یوحنّا روایت 11
11
ائلعازرئن اؤلومی
1مریم و باجیسی مارتانین کندی بیتعنیادان، ائلعازر آدیندا بئر کئشی ناخوش ائدی. 2بو اله او مریم ائدی کی، ربّین آیاقلارینا یاغ تؤکوب ساچلاری ائنن قورولادی. ناخوش اولان ائلعازر اونون قارداشی ائدی. 3اونا گؤره باجیلار عئسایا خبر گؤندَردئلر: «آغا، سودئیئن آدام ناخوشدور.» 4عئسا بونی اِشئدنده ددی: «بو ناخوشلوغون آخیری اؤلوم دیئل، تارینین جلالی اوچوندور کی، تارینین اوغلی اونونان جلال تاپسین.» 5عئسا، مارتا، باجیسی مریم و ائلعازری سوئردی. 6ائلعازرئن ناخوشلوغونی اشئدندن سورا، عئسا قالدیغی یرده ائکی گون ده قالدی.
7اوندان سورا شاگئردلرئنه ددی: «گلئن گئنه یهودئیه دئیارینا گدک.» 8شاگئردلری اونا ددئلر: «اوستاد، یهودئلر سنی داشلاماق ائستهیئردئلر و ائندی سن گئنه اورایا گدئرسن؟!» 9عئسا جاواب وردی: «مگر بئر گون اونائکی ساعات دیئل؟ گوندوزده یرئین آدام سوروشمز، چونکی بو دونیانین ائشیغیندا گؤرور. 10آمّا گجه قارانلیغیندا گزن آدامدیر کی، ائشیغی اولمادیغینا گؤره سوروشر.» 11عئسا بو سؤزلری دئیندن سورا اولارا ددی: «دوستوموز ائلعازر یوخویا گدئب. گدئرم اونی یوخودان اویادام.» 12شاگئردلر اونا ددئلر: «آغا، اگر یوخویا گتمئش اولسا، توختایاجاق.» 13عئسا ائلعازرئن اؤلوموندن دانیشیردی، آمّا اولار اله گومان الهدئلر کی، اونون قصدی یوخودان حاصئل اولان دئنجَلمک دئر. 14اونون اوچون ده عئسا آچیقجا اولارا ددی: «ائلعازر اؤلوبدور. 15سئزئن ائمان گتئرمهیئز اوچون اوردا اولمادیغیما گؤره چوخ سوئنئرم، آمّا گلئن ائندی اونون یانینا گدک.» 16پس «اکئز» آدی اولان توماس او بئری شاگئردلره ددی: «گلئن بئز ده اونونان گدئب اونونان بئرلئکده اؤلک.»
قئیامت و حیات منم
17عئسا بیتعنیایا یاخینلاشاندا، ائلعازرئن قبئره قویولماسیندان دؤرد گون کچئردی. 18بیتعنیانین اورشلئمدن یاریم آغاجدان آز آراسی وار ائدی. 19یهودئلردن چوخلاری مریم و مارتانین یانینا گلمئشدئلر کی، قارداشلارینین اؤلومی اوچون اولارا تسلّی ورسئنلر. 20مارتا عئسانین گلدئیئنی اشئدن واخت، اونون قاباغینا چیخدی، آمّا مریم اِوده اوتورموشدی. 21مارتا عئسایا ددی: «آغا، اگر بوردا اولسایدین، قارداشیم اؤلمزدی. 22آمّا بئلئرم کی حتّا ائندی ده، تاریدان هر نه ائستیهسن، تاری سنه ورهجک.» 23عئسا اونا ددی: «قارداشین گئنه دئرئلهجک.» 24مارتا اونا ددی: «بئلئرم کی، قئیامت گونونده، او آخیر گونده گئنه دئرئلهجک.» 25عئسا اونا ددی: «قئیامت و حیات منم. منه ائمان گتئرن اؤلسه ده، یاشایار. 26و یاشایان هر کس منه ائمان گتئرسه، اصلا اؤلمز؛ آیا بونا ائنانیرسان؟» 27مارتا اونا ددی: «بلی یارب، ائنانمیشام کی، وعده ورئلن مسئح سنسن؛ او تارینین اوغلی کی، اونون بو دونیایا گلهجهیی قاباقدان خبر ورئلئب.»
28بونی دئیندن سورا گدئب باجیسی مریمی گئزلئجه چاغیردی و اونا ددی: «اوستاد بوردادیر و سنی چاغیریر.» 29مریم بونی اِشئدنده تلهسئک قالخیب عئسانین یانینا گتدی. 30عئسا حله کنده گئرمهمئشدی و مارتا ائنن راستلاشان یرده ائدی. 31مریم ائنن اِوده اوتوران یهودئلر و اونا تسلّی ورنلر مریمئن تلهسئک قالخیب گتدئیئنی گؤرنده اونون دالیسیجا گتدئلر و گومان الهیئردئلر کی، گدئر قبئرئن اوستونده آغلاسین. 32مریم عئسانین اولدوغی یره گلدی و اونی گؤرنده اونون آیاقلارینا دوشوب ددی: «آغا، اگر بوردا اولسایدین، قارداشیم اؤلمزدی.» 33عئسا، مریم و اونونان گلن یهودئلرئن آغلادیغینی گؤرنده روحونی قم باسدی و اورهیی سیخیلدی. 34و ددی: «اونی هارایا قویوبسوز؟» اولار عئسایا ددئلر: «آغا، گل اؤزون گؤر.» 35عئسا آغلادی. 36بونا گؤره یهودئلر ددئلر: «گؤر ائلعازری نه قدر سوئردی!» 37آمّا اولاردان بعضئلری ددئلر: «آیا کور آدامین گؤزلرئنی آچان بو آدام، او کئشئنئن اؤلومونه مانع اولا بئلمزدی؟»
ائلعازرئن دئرئلمه سی
38عئسانین روحونی گئنه قم باسدی و قبئرئن یانینا گلدی. قبئر بئر ماغارا ائدی و گئرئش آغیزینی بئر داش توتموشدی. 39عئسا ددی: «داشی گؤتورون.» اؤلهنئن باجیسی مارتا اونا ددی: «آغا، ائندی او قوخویور. اؤلوموندن دؤرد گون کچئر.» 40عئسا مارتایا ددی: «دمهدئم اگر ائمان گتئرهسن، تارینین جلالینی گؤررسن؟!» 41او واخت ماغارانین آغیزینی توتان داشی گؤتوردولر و عئسا گؤزلرئنی گؤیه قالخیزیب ددی: «آتا، منی اشئتدئیئن اوچون سنه شوکور الهیئرم. 42بئلئردئم کی، سن همئشه منی اشئدئرسن، آمّا بوردا دوران جاماعات اوچون ددئم کی، سنئن منی گؤندَردئیئنه ائمان گتئرسئنلر.» 43و بو سؤزلری دئیندن سورا اوجا بئر سس ائنن چاغیردی: «ائلعازر، اشئیه گل!» 44او اؤلَن آدام ال-آیاغی کفن ائچئنده باغلی و اوزی دسمال ائنان سرئلمئش اشئیه چیخدی. عئسا اولارا ددی: «اونی آچین. قویون گتسئن.»
یهودئلر عئسانی اؤلدورمک اوچون اللشئرلر
45او زامان مریمئن یانینا گلَن یهودئلرئن چوخلاری، عئسانین بو ائشئنی گؤرَنده اونا ائمان گتئردئلر. 46آمّا اولاردان بعضئلری فرئسئلرئن یانینا گدئب، عئسانین الهدئیی ائشلرئنی اولارا خبر وردئلر. 47بو سببدن معبدئن باش کاهئنلری و فرئسی فئرقهسئنئن عالئملری شورا قوروب ددئلر: «نه اله یک؟ بو آدام بئر چوخ علامتلر گؤرسهدئر؟ 48اگر اونی بله اؤز-باشینا بوراخاق، هامی اونا ائمان گتئرهجک و روملولار دا گلئب هم موقدّس یرئمئزی، هم ده مئلّتئمئزی یوخ الئیهجکلر.» 49آمّا اولاردان بئری قیافا، همن ائلئن باش کاهئنی، اولارا ددی: «سئز هچ بئر شی بئلمئرسئز. 50مگر دوشونمورسوز کی، خالق یولوندا بئر آدامین اؤلمهسی بئزئم اوچون بوتون خالقین محو اولماسیندان داها یاخشیدیر؟!» 51قیافا بو سؤزی اؤزوندن دمئردی. قیافا همن ائلئن باش کاهئنی ائدی کی، نبئلئک الهیئب قاباقجادان خبر وردی کی، عئسا، مئلّت یولوندا اؤلهجک. 52و فقط او مئلّت یولوندا یوخ، بلکی تارینین داغیلان اؤولادلاری یولوندا دا کی، اولاری بئر یره ییغیب هامیسینی بئر الهسئن. 53اله او گوندن اونی اؤلدورمک اوچون مصلحتلشدئلر.
54اونون اوچون عئسا آرتیق یهودئلر آراسیندا آچیقجا گزمئردی، بلکی اوردان آیریلیب، کؤشنه یاخین اِفرایئم آدیندا بئر شهره گتدی و شاگئردلری ائنن اوردا قالدیلار.
55یهودئلرئن مایاسیز چؤرک پاسخا بایرامی یاخینلاشیردی. اونون اوچون ده چوخ آداملار اؤزلرئنی طاهئر الهمک رسمی اوچون بایرامدان قاباق هر یردن، اوزاقدان-یاخیندان اورشلئم شهرئنه گتدئلر. 56اولار عئسانی آختاریردیلار و معبدده بئربئرلرئنه دیئردئلر: «سئز نه دوشونورسوز؟ آیا او، بایرام اوچون گلهجک؟» 57چونکی معبدئن باش کاهئنلری و فرئسئلر امر ورمئشدئلر کی، عئسانین یرئنی بئلنلر، اونون یاخالانماسی اوچون گرک هاردا اولدوغونی اولارا خبر ورسئنلر.
اکنون انتخاب شده:
یوحنّا روایت 11: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
