حوارئلرئن ائشلری 2
2
پنطئکاست گونی
1پنطئکاست گونی گلنده، اولارین هامیسی بئرلئکده بئر یرده ائدئلر. 2بئردن گوجلی بئر یل اَسن کئمی، گؤیدن بئر سس گلدی و اوتوردوقلاری اِوئن هر یانینی دولدوردی. 3اوندا، اولار آلوولارا بنزهر اود آلوولاری گؤردولر کی بؤلونوب، اولارین هر بئرئسئنئن اوستونه قوندی. 4و اولارین هامیسی تارینین موقدّس روحی ائنن دولدولار و روح اولارا دانیشماق قودرتی وردی و اولار باشقا دئللرده دانیشماغا باشلادیلار.
5او گونلرده، دئندار یهودئلر گؤیون آلتیندا اولان هر مملکتدن گلئب اورشلئمده یاشاییردیلار. 6بو سَس باشورن زامان، جاماعات بئر یره ییغیلیب حیران قالدیلار؛ چونکی هر بئری اولارین اونون دئلئنده دانیشدیقلارینی اشئدئردی. 7اولار مات قالیب و حیرت ائچئنده دیئردئلر: «باخ، مگر بو دانیشانلارین هامیسی جلئللی دیئللر؟! 8بس نجهدئر کی، اؤز آنا دئلئمئزی اشئدئرئک؟! 9بئز پارتلیلار، مادلیلار، عِیلاملیلار، مِسوپوتامئیادا، یهودئیهده، کاپادوسئیادا، پونطوس و آسئیادا، 10فئرئجئیه و پامفئلئیهده، مئصئرده، لئبیانین کرِنیا بؤلگه سئنده یاشایانلار، رومدان گلن قرئبلر، 11هم یهودئلر، هم ده یهود دئنئنه دؤنَنلر، کرئتلیلر و عربلر، هامیمیز اشئدئرئک کی، بولار بئزئم دئلئمئزده تارینین قووّتلی ائشلری حاقّیندا دانیشیرلار.» 12و اولارین هامیسی مات قالیب، بؤیوک حیرت ائچئنده بئربئرلرئنه دیئردئلر: «بو نه اولا بئلر؟»
13آمّا بعضئلری ده اَله سالیب دیئردئلر: «بولار شرابدان کفلی اولوبلار.»
پطروسون وعظی
14آمّا پطروس او «اون بئر» نفر ائنن دوردی و سَسئنی اوجالدیب اولارا خئطاب الهدی: «ای یهودئلر، و ای بوتون اورشلئمده یاشایانلار! بونی بئلئن و ددئیئم سؤزلره قولاق آسین. 15بو آداملار سئزئن گومان الهدئیئز کئمی کفلی دیئللر، چونکی ائندی گوندوز ساعات دوقّوزدور! 16بلکی بو اله اوسؤز دور کی، یوئل پیغمبرئن واسئطهسی ائنن دیئلئب:
17”تاری دیئر: آخیر گونلرده
اؤز روحومدان بوتون بشر اوستونه تؤکهجهیم؛
اوغوللاریز و قیزلاریز نبئلئک الئیهجکلر،
جاوانلاریز رؤیالار،
قوجالاریز دا یوخولار گؤرهجکلر؛
18او گونلرده
حتّا قوللاریمین و کنئزلرئمئن اوستونه ده
اؤز روحومدان تؤکهجهیم
و اولار نبئلئک الئیهجکلر.
19یوخاریدا، گؤیده بؤیوک عجایئبلر،
و آشاغی دا، یر اوزونده علامتلر گؤرسدهجهیم؛
قان، اود و توستی دومانی.
20ربّئن او بؤیوک و شؤوکتلی گونی گلمهمئشدن قاباق
گون قارانلیغا،
آی دا قانا دؤنهجک.
21و اله اولاجاق کی، هر کئم ربّئن آدینی ذئکر الهسه، نئجات تاپاجاق.“
22ای ائسرایئللیلر، بو سؤزلری اشئدئن: نجه کی، اؤزوز ده بئلئرسئز، ناصئرهلی عئسا بئر آدام ائدی کی، تاری اونون واسئطهسی ائنن آرازدا یاراتدیغی مؤجوزهلر، عجایئبلر و علامتلر ائنن اونی تصدئق الهدی، 23بو آدام، تارینین موعیّن اولونموش نقشه سئنه و قاباقجادان بئلن علمئنه گؤره سئزه تسلئم اولوندی و سئز شرئعتسئز آداملارین اَلی ائنن اونی چارمیخا چکئب، اؤلدوردوز. 24تاری اونی اؤلوم عذابلاریندان قورتاریب، دئرئلتدی، چونکی مومکون دیئلدی کی، اؤلوم اونی توتا بئلسئن. 25اله اوجور کی، داوود پادشاه اونون حاقّیندا دیئر:
«”ربّی دائم گؤزومون قاباغیندا قویموشام؛
چونکی او، منئم صاغیمدادیر کی، اَسمهیئم.
26اونون اوچون ده، اورهیئم سوئنئر، دئلئم ده شادلیق الهیئر؛
حتّا بدنئم ده اومئد ائچئنده ساکئن اولاجاق.
27چونکی سن، جانیمی اؤلولر دئیارینا بوراخمازسان،
موقدّسئنی ده چورومهیه قویمازسان.
28حیات یوللارینی منه بئلدئرئبسن؛
اؤز حوضورون ائنان سن منی شادلیق ائنان دولدوراجاقسان.
29ای قارداشلار، سئزه بؤیوک آتامیز داوود پادشاهین حاقّیندا آچیقجا دئیهبئلرم کی، هم اؤلدی، هم ده باسدیریلدی و قبئری بو گونه قدر آرامیزدادیر. 30آمّا او پیغمبر اولدوغونا گؤره، بئلئردی کی، تاری اونا آند ائچئب کی، جئسمه گؤره اونون نسلئندن بئرئنی، اونون تختئنده اوتورداجاق. 31او گلهجهیی گؤروب وعده ورئلن مسئحئن دئرئلمهسی حاقّیندا ددی کی، او نه اؤلولر دئیاریندا ترک اولوندی، نه ده بدنی چورودی. 32بو عئسانی، تاری تزهدن دئرئلتدی و بئز هامیمیز اونون شاهئدلرئیئک. 33بله ده، تارینین صاغ طرفئنه اوجالدیلیب، وعده ورئلمئش موقدّس روحی آتادان آلدی و ائندی، گؤردویوز و اشئتدئیئز کئمی، بو روحی اوستوموزه تؤکوب. 34چونکی گؤیلره قالخان، داوود پادشاه دیئلدی، آمّا او اؤزی بله دیئر:
”رب منئم ربّئمه ددی:
صاغیمدا اوتور،
35او زاماناجاق کی، من دوشمنلرئنی آیاقلارینین آلتینا سالام.“
36بونا گؤره ده، بوتون ائسرایئل خالقی بونی آرخایین بئلسئن کی، چارمیخا چکدئیئز بو عئسانی تاری هم رب، هم ده مسئح الهیئب.»
37اولار بونی اشئدن زامان، اورَکلرئنه اِلهبئل اوخ باتدی و پطروس و او بئری حوارئلره ددئلر: «قارداشلار، بس بئز نه الهیک؟»
38پطروس اولارا ددی: «تؤوبه الهیئن و هر بئرئز گوناهلاریزین باغیشلانماسی اوچون عئسا مسئحئن آدیندا تعمئد آلین؛ اوندا تارینین موقدّس روحونون عطاسینی آلارسیز. 39چونکی بو وعده سئزهدئر، اوشاقلاریزادیر، بوتون اوزاقدا اولانلارادیر؛ یعنی هر کسه کی بئزئم تاریمیز ربّ اونی چاغیرا.»
40پطروس داها چوخ سؤزلر ائنن اولارا شهادت وردی و اولاری تشوئق الهیئب ددی: «بو اَیری نسئلدن اؤزوزی قورتارین.» 41و سورا اونون سؤزونی قبول الهینلر تعمئد آلدیلار. اله او گون اوچ مئنه یاخین آدام اولارا قوشولدی.
ائمانلیلار آراسینداکی بئرلئک
42اولار اؤزلرئنی حوارئلرئن تعلئم و رفاقتئنه، چؤرک بؤلمه یه و دوعا الهمهیه وقف الهمئشدئلر. 43هامینین جانینا قورخی دوشموشدی و حوارئلرئن واسئطهسی ائنن چوخ عجایئبلر و علامتلر باش ورئردی. 44بوتون ائمان گتئرنلر بئر یرده ائدئلر و بوتون شیلره شرئک ائدئلر. 45اولار ماللار و مولکلرئنی ساتیب هر کسه احتئاجینا گؤره پایلاییردیلار. 46هر گون بئرلئکده معبده گتمکده داوام الهیئردئلر، اِولرئندهده چؤرک بؤلوب، شادلیق و صاف اورَک ائنن بئرلئکده یمک ییئردئلر. 47تارییا حمد الهیئردئلر و بوتون خالق یانیندا عزئز ائدئلر. رب ده گونبهگون نئجات تاپانلاری اولارین ساییسینا آرتیریردی.
اکنون انتخاب شده:
حوارئلرئن ائشلری 2: CAB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
