Markos 7

U Date a Toldu nu Ninuno hide

(Mateo 15:1-9)

1Nadid, immadene ni Jesus u Pariseo hide sakay u maisto hide nu Kautusan, a gábwat ti Jerusalem. 2Dipo netan de u disepulus hide ni Jesus a awan naguges ti kamát bagu a kinuman, a ayun tu kaugaliyan nu Pariseo hide.

3Dipo u Judio hide lalu dán u Pariseo hide ay ugali de a maguges pa ti kamát bagu a kuman dipo iye, u intoldu nide nu ninuno de hide. 4Kággábwat de ti palengke ay awan hide kuman mentaras a awan hide makadigus. Sakay makpal palla hide a sunudán a kaugaliyan ni kodya u págguges tu iba de a kasangkapan.

5Kanya tinanung nu Pariseo hide ti Jesus sakay tu tagapagtoldu hide tu Kautusan, “Bakin a awan sumunud u disepulus mo hide tu kaugaliyan a intoldu nu nuno tam hide? Basta kinuman la hide a awan naguges tu kamát de a ayun tu paraan a netoldu.” 6Tinábbeg hide ni Jesus, “Tama u kinagi ni prupeta Isaias tungkul nikam a magwari-ware. Ayun tu insulat na: kinagi nu Diyos.

‘Igalangák ni tolayan iye hide tu labi di la,

bakán atu puso de.

7Awan ti pasa u págsamba di nikán,

dipo u itáttoldu de ay u utus la nu tolay, pero itáttoldu debe a iye u utus nu Diyos.’

8Sássuwayán moy u utus nu Diyos, sakay u kaugaliyan nu tolay u sássunudán moy.”

9Sakay kinagi pa ni Jesus, “Mahusay kam tu awan moy págsunud tu utus nu Diyos para masunud moy la u kaugaliyan nu nuno moy hide! 10U halimbawa a kinagi ni Moises a gábwat tu Diyos ay, ‘Igalang moy u dáddakál moy sakay ni ti deya u magupos ti madukás tu dáddakál na ay dapat a bunuwán.’ 11Pero itáttoldu moy be, a kapag kinagi nu anak tu dáddakál na; u tulung a iyatád na nakwa nide ay korban (U gusto na a kagiyán ay nakalaan dán tu Diyos) 12i tolayan itod ay awan moy dán siya payagen a tumulung tu dáddakál na. 13Tu konna he a paraan ay awan nikam ti halaga u utus nu Diyos tu pamamag-itan nu itáttoldu moy. Sakay makpal kam pa a bagay a gággimitán a konna ti iye.”

U Mángpadukás tu Tolay

(Mateo 15:10-20)

14Sakay pinaadene ni Jesus a huway u tolay hide nikuna sakay kinagi na nide, “Mágsaneg kam nikán a atanan, sakay intendiyán moy u kagiyán ko! 15Bakán a u kanán nu tolay u mangpadukás nikuna tu atubang nu Diyos nan u lumuwas tu labi na u mangpadukás nikuna. 16Kanya hikam a mágsaneg hide ay dapat moy iye a isipán.”

17Káttapos ay linakaden na u tolay hide sakay simmáddáp siya tu bilay, nikuna a hod dán siya tu disalad ay tinanung siya nu disepulus na hide ni ánya u gusto a kagiyán ni talinghagaan itod. 18Kinagi nide ni Jesus, “Awan moy pad beman la naintendiyan? Awan moy beman tukoy a maskin ánya u kanán nu tolay ay awan makapángpadukás nikuna? 19Dipo maski ni ánya u kanán na ay awan be angay tu puso na, nan tu tiyan na la, káttapos ay iyáttay.” (Ti kinagiyan iye ni Jesus ay ingkagi na a atanan a kákkanán ay maare a kanán.)

20Kinagi na pa, “Pero u lumuwas a madukás a upos tu labi nu tolay ay siya u makapangpadukás nikuna tu pangileng nu Diyos. 21Dipo tu puso nu tolay a maggábwat u madukás a isip a mangsulsul nikuna tu pággimet ti madukás para pángngibábbey, magtakaw, mamuno, 22mangilállake, managhile, sakay pángloko, sakay mágkahalay, pághambug, sakay tu iba a gimet a madukás. 23Atanan ni iye a kadukássan ay gábwat tu puso nu tolay, sakay sa iye u makapangpadukás nikuna.”

Pinagpiyya u Anak nu Bábbey a Taga-Tiro

(Mateo 15:21-28)

24Nadid ay limmakad hod ti Jesus, immangay siya tu lugar a Tiro sakay ti Sidon. Káddemát na hod ay timmulos siya tu essa a bilay, umád na nakwa a matukuyan nu tolay hide a dimmemát siya; pero awan na netagu. 25Tehhod hod a essa a bábbey a sináddáp ni madukás a ispirito u anak na. Tu pákkasaneg na ni Jesus ay inumangay hod siya a agad, sakay limmuhud siya tu atubang na. 26I itod a bábbey ay bakán a Judio, nan taga-Sirofenicia siya. Nákkekagbi siya ni Jesus a palakadán na u mágkadukás a ispirito tu anak na. 27Pero kinagi ni Jesus tu pamamag-itan nu essa a talinghaga. “Dapat ku pa a pakanán u anak ko, dipo awan tama a alapán u kanán nu anak sakay ipakan tu aso.”

28Timmábbeg u bábbey, “Tama ka Panginoon, pero maskin u aso hide tu sahok nu lamisaan ay kanán de u nabuhay a mágketákneg nu anak hide.” 29Kanya kinagi ni Jesus nikuna, “Dipo ti tábbeg muwan ina ay maare ka dán a sumole. Limmakad dán u madukás hide a ispirito tu anak mo.” 30Simmole u bábbey, sakay nedemáttan na u anak tu págkatdugan na. Nilakaden ngani dán siya nu madukás a ispirito.

Pinagpiyya ni Jesus u Tolay a Bulol sakay Bángngág

31Káddemát ni Jesus a gábwat tu lugar a Tiro, nagtaleb siya ti Sidon, sakay naglebut tu lugar ni Decapolis, sakay káttapos ay nagdiretso siya tu dinom ni Galilea. 32Inyangay hod nikuna nu tolay hide u essa a lállake a bulol sakay bángngág, nákkekagbi hide a itupo na u kamát na tu te saket.#7:32 Markos 5:23. 33Inyadeyo pa ni Jesus u lállake tu tolay hide, sakay káttapos ay insulot na u magtembang na a toldu tu magtembang be a talinga nu lállake. Káttapos ay nagloktab ti Jesus sakay inpahid na u loktab na tu dila nu lállake. 34Timmangad ti Jesus ti langet sakay immangás ti dakál, sakay kinagi na tu lállake, “Effata,” a u gustu na a kagiyán ay “Mabukasan talingamuwe!”

35Tu pákkakagi ni Jesus ti itod ay nakasaneg dán u lállake sakay makaupos dán siya ti maayus. 36Ingkagi na tu tolay hide a dyan di iye ibábbaheta, pero maskin binawalan hide ay lalu de a imbábbaheta. 37U atanan a nakasaneg ay nagtaka hide a tahod, kinagi de, “Maganda u gimet ni itona a lállake! maski u buhák ay naketa, sakay u bulol hide ay pagupusán na hide ti maganda.”

اکنون انتخاب شده:

Markos 7: MBJC

های‌لایت

به اشتراک گذاشتن

مقایسه

کپی