حوارئلرئن ائشلری 27
27
پولوس روما گؤندَرئلئر
1اوندا کی تصمیم توتدولار گمی ائنن ائتالیایا گدک، پولوس و نچه اؤزگه زئندانیلری ائمپِراطور لشکرئنئن جولئیوس آدیندا بئر افسرئنه تحوئل وردئلر. 2بئز بئر گمئیه کی اَدِرمئت شهرئندن ائدی و آسئیا منطقهسئنئن بندلرئنه گدئردی مئنئب، دهنزه چیخدیق. مقدونئیّهدن تسالونئکلی اَرئسترخوس دا بئز ائنن ائدی.
3او گونون صاباحی صئدون شهرئنه یتئشدئک. جولئیوس پولوسا لوطف گؤرسهدئب اونا ائجازه وردی کی، دوستلارینین یانینا گتسئن و اولار بئر آز اونا یتئشسئنلر. 4اوردان گئنه یولا دوشدوک و اونا گؤره کی کولک بئزئم اوزوموزه طرف اسئردی، قئبرئسئن او قیراغیندان کی اورانی یل توتموردی کچدئک. 5کئلئکئیا و پامفئلئیه بندرلرئنئن ساحئلئندن کچندن سورا، لئسئیا وئلایتئنئن مئرا ساحئلئنه گلدئک. 6اوردا افسر، بئر گمی تاپدی کی ائسکندرئیه شهرئندن ائتالیایا گدئردی و بئزی اونا مئندئردی. 7بئر نچه گون یاواش سورعت ائنن گتدئک و گوج ائنن قنئدوس ساحئلئنئن یانینا یتئشدئک. یل بئزئم اؤزوموزه طرف اسدئیئنه گؤره سالمون شهری طرفئندن کرئته سوردوک. 8چتئنلئک ائنن اوندان کچئب «گؤزل بندرلر» دیئلن بئر یره چاتدیق کی، لاسیا شهری بو یره یاخین ائدی.
9چوخ واخت کچدئیئنه گؤره و اوروج گونی ده باشا چاتدیغینا گؤره، آرتیق دهنزده سفره چیخماغین چوخ خطری وار ائدی. اودور کی، پولوس اولارا نصئحت ورئب، 10ددی: «کئشئلر، گؤرورم کی، دهنزده سفره چیخماق آنجاق یوک و گمی اوچون یوخ، بلکی بئزئم حیاتیمیز اوچون ده خطرلیدئر و چوخ ضرره باعئث اولاجاق.» 11آمّا افسر پولوسون سؤزوندن چوخ، گمئنئن سوکّانچیسینا و صاحئبئنه اعتئماد الهیئردی. 12قیشی کچئرتمهیه او بندر موناسئب اولمادیغینا گؤره، گمئدهکئلرئن اکثرئیّتی بو قرارا گلدئلر کی، اوردان چیخیب، بئر نحو ائنن فئنئکس بندرئنه چاتسینلار و قیشی اوردا کچئرتسئنلر. بو بندر کرئت جزئرهسئنده ائدی و جنوب-قربه و شئمال-قربه ساری ائدی.
دهنزده کولک
13جنوب یلی یاواشجا اَسمهیه باشلایاندا، اولار گومان الهدئلر کی قصدلرئنه یتئشئبلر. پس لنگری قالخیزدیلار و کرئت ساحئلی بویی یولا دوشدولر. 14آمّا چوخ چکمهدی کی، جزئرهدن شئدّتلی بئر کولک اسدی. او کولهیه اوراکلئدون دیئلئردی. 15گمی کولهیه دوشدی و کولهیه موقاوئمت گؤرسده بئلمهدئیئندن، بئز ده تسلئم اولوب سورونوردوک. 16کلودا آدیندا کئچئک بئر جزئرهنئن یاخینلیغیندا، گمئنئن قاییغینی گوج ائنن ساخلایا بئلدئک. 17قاییغی یوخاری چکندن سورا، اسبابلاردان ائستئفاده الهیئب، گمئنئن آلتینی باغلادیلار، اله کی قیریلماسین. سورا بونون قورخوسوندان کی اولمایا گمی سئرتئسئن داهازلیغیندا قوملوقا اوتورا، لنگری اندئردئلر و بله ده گمی کولک ائنن سورونوردی. 18او گونون صاباحی حله شئدّتلی کولهیئن اسئری ائدئک کی، گمئنئن یوکونی دهنزه آتماغا باشلادیلار. 19اوچونجی گون ده اؤز اَللری ائنن گمئنئن تجهئزاتینی آتدیلار. 20بئر نچه گون، گونش و اولدوزلار گؤرونمهدی و بو بؤیوک کولک بئزئم اوستوموزدن آزالمادی، آرتیق نئجات تاپماغیمیز اوچون بوتون اومئدلر کسئلدی.
21اوزون زامان یمک یمَدئکلرئندن سورا، پولوس اورتادا دوروب ددی: «کئشئلر، سئز گرک منئم نصئحتئمی قبول الهیئب، کرئتدن دهنزه چیخمایدیز و بو ضرر و زئیانی چکمَیدئز. 22آمّا ائندی سئزی تشوئق الهیئرم کی، جسارتئزی اَلدن ورمهیئن. چونکی آرازدا هچ بئر تلفات اولمایاجاق، آنجاق گمی الدن گدهجک. 23چونکی اله بو گجه عایید اولدوغوم و اونا خئدمت الهدئیئم تارینین بئر ملهیی قاباغیمدا دوروب، 24ددی: ”قورخما، پولوس! سن گرک ائمپراطورون حوضوروندا دایاناسان. باخ، تاری، سن ائنن گمئده گدنلرئن هامیسینی سنه عطا الهیئب.“ 25اونا گؤره ده، کئشئلر، جسارتئزی اَلدن ورمهیئن. چونکی تارییا ائنانیرام کی، دقئقن منه دیئلن کئمی اولاجاق. 26آمّا لازیمدیر کی بئزئم گمی بئر جزئرهده قوملوقا باتسین.»
گمئنئن سینماغی
27اون دؤردونجی گون گلدئیی واخت، بئز آدِریاتئک دهنزئنده سورولونوردوک کی، گجه یاریسینا یاخین، گمئچئلر قورولوغون یاخینلاشدیغینی حئسّ الهدئلر. 28درئنلئیی اؤلچوب قیرخ متر اولدوغونی گؤردولر. بئر آز ائرهلئده گئنه اؤلچوب اوتوز متر اولدوغونی گؤردولر. 29قایالیقدا قوملوقا اوتورماق قورخوسوندان گمئنئن آخیریندان دؤرد لنگر آتیب، دوعا الهدئلر کی تزلئک ائنن سحر اولسون. 30گمئچئلر گمئدن قاچماغا اَللَشدئلر و گمئنئن قاباق طرفئندن لنگرلری آتماغی بهانه الهیئب، قاییغی دهنزه اندئردئلر. 31پولوس افسر و سربازلارا ددی: «اگر بولار گمئده قالماسالار، سئز نئجات تاپا بئلمزسئز.» 32او واخت سربازلار قاییغین ائپلرئنی کسئب قاییغی دهنزه سالدیلار.
33سحر عنقرئب آچیلاجاق ائدی کی، پولوس هامینی یمک یمهیه تشوئق الهیئب ددی: «آرتیق اون دؤرد گوندور کی، آج قارین گودوبسوز و بئر شی یمهیئبسئز. 34بونا گؤره سئزی تشوئق الهیئرم کی، یمک یئیهسئز؛ بو، قویماز کی، قووّتئزی اَلدن ورهسئز، چونکی هچ بئرئزئن باشیندان بئر توک بله محو اولمایاجاق.» 35بونی دئیندن سورا چؤرک گؤتوروب، هامینین گؤزی قاباغیندا تارییا شوکور الهدی و اونی بؤلوب یمهیه باشلادی. 36اولارین هامیسی اورَکلهنئب، یمک یدئلر. 37گمئده هامیمیز ائکی یوز یتمئش آلتی نفر ائدئک. 38اولار یمکدن دویاندان سورا، بوغدانی دهنزه آتیب، گمئنی یونگوللَشدئردئلر.
39سحر آچیلدیقدا قورولوغی تانییا بئلمهدئلر؛ آنجاق قوملی ساحئلی اولان بئر جزئره گؤردولر و قرار وردئلر کی، اگر مومکون اولسا، گمئنی اوردا اوتوردالار. 40لنگرلری کسئب دهنزه بوراخدیلار و سوکّانین ائپلرئنی آچدیلار. سورا قاباق لنگری یل سمتئنه قالخیزدیلار و ساحئل طرفئنی توتوب گتدئلر. 41آمّا ائکی دهنزئن بئربئرئنه بئرلَشدئیی یرده قورولوغا دَیئب، قوملوقا اوتوردولار. گمئنئن قاباق طرفی قوما باتیب حرکتسئز قالدی، آمّا دال طرفی شپهلرئن گوجوندن سینماغا باشلادی.
42سربازلار قصد الهمئشدئلر کی، زئندانی لرئن هامیسینی اؤلدورسونلر، اِله کی، هچ بئرئسی اوزوب قاچا بئلمهسئن. 43آمّا افسر پولوسون سالامات قالماسینی ائستهیئردی. بونا گؤره ده اولارین قصدئنه مانع اولدی و امر الهدی کی، اوّل اوزه بئلنلر گمئدن آتیلیب قورولوغا چاتسینلار. 44و قالانلاری دا بعضئلری تاختالار اوستونده، بعضئلری ده گمئنئن آیری پارچالاری اوستونده اؤزلرئنی قورولوغا یتئرسئنلر. اله بله هامی سالامات قورولوغا یتئشدی.
اکنون انتخاب شده:
حوارئلرئن ائشلری 27: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
