai bagri keber Anise tongw, Jeni jebw manthai Ang bwnw obwnwse rwnai." 20Elembakni kokni kosol "Jwtini nokhni kena ukhiri jahalai bwnw charwdi, Jwtini Bw twi kangjagw hingkhai bwnw twi rwdi. Imwtwijar khlaihalai nwng bini bokhorokni chwngnai angra thumwi tonnw. 21Chayani daio chenwi tathangdi, obwni solai gambai chayanw mechendi.
©️2025 Bible Students Fellowship of Bangladesh