Pahayag 13
13
U Duwwa a Makaánteng a Hayup
1Nadid, naketaák ti makaánteng a hayup a immawas tu diget, tehhod siya a pitto a ulo sakay sapulo a saduk. Tehhod a kurona u bawat saduk, sakay tu bawat ulo ay te nakasulat a ngahan a mang-insulto tu Diyos. 2U hayup a netan ko ay kumán a idsura ni leopardo, u tika-tikád na ay kumán a tikád ni oso sakay u labi na ay kumán a labi ni liyon. Inyatád nu dragon nikuna u kapangyariyan na, u trono na, sakay u malawak na a karapatan a mamuno. 3U essa tu ulo hide nu makaánteng a hayup ay tehhod a talingo a ngahe-ngahe na dán a katayan, pero nagpiyya itod. Kanya himmanga u atanan a tolay ti munduwáy tu nangyare kaya simmunud hide nikuna. 4Sinamba nu atanan a tolay u dragon dipo inyatád na u kapangyariyan na tu makaánteng a hayup. Sakay sinamba di be u makaánteng a hayup kinagi de, “Deya makapangpantayay tu makaánteng a hayup? Deya makakayaay a lumaban nikuna?”
5Pinayagan a maghambug u makaánteng a hayup sakay makapag-insulto tu Diyos, sakay maghare tu alay nu áppat a pulo ay ti duwwa a bulan. 6Ininsulto na ngane u Diyos, u ngahan nu Diyos, u páppágyanan nu Diyos, sakay u atanan a katoy ti langet. 7Pinayagan be siya a geraán sakay taluwán u pinile hide nu Diyos. Sakay inatádden siya ti kapangyariyan a mamuno tu atanan a tolay ti munduwáy, tu bawat lahe, banuwan, upos sakay bansa. 8Sakay u atanan a tolay a katoy ti lutaáy ay sumamba nikuna, puwera la tu tolay hide a nakasulat u ngahan de tu libro nu biyag sapul pa nikuna a lalangán i munduway. I libruwan iye ay táttawed nu Tupa a binuno.
9“Ni makaintendi kam ay mágsaneg kam! 10Ni deyaman u netakda a madakáp ay sadya a madakáp; sakay ni deyaman u netakda a matay ti áttak ay sadya a matay ti áttak. Kaya kailangan a magpakatatag sakay manalig u pinile hide nu Diyos.”
11Sakay naketaák dámman ti essa pa a makaánteng a hayup a limmitaw tu luta. Tehhod iye a duwwa a saduk a konna tu saduk nu tupa, pero u boses na ay kumán a boses nu dragon. 12Ginamit na u atanan a kapangyariyan nu purumero a makaánteng a hayup tánni ipatupad u kagustuwan na hide. U atanan a tolay ti munduwáy ay pinilit na a sumamba tu purumero a makaánteng a hayup a natalinguwan pero nagpiyya. 13Naggimet ti makataka-taka a bagay u kaduwwa a makaánteng a hayup, nagpasidung siya ti apoy a gábwat ti langet a áelingán nu katolayan. 14Sakay dipo tu makataka-taka hide a impagimet nikuna nu purumero a makaánteng a hayup ay nalinlang na u katolayan. Inutusan na u katolayan a maggimet ti rebulto nu purumero a makaánteng a hayup, a natalinguwan ti áttak pero nabiyag pade. 15Pinayagan u kaduwwa a makaánteng a hayup a atádden ti biyag u rebulto nu purumero a makaánteng a hayup. Kaya nakapagupos u rebulto, sakay pinabuno na u atanan nu awan hide sumamba nikuna. 16Sapilitan a pinatatak nu kaduwwa a makaánteng a hayup u kawanan a kamát oni kidáp nu atanan a tolay. Mataas man oni mababa, mayaman man oni mahirap, alipin man oni malaya. 17Dipo ti iye, awan ti makabale oni makapaglako maliban la ni tehhod a tatak nu ngahan nu makaánteng a hayup, oni nomiro a katumbas nu ngahan na.
18Kailangan he u karunungan. Matukuyan nu makaintendi u kahulugan nu nomiro a katumbas nu ngahan nu makaánteng a hayup, dipo ngahan iye nu essa a lállake. U nomiro ay 666.
اکنون انتخاب شده:
Pahayag 13: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.