مَرقُس 1
1
تعمید اَدَرَ یحیی مَسیح راه آمادَ بَکَی
1اَ خَشَه خَبَر کن خدا زوعَه عیسی مسیح خونه اَ، اِنتَر شِروو بَبی.
2اَشعَیای پَیغَمبَری کیتاویکا نِوِشتَه آبَیَه:
«ایسَه اِشتَن قاصیدی بَتِکا بَه نَ رَونَه آمَکَرد،
اَ اِشتِه راه آمادَ آرَکَرد؛»
3«ایی نَفَر وَیاوونیکا لَسَّه بَژَیَه کن:
”خداوندی راه آمادَ بکَرَ!
چَی مَسیرون راستَه آکَرَ.“»
4پس تعمید اَدَرَ یَحیی وَیاوونیکا اَیر آبَه و آموج اَدَریَه کن مَردوم اِشتَن گِناخون بَخشِستِرا توبَه بِکَرن و غُسل تَعمید بیگِن. 5وِلَتِه یَهودیَه گِردِ آدَمِن و شَهرِ اورشَلیمی گِردِ اَهالی، یحیی وَر اَشینَه و اِشتَن گناخون ایتراف اَکَرینَه، و اوردونی رِباریکا یحیی بالینَه تَعمید اَگِرین. 6شندری کن یحیی درَکَریَه شِتِرَ پَشمَه کا سی آبَه بَه و چَرمینَه دالَه ایی مینیکا درَبَستیَه، و وَشتَک و وَیاوونیَه عَسل هَریَه. 7یحیی اییلام اَکَریَه و اَواجیَه: «چمن دوملَه، کَسی بومَیَه کن بَمنکا قودور تَر و مِرا لَیاقَت نیَه شَت آبوم و چَی پاغَبون بَندی آکَرم. 8اَز شمَه آوینَه تعمید آدامَه، ولی اَ بَشِمَه خدا موقَدَسه روح نَه تَعمید آرَدا.»
عیسی تعمید گَتِه
9اَ روجونکا، عیسی شهر ناصرَ، وِلَتِه جلیلیرا آمَه و اوردونی رِباریکا یَحیی بالینَه تعمید گَتِشَه. 10هِنتَه کن عیسی آویکا بِرن بَرمَه، ویندِشَه کن آستامونِن آج آبینَه و خدا روح کَفتری شیوار چَی سَریکا ویرمَه. 11و سَسی آستامونیکا آرَستَه کن: «تِه چمن خاجَتیَه زوعَه هِستیشَه و اَز بَتِکا خَیلی راضی ایمَه.»
عیسی وردا وَردون دِلَکا
12خدا روح جَخت عیساش وَیاوونیرا بَردَ. 13عیسی چل روج وَیاوونیکا بَه و شَیطون بَی وَرداوَرد اَکَریَه. اَ اَشیا نَه اَمونیَه و فرشتَه اِن بَی خیدمت اَکَرین.
عیسی اِشتَن خیدمَتی شِروو بَکَی
14یحیی ویلاخیستِه بَه دوملَه، عیسی وِلَتِه جلیلیرا شَه. اَ خدا خَشَه خَبَری اییلام اَکَریَه 15و اَواجیَه: «چَی وَقت آرَستَیه وخِدا پادیشاهی نِزِک آبه یَه. توبَه بکَرَ و اِم خَشَه خَبری سَردِرِ ایمان بوعَرَ.»
عیسی اَوَلین شاگِردن
16وَقتی عیسی جَلیلی دَیراچَه وَریکا دَیوَری، شَمعون و شمعونی برا آندریاسی ویندِشَه کن کایبین دَیراچَه کا دوم ویشَندِ، اِمی خونِه کن اَیِن صیّاد بین. 17عیسی اَیِنِش واتَه: «چمن دوملَه بِرَ و اَز بَشِمَه آدَمون صَیّاد سِی آمَکَرد.» 18اَیِن جَخت اِشتَن دومون آهَشتِشونَه و عیسی دوملَه رَونَه بین. 19وَقتی کن عیسی تیکَلیی نَرا شَه، یعقوب و چَی برا یوحَناش ویندَ کن زبدی زوعَه اِن بین. اَیِن اِشتَن لاتیکَکا کایبین دومون آمادَ آکَردِ. 20عیسی جَخت اَیِنِش خِلِه کَردَ. اَیِن نی اِشتَن دَدَ زِبِدی و کاریگرون لاتیکَکا آهَشتِشونَه و عیسی دوملَه رَونَه بین.
عیسی ایلَه مِردی کن شَیطونیَه روح داری شفا داشَه
21اَیِن شهر کَفَرناحومیرا شینَه. وَقتی موقَدَسَه شَنبَه روج آرَستَه، عیسی جَخت یَهودیون عیبادَتگارا شَه و آموج دوعه شروو کَردِش. 22مردوم چَی آموجیکا حَیرون بین، اِمی خونِه کن زاکیندار اَوون آموج اَدَریَه و توراتی مُعَلیمون شیوار نِبَه. 23اَ هَنگومیکا، چَوون عیبادَتگا دِلَکا مِردی بَه کن شَیطونیَه روحی داری. اَ لَسَّه ژِشَه: 24«اَی عیسای ناصری، تِه اَمَنَه چه کار داری؟ آمَه ایشَه اَمه نیفیت آکَری؟ بَموستیمَه تِه کیشَه! تِه خدا، اَ موقدَسیشَه!» 25اَمّا عیسی اَ شَیطونیَه روح سَردِرِ تَشَر ژِشَه و واتِش: «ساکیت آب و اَیکا بِرون بَرا!» 26اَموقه شَیطونیَه روح اَ مِردی بَرکَه تَکّانی داشَه و هَتَه کن جِکَّله اَژَنیَه اَیکا بِرِن بَرمَه. 27مردوم گرد، اَنَ تَعَجوب کَردَشون بَه کن یَندِ کا دَرَپَرسین: «اِم دِ چِه چییَ؟ ایلَه تازَ زاکیندارَ آموج! اَ حتی شَیطونیَه روحون سَر فِرمون دَ و اَیِن بَیکا فرمون بَبردین.» 28پس خَیلی زو عیسی وِلَتِه جَلیلی اِم سَر اَ سَریکا مَشهور آبَه.
پِطروسی ژِن نَنَه و دییَرَ کَسون شفا دوعِه
29هِنتَه کن عیسی عیبادَتگاکا بَرشَه، یعقوب و یوحنّا نَه، شَمعون و آندریاسی کَرا شین. 30شَمعونی ژِن نَنَه تَو داری و خِت بَه. اَیِن جَخت چَی حالی عیساشون خَبَر دوعَه. 31عیسی چَی ختهَ جگارا شَه و چَی بالی گَتِشَه و بَی راست آکَردِش. اَ ژِنی تَو قَطع آبَه و اَوونکا پَزیرایی کَردِشَه.
32آختاوی نِشتِه بَه دوملَه، دییَرمازی موقِه، گِردِ آزاریون و پَریانیَه آدَمِنِشون عیسی وَر وَردِشونَه. 33شَهری آدَمِن گرد بَرَنگا نَ کا جَم آبَه بین! 34عیسی خَیلیون کن مُختَلیفَه آزار دارین، شفا داشَه و وِرَ پَریان آدَمونکا بِرِن بَرکردِش. اَ نَشتِشَه پَریانِن گَفی بِژَنِن، اِمی خونه کن اَیِن عیسی آرَزنینَه.
عیسی دِوا کَردِ خَلوَتَه جِگاکا
35سوکَه خون کن هوا هَنوزَنی تاریک بَه، عیسی پِبه و کَکا بِرِن بَرشَه، و خَلوَتَه جِگایرا شَه و اَجگا کا کایبَه دِوا کَردِ. 36شَمعون و چَی همراهِن عیسی دوملَه اَگَردین. 37وَقتی عیساشون پَیدا کَردَ، بَی واتِشون: «گرد کان اِشتِه دوملَه گَردِستِه!» 38عیسی اَیِنِش واتَه: «بِرَ اِم اَطرافی شَهرونرا بشَم تا اَجگا اونکا نی آموج بِدَرم، اِمی خونِه کن هِمیرا آمَه ایمَه.» 39پس عیسی رَونَه بَه، و وِلَتِه جلیلی اِم سَر اَ سَریرا شَه. عیسی چَوون عیبادَتگا اون دِلَکا آموج اَدَریَه و پَریانون آدَمونکا بِرِن بَرَکَریَه.
جذانیَه مِردی شفا دوعه
40ایلَه جذانیَه مِردی عیسی وَر آمَه و زِنگ ژِشَه و خاشتو خازینَه واتِش: «اَگَم بِخای بَشاشَه بَمن شفا بِدَری.» 41عیسی دل اَ مِردیرا سیجیستَه، اِشتَن بالی دراز آکَردشَه و اَ مِردی دَست آسا کَردِشَه و واتِش: «بَپیمَه، شفا بیگِه!» 42جَخت جذان بَی آهَشتِشَه و اَ مِرد شفا گَتِشَه. 43عیسی جَخت بَی رونَه آکَردِشه و بَی قدِغَن کَردِشَه و 44واتش: «حَواسِر ببو اِم ایتِفاقی خونِه کَسیرا چیی ایی نِواجی؛ بَلکَم بش و بَشتَن کاهِنیرا کن مَعبَدی عالیمَه آمون واَ قِربونیی کن شفا گَتِه رایَه و موسی اِ پَیغَمبَرحِکم کَردَشَه بِدَ، تا اَوونرا ثابیت ببو کن تِه شفا گَتَرَ.» 45ولی اَ مِرد بِرِنیرا شَه، و گِردِ جگا اونکا اِم ایتِفاقی مَردومیرا جیگیر کردِشَه و چَی خَبَری پَخش آکَردِش. اِمی خاطِر عیسی دِ نشایَه راحَتینَه شهری دِلَه دَرمِه، بَلکَم شَهری بِرنی، دورَ خَلوَتَه جِگا اونکا اَمونیَه و مردوم گِردِ جگا اونکا، چَی وَر آین.
اکنون انتخاب شده:
مَرقُس 1: CTB
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2024 Korpu Company
