Filipos 3
3
U Tunay a Pagkamatuwid
1Nadid, kákkapatkákka ko hide, magsaya kam para tu Panginoon. Awanák magsasawa a mánghuway-huway a mangkagi nikam ti bagayan hidenye dipo para la be iye tu kapiyyaan moy.
2Magingat kam tu tolay hide a masássohán a maggimet ti madukás. Kumán hide a aso a magbángngal. Male u itáttoldu de dipo ipilit de a kailangan a magpature bagu hide a maligtas. 3Alalahanán moy a bakán a hide u tatahoden a ture nan hikitam, dipo u Banal a Ispirito u mánggiya nikitam tu págsamba tam tu Diyos sakay ipagmadakál tam u ginimet ni Cristo Jesus a siya u kasayaan tam. Awan kitam manalig tu pangluwas a seremonya a ipáppasunud de.#3:3Basaán tu Roma 2:28-29, Galacia 6:14-15. 4U tatahoden, te sapaták a dahilan para magmadakál ni tu págsunud tu utus ni Moises u págguhunan. Ni isipán ni deya man a te katuwiran siya a magtiwala tu konna he a gimet ay mas laluwák dán.#3:4-7 Basaán tu Gimet 8:3, 22:3-21, 23:6, 26:4-23, Roma 11:1, 2 Corinto 11:18-31. 5Tinuriyák tu kawalo a aldew sapul tu kákkeenak ko. Hebreowák; tunay a Israelita, gábwat tu lahe ni Benjamin. Ni kássunud tu Kautusan u págguhunan ay talaga sinunud ko dipo Pariseowák.#3:5 Basaán tu Roma 11:1 6Dipo ngane tu kássunud ko tu Kautusan ay pináppahirapan ko u mánnampalataya hide tu itod. Kaya ni tungkul tu pagkamatuwid ayun tu Kautusan ay awan kam ti makagi nikán.#3:6 Basaán tu Gimet 8:3, 22:4, 26:9-11. 7Pero dipo ni Cristo, u bagay hide a páppahalagaan ko tu itod ay imbilang ko nadid a awan ti kabuluhan. 8On, imbilang ko a awan ti kabuluhan u atanan a bagay bilang kapalit nu mas lalo a mahalaga, u pákkatengge ko ni Cristo Jesus a Panginoon ko. U atanan a bagay ay impalagay ku dán a awan ti kabuluhan, magpasakupák la ni Cristo, 9sakay mákpagkaessaák nikuna. Awan nák dán manalig a magin matuwid tu pamamag-itan nu kássunud tu Kautusan nan tu pánnalig ni Cristo. U pagin matuwid ko nadid ay kaluub nu Diyos nikán nikuna a simmampalatayaák ni Cristo. 10U gusto ko nadid ay matengge ku pa ti husto ti Cristo, maranasan u kapangyariyan nu kákkabiyag na a huway sakay mákhate tu tinággád na a hirap sakay pumareho nikuna pati tu kákkatay na. 11Para ti konna hod ay maranasan ku be u mabiyag a huway.
Magtulos-tulos Hanggan tu Hangganan
12Awan ko kagiyán a nagimet ku dán u atanan a bagay a iye hide oni awanák dán makagimet ti kasalanan, nan magsumikapák a tupadán u kaluuban ni Cristo Jesus dipo iye u dahilan ni bakin a dinulawák na. 13Kákkapatkákka ko hide, awan ko áisipán a natupad ku dán i bagayan iye hide. Pero u gággimitán ko nadid ay limunán u nakalipas sakay magsikapák para maalap ko u atanan nu gusto nu Diyos a matanggap ko tu tamuwán. 14Kaya magtulos-tulusák ngane a patamo tu hangganan tánni matanggap ko u gantimpala a awan ti iba nan u pángdulaw nikán nu Diyos a mabiyag ti langet tu pamamag-itan ni Cristo Jesus. 15Dapat konna hina u magin isipan tam bilang mágkatatag dán ti pánnampalataya. Ni bakán be a konna hina u isip moy ay ipakapospos iye nikam nu Diyos. 16U mahalaga ay magtulos-tulos kitam a sumunud tu tatahoden a natukuyan tam.
17Kákkapatkákka ko hide, ahigán moy u halimbawa ko. Sakay ahigán moy be u agum a mabiyag a konna nikame.#3:17 Basaán tu 1 Corinto 4:15-17, 11:1. 18Dipo makpal u mabiyag kontara tu adal tungkul tu kákkatay ni Cristo tu kudus. Sangan ku dán a beses a kagiyán nikam sakay nadid ay magtákták i luwa kuwáy a ipaala-ala nikam a huway i iye. 19Kapahamakan i sangpáttán diyay dipo u diyosán de ay u kagustuwan nu pilas de. Ipagmadakál dipa u bagay hide a dapat dipa nakwa a ikasanike sakay awan dán hide ti áisipán nan u bagay hide ti munduwáy. 20Pero para nikitam, u tunay tam a banuwan ay ti langet. Kaya tunay u pagkasoh tam tu págguhay tu kássole nu Panginoon a ti Jesu-Cristo, u tagapagligtas tam. 21Káddemát ni itod a aldew ay baguwán na u mágkahina sakay matay a bággi tam sakay gimitán na a makalanget a konna tu bággi na. Gimitán na iye tu pamamag-itan nu kapangyariyan na a nangsakup na tu atanan a bagay.#3:21Basaán tu 1 Corinto 15:35-58, Colosas 3:4.
اکنون انتخاب شده:
Filipos 3: MBJC
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.