حوارئلرئن ائشلری 7
7
استئفانین نوطقی
1او واخت لاپ بؤیوک کاهئن ددی: «بو شیلر دوزدور؟»
2استئفان ددی: «منه قولاق آسین، ای قارداشلار و آتالار! جلال تاریسی، آتامیز ائبراهئم پیغمبره حاران شهرئنده ساکئن اولمادان قاباق، حله بیناَلنهرِینده یاشایاندا، گؤروندی 3و اونا ددی: ”اؤز اؤلکندن و قوحوملارینین آراسیندان، چیخ و سنه گؤرسدهجهیئم اؤلکهیه گت.“
4او زامان ائبراهئم کلدانئلرئن اؤلکهسئندن چیخیب، حاراندا ساکئن اولدی و آتاسی اؤلندن سورا، تاری اونی ائندی یاشادیغیز بو اؤلکهیه کؤچورتدی. 5و اوردا اونا بئر آیاق قویماق یری بله مئراث ورمهدی. آمّا گئنه ده، حله اوشاغی اولمایان حالدا، وعده وردی کی، اورانی اونا و اوندان سوراکی نسلئنه مولک ورهجک. 6تاری ائبراهئمه ددی کی: ”سنئن نسلئن اؤزگه بئر اؤلکهده قرئب اولاجاق و دؤرد یوز ائل اولاری قول الهیئب، اولارا جفا چکدئرهجکلر.“ 7تاری بونی دا ددی: ”من اؤزوم، اولاری اسارته چکن مئلّته حؤکم الئیهجهیم و اوندان سورا اوردان چیخیب بو یرده منه خئدمت الئیهجکلر.“ 8تاری ائبراهئمه ختنه عهدئنی وردی و بله ده ائبراهئم ائسحاقین آتاسی اولوب، سکّئزئنجی گونده اونی ختنه الهدی. ائسحاق دا یعقوبون، یعقوب دا اونائکی بؤیوک اجدادلارین آتاسی اولدی.
9«و اجدادلار یوسئفه پاخیلّیق الهیئب اونی مئصئره ساتدیلار، آمّا تاری اونونان ائدی 10و اونی بوتون فلاکتلرئندن خئلاص الهیئب، مئصئر پادشاهی فئرعونون نظرئنده اونا لوطف و حئکمت عطا الهدی. فئرعون دا اونی مئصئرئن و بوتون اِو اهلئنئن اوستونه ریئس تعیئن الهدی.
11«سورا بوتون مئصئر و کَنَعان اؤلکهسئنه آجلیق و بؤیوک فلاکت گلدی و آتالاریمیز یمک تاپا بئلمئردئلر. 12آمّا یعقوب مئصئرده غلّه اولدوغونی اشئدن واخت، آتالاریمیزی ائلک دفه اورایا گؤندَردی. 13ائکئنجی دفه اولار گلنده، یوسئف قارداشلارینا اؤزونی تانیتدی و یوسئفئن طایفاسی فئرعونا بلّی اولدی. 14و یوسئف گؤندَرئب آتاسی یعقوبی و بوتون قوحوم-اَقرباسینی کی، یتمئش بش آدام ائدئلر دعوت الهدی. 15یعقوب دا مئصئره کؤچدی و اوردا او و آتالاریمیز اؤلدولر؛ 16و شِکِمه گتئرئلئب او مقبرهیه قویولدولار کی، ائبراهئم اونی شِکِمده، خمورون اوغوللاریندان پول ائنان آلمیشدی.
17«آمّا تارینین ائبراهئمه وردئیی وعدهنئن واختی یاخینلاشان حالدا، خالق مئصئرده آرتدی و چوخالدی. 18او واختا قدر کی، مئصئر تختئنه یوسئفی تانیمایان آیری بئر پادشاه چیخدی. 19بو پادشاه ائدی کی، خالقیمیزا حئیله قوروب آتالاریمیزا جفا چکدئردی و اولاری مجبور الهدی کی کؤرپه اوشاقلارینی چؤله آتسینلار اله کی دئری قالماسینلار.
20«همن بو زاماندا موسا آنادان اولدی؛ او تارینین نظرئنده چوخ جاناسئنَن ائدی. موسا اوچ آی آتاسی اِوئنده بؤیودولدی. 21و چؤله آتیلاندان سورا، فئرعونون قیزی اونی گؤتوروب اؤز اوغلی کئمی بؤیوتدی. 22موسا مئصئرلیلرئن بوتون علمئنده تربئیت اولدی. او سؤزلرئنده و عمللرئنده قودرتلی بئری اولدی.
23«آمّا قیرخ یاشینا یتئشنده اورهیئنه دوشدی کی، اؤز قارداشلاری یعنی ائسرایئل اوغوللارینا باش چکسئن. 24اولاردان بئرئنه حاقسیزلیق اولوندوغونی گؤرن واخت، اونون کؤمهیئنه چیخدی و حاقسیزلیق الهین مئصئرلئنی اؤلدوروب، مظلومون قئصاصینی آلدی. 25او اله دوشونوردی کی، قارداشلاری آنلایاجاقلار کی، تاری اونون اَلی ائنن اولارا نئجات ورمک ائستهیئر. آمّا اولار باشا دوشمهدئلر. 26او گونون صاباحی، ائکی نفر بئربئری ائنن ساواشان زامان، اولارا یاخینلاشدی و اولاری باریشدیرماغا اَللشئب، ددی: ”کئشئلر، سئز قارداشسیز، نه اوچون بئربئرئزی ائنجئدئرسئز؟“
27آمّا قونشوسونی ائنجئدن آدام، اونی ائتهلهیئب ددی: ”کئم سنی بئزئم اوستوموزه ریئس و حاکئم الهدی؟ 28دونَن مئصئرلئنی اؤلدوردویون کئمی، منی ده اؤلدورمک ائستهیئرسن؟“ 29موسا بو سؤزلری اِشئدنده، قاچدی و مئدیان اؤلکهسئنده قرئب اولدی و اوردا اونا ائکی اوغول دوغولدی.
30«قیرخ ائل کچندن سورا، چؤلده سئنا داغینین یاخینلیغیندا، بئر ملک، یانان بئر بوتانین آلوووندا موسایا گؤروندی. 31موسا بو منظرهنی گؤرَنده حیرتدن مات قالدی. باخماق اوچون یاخینلاشدیغی زامان، ربّئن سسی گلدی: 32”من سنئن آتالارینین تاریسییام؛ ائبراهئمئن تاریسی، ائسحاقین تاریسی و یعقوبون تاریسی.“ موسا قورخودان تئترهیئب اورایا باخماغا جورعت الهمهدی.
33رب اونا ددی: ”آیاقلاریندان باشماغینی چیخارت، چونکی دوردوغون یر موقدّسدئر. 34دوغرودان دا کی، من مئصئرده اولان خالقیمین چکدئیی جفاسینی گؤرموشم و اولارین نالهلرئنی اشئتمئشم و نازئل اولموشام کی، اولاری خئلاص الهیئم. ائندی گل، من سنی مئصئره گؤندَرهجهیم.“
35«همن بو موسا کی، اولار ردّ الهیئب دیئردئلر: ”کئم سنی بئزه ریئس و حاکئم تعیئن الهدی“، اله اودور کی، تاری، یانان بوتانین ائچئنده، اونا گؤرونن ملهیئن واسئطهسی ائنن، اونی هم ریئس، هم ده نئجات ورن گؤندَردی. 36بو کئشی مئصئر اؤلکهسئنده، قیرمیزی دهنزده و قیرخ ائل ده چؤلده مؤجوزهلر و علامتلر گؤرسدمک ائنن اولاری خئلاص الهدی.
37«بو همن موسا ائدی کی، ائسرایئل اوغوللارینا ددی: ”تاری قارداشلاریزین آراسیندان سئزه منئم کئمی بئر پیغمبر یوللایاجاق.“ 38بو اله اودور کی، چؤلده کی جاماعات ائچئنده، آتالاریمیز ائنان و سئنا داغیندا اونونان دانیشان ملک ائنن ائدی و حیات ورن احکامی آلدی کی بئزه ورسئن.
39«آتالاریمیز ائستهمئردئلر کی، اوندان ائطاعت الهسئنلر و اونی ردّ الهیئب اورَکلرئنده مئصئره دؤندولر. 40اولار هارونا ددئلر: ”بئزه آللاهلار دوزَلت کی، قاباغیمیزدا گتسئنلر، چونکی بئلمئرئک کی، بئزی مئصئردن چیخاردان بو موسانین باشینا نه گلئب.“ 41او گونلرده دانا شکلئنده بئر بوت دوزَلتدئلر و بو بوته قوربان تقدئم الهدئلر و اؤز اَللرئنئن دوزلتدئیی بوت اوچون شادلیق الهیئردئلر. 42آمّا تاری اولاردان اوز دؤندَردی و اولاری بوراخدی کی، گؤیدهکی جئسملره پرستئش الهسئنلر؛ نجه کی، پیغمبرلرئن کئتابیندا یازیلیب:
«”ای ائسرایئل نسلی، قیرخ ائل چؤلده،
مگر کسدئیئز و قوربان الهدئیئز حیوانلاری منه تقدئم الهیئردئز؟
43سئز مولوک بوتونون چادیرینی و رومفا بوتونون اولدوزونی اؤزوز ائنن گؤتوردوز کی،
اولارا پرستئش الئیهسئز.
من ده سئزی بابئلدن داها او یانا کؤچوردهجهیم.“
44«چؤلده آتالاریمیزین شهادت خیمهسی وار ائدی. نجه کی، موسایا دانیشیب هئدایت الهمئشدی کی، گؤردویی نومونهیه گؤره بئنا الهسئن. 45آتالاریمیز دا کی، او خیمهنی قبول الهمئشدئلر، یوشع ائنن برابر قیرییهودئلرئن مولکونی ضبط الهینده اونی اورایا گتئردئلر؛ او مئلّتلری کی، تاری آتالاریمیزین قاباغیندان قوودی. او خیمه داوودون زامانینا کئمی اوردا قالدی. 46داوود تارینین نظرئنده لوطف تاپیب درخواست الهدی کی، یعقوبون تاریسینا بئر مسکن حاضیرلاسین. 47آمّا تارییا اِو تئکن سولیمان پادشاه ائدی.
48«آمّا حاق-تاعالا، اَل ائنن تئکئلن اِوده ساکئن اولماز، نجه کی، اشعیا پیغمبر ده دیئر:
49«”رب دیئر:
’گؤی منئم تختئمدئر، یر ده آیاقلاریما کتئلدئر!
منه نه جور اِو دوزَلدهجکسئز،
و منئم راحاتلیغیم اوچون هاردا یِر وار؟
50مگر بوتون بولاری یارادان، منئم اَلئم دیئل؟‘“
51«ای بوینی یوغونلار، ای اورَک و قولاقلاریندا ختنه اولونمامیشلار! آتالاریمیز کئمی، سئز ده همئشه موقدّس روحا ضئدّ چیخیرسیز. 52آتالاریز پیغمبرلرئن هانسینی ائنجئتمهدئلر؟! اولار حتّا او پیغمبرلری کی او صالح اولانین گلهجهیئنی قاباقجادان خبر ورمئشدئلر اؤلدوردولر؛ سئز ده ائندی اونا خیانت الهینلر و اونی اؤلدورنلر اولوبسوز. 53سئز کی، ملکلرئن واسئطهسی ائنن ورئلن شرئعتی آلدیز، گئنه ده اولاری رئعایت الهمهدئز.»
استئفانین داشا باسیلیب، اؤلمهسی
54اولار، بو سؤزلری اشئدن واخت، چوخ حئرصلندئلر و اونون ضئدّئنه دئشلرئنی قیجیرتدیلار. 55آمّا استئفان موقدّس روح ائنان دولوب گؤزلرئنی گؤیه دئکدی و تارینین جلالینی و عئسانی تارینین صاغ طرفئنده دورموش گؤردی. 56استئفان ددی: «باخین، گؤیلری آچیلمیش و ائنسان اوغلونی تارینین صاغیندا دورموش گؤرورم!»
57آمّا اولار برکدن باغیریب، قولاقلارینی توتدولار و بئرلئکده اونون اوستونه یوگوردولر. 58اونی شهردن قیراغا چیخاردیب، داشلادیلار و شاهئدلر اؤز پالتارلارینی شاعول آدیندا بئر جاوانین آیاقلاری یانینا قویدولار.
59اولار استئفانی داشلایاندا، استئفان دوعا الهیئب ددی: «یارب عئسا، روحومی قبول اله!» 60و دئزی اوستونه دوشوب اوجا سَس ائنن باغیردی: «یارب، بو گوناهی اولارین بوینونا قویما!» و بونی دیئب، گؤزونی بو حیاتا یومدی.
اکنون انتخاب شده:
حوارئلرئن ائشلری 7: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
