نامَه فیلیپی کلیسا را 1
1
1پولوس و تیموتائوس، کن مسیح عیسی وَزییَرین، طَرَفیکا،
بَه گِردِ شهر فیلیپیَه موقدَسِن کن مَسیح عیسی کاینَه، ناظیرِن و شَمّاسِن:
2فیض و صلح و سلامتی چَمَه دَدَ، خدا، و خداوند عیسی مسیح طَرَفیکا، شِمَه نَه ببو.
دِوا و شکر کردِ
3هَر موقِه شِمَه یاد آمَفَند، اِشتَن خدا شِکر باتیم 4و اوزون چمن گِردِ دِوا اونکا شِمَه گِردیرا خَشینَه دِوا بَکَم، 5اَ همکاری ایی خونه کن اَوَلَه روجیکا تا اومروج، اِنجیلی کاریکا هِستیرون. 6یَقین بموستیم اَ کن چاکَه کاری شِمَه دِلَکا شِروو کَردِشَه، تا مَسیح عیسی ویگَرستِه روجیرا، اَی تَمون آرَکَرد. 7اَز اِم حَقی بَداشتیمَه کن شِمَه گَردی خونِه اِنتَرَ حِسّی بِدارم، چیرا کن چمن دِلیکا جِگا بَداشتیرون؛ اِمی خونِه کن شِمَه گِرد بَمِنَه خدا فِیضیکا شَریکیرون، چِه چمن زیندان دگنِستِکا و چِه اِنجیلی دیفا کَردِ کا بِبوم و چَی حَییقتی ثابیت کَردِ کا. 8چون خدا شاهیدَ کن چنترَ ایحساسینَه کن عیسی مسیح کا سرچشمَه بَگَتی، شمَه گِردیرا ایشتیاق بَداشتیم.
9چمن دِوا اِمَه کن شِمَه موحبَت ویشتَر و وِرتَر آبو و کامیلَه اَلمند گیری و فَهمینَه دَرِ ببو، 10تا بِشاعَه اَ چیی ایی کن چاکترَ قبول بکرَ و مَسیح روجیکا پاجا و بی عَیب ببَه، 11صالِح بِه بَرَ کا پَتلمَه بِبَه کن عیسی مَسیح واسیطَنَه، خدا شکوه جَلالیرا تَمون آرَب.
اِنجیلی پیشرفت
12اَی برا اِن، اَپیمَه بِزنَه اَ چیی کن چمن سَر گِذَشتَه، واقییِن اِنجیلی پیشرَفتی باعیث آبَه، 13ایی جوری کن سَلطَنَتیَه کاخی نیگَبانونرا و گِردِ آدَمونرا دیار آبَه کن اَز مَسیح خونِه زیندانیکامَه؛ 14و چمن زیندان دگِنِسته باعیث آبَه کن ویشتَرِ برا اِن، خِداوَندیکا دِلی زِبق آکَن تا جورئَتینه، خدا کَلامی بی اِمکن بِتَرسِن بِواجِن.
15بَعضیِن زِرَ بردِ و زِرَ دوعِه خونه مَسیح موعیظَه بکَن، ولی بعضییِن نی چاکه نِیَّتینَه. 16اِم دِوومین کاولَه مُحبَتی خونِه اِنتَرَ بَکَنَه، چون بَموستینَه کن اَز اِنجیلی دیفا کَردِ خونِه اِم جِگاکام. 17اَمّا اَیِن زِرَ دوعِه خونِه مَسیح موعیظَه بکَن، نِه چاکَه نِییَّتینه، اِم خَیالینَه کن زیندانی دِلَکا بَمن عذاب دَرِن. 18پس چه؟ اِم مُهیمَّه کن هَر جوریَه، مَسیح ایلام ببو، چِه نِیت دِرِست ببو، چِه نادِرِست! و اَز اِمی خونِه خَشی بَکَمه.
ها و هَنی خَشی بَکَمَه، 19چون بَموستیمَه کن شِمَه دِوا اونَّه و عسیای مَسیح روح کاریَرینَه، اِمِن چمن رَخِستِه باعیث بَبین، 20هَته کن ایشتیاقینه اینتظار بَکَشتیم و اُمیدِم هِستَه کن هیچ چیکا سَر اَفکَندَ آنیمَب، بَلکَم کَامیلَه جورئَتینه، ایسَه نی اوزونی شیوار، مَسیح چمن تَنیکا جَلال بگَتی، چِه مَرگیکا و چِه زِندَگیکا. 21اِمی خونه کن مِرا زندَگی کَردِ مَسیحَه، و مَردِ مِرا بَرَیَه. 22اَگَم پی اِشتَن زندَگی اِم تَنیکا ایدامَه بِدَرم، اِم مِرا هِنتَه پور مِژدَ کاریَه. اِم حالینه نِمَشا واتِه کِرَم گِلَه اینتخاب بَکَم! 23اِم دِ وَصَطیکا برکَه چیمَه میمَه کامَه: چیرا کن طَمارزو دارِم اِم دِنیاکا بِشوم و مَسیح نَه بِبوم، اِمی خونه کن اِم خَیلی بِیتَرَ؛ 24اَمّا چمِن جندَکی زِندَ مَندِ شِمَه خونِه را واجیب تَرَ. 25چون اِمی چاک بموستیم کن شِمَه خَشی و پیشرَفتی خونه ایمانی دِلَکا، زِندَ بَمَندیمَه و شِمَه گِردینَه ایدامَه دَرِم، 26تا وقتی هَنی شِمَه وَربام، شِمَه ایفتخار مَسیح عیسی دِلَکا چمن خونِه ویشتَر و وِرتَر آبو.
27تاکَه بَرزَ شمه زندَگی رَوش، مسیح اِنجیلی شَئنیکا ببو، تا چِه بام و شِمَه بِوینِم و چِه نام، شمَکا درَسِم کن شمه ایلَه روح کا آمبَستیرون و یَک فکر، دوش بَه دوش اِنجیلی ایمانیرا تقلا بَکَرون، 28و هیچ چیی دِلَکا اَیِنی کا کن شمَه زِرَبَرا این متَرسَه، کن هِم چَوونرا نیفلَه آبِه دیارَنِشونَه یَه، ولی شمَرا نیجات گَتِه نشونَه یَه و اِم خدا کا اَ. 29چون اِم ایفتخار شِمَه نَصیب بَیَه کن نِه تاکَه مَسیح ایمان بوعَرَ، بَسکَم چَیرا رنج و عَذاب نی بِکَشَه. 30شِمَرا نی هَه جَنگِستِه ایی هِستَه، کن بَمن چَی دلَکا ویندِرون و ایسَه کان دَرَستِه کن هَنوزَنی بَیکا ویلاخیستَه ایم.
اکنون انتخاب شده:
نامَه فیلیپی کلیسا را 1: CTB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company