Markos 3

Pinagpiyya U Lállake a Patay u Essa na a Kamát

(Mateo 12:9-14; Lukas 6:6-11)

1Nadid, simmáddáp a huway ti Jesus tu sinagoga. Nedemáttan na hod u essa a lállake a patay u essa na a kamát. 2Kanya binantayan nu agum a tolay a hed-hod ni pagpiyyaán ni Jesus i lállakeyan itod tu Aldew nu Káimang, támpara tehhod hide a mebintang nikuna. 3Dinulaw ni Jesus u lállake a patay ti kamat, “Karon he!” 4Káttapos ay tinanung nabe u tolay hide, “Ánya beman u ayun tu Kautusan, u maggimet ti maganda oni maggimet ti madukás tu Aldew nu Káimang? U mángligtas ti biyag oni mamuno?”

Pero awan hide timmábbeg. 5Maiyamut sakay malungkut ti Jesus a immileng tu tolay hide a katoy tu palebut na, dipo tu kaigáttan nu ulo de. Káttapos ay kinagi na tu te saket, “Iyolnat mo i kamát muwe.” Inyolnat be nu lállake u kamát na sakay nagpiyya iye. 6Kanya limmakad a agad u Pariseo hide sakay nákpágguhon tu tagasuporta hide ni Herodes para ipabuno de ti Jesus.

U Tuna't Kakpal a Tolay tu Bihebi nu Minalno

7Nadid, lummakad di Jesus sakay tu disepulus na hide sakay immangay tu bihebi nu minalno. Tinagubet hod siya nu tunat kakpal a tolay a gábwat ti Galilea, ti Judea, 8Jerusalem, Idumea, tu dibilew nu dinom a Jordan sakay tu palebut ni Tiro sakay Sidon. Tummagubet hide ni Jesus dipo nabaheta de u atanan a makataka-taka a ginimet na. 9Dipo tu kakpal nu tolay ay nagpahanda ti Jesus tu disepulus na hide ti essa a abang, para te masakayan siya para awan maáldit nu tolay hide a magdemáttan. 10Dipo makpal dán siya a pinagpiyya, dayuwán siya nu atanan a te saket tán para matawiden di la siya. 11Ni ketan siya nu tolay hide a sináddáp nu madukás a ispirito ay lumuhud hide tu atubang na sakay pumákhaw, “Hiko u Anak nu Diyos!” 12Pero mahigpit a inutusan ni Jesus u mágkadukás hide a ispirito a dyan de kagiyán ti maskin deya ni ti deya siya.

U Pángpile ni Jesus tu Sapulo ay ti Duwwa a Disepulus na

(Mateo 10:1-4; Lukas 6:12-16)

13Káttapos ay immangay ti Jesus tu buked sakay dinulawan na u tolay hide a pinili na, sakay immadene hide nikuna.#3:13 Basaán tu Mateo 5:1; Lukas 6:12. 14Nagpile siya ti sapulo ay ti duwwa [a dinulaw na a disepulus] para kaguman na sakay utusan na a mangaral.#3:14-15 Basaán tu Mateo 10:1. 15Sakay inatádden nabe hide ti kapangyariyan a magpalakad tu mágkadukás hide a ispirito. 16Sa iye u disepulus na hide a pinili na: Ti Simon a ngángngahanan na a Pedro, 17ti Santiago sakay ti Juan a anak ni Sebedeo (hide ay dáddulawán na a Boanerges a u gusto na a kagiyán ay “anak hide ni kádduh”); 18ti Andres, ti Felipe, ti Bartolome, ti Mateo, ti Tomas, ti Santiago a anak ni Alfeo, ti Tadeo, ti Simon a makabayan, 19sakay ti Judas Iscariote a nángtokyon ni Jesus.

Ti Jesus sakay ti Beelzebul

(Mateo 12:22-32; Lukas 11:14-23; 12:10)

20Tu kássole ni Jesus tu bilay a táttulusan na ay nagdemáttan a huway u tunay ti kakpal a tolay. Kanya awan dán hide ti odas a kinuman. 21Nikuna a mabaheta nu pamilya ni Jesus i iye ay inangay di siya para pahintuwán, dipo kákkagiyán nu tolay hide a nasida dán u isip na.

22Tehhod be a dimmemát a gábwat ti Jerusalem a tagapagtoldu hide tu Kautusan, kinagi de, “Sináddáp siya ni Satanas a pinakapuno nu mágkadukás a ispirito. Sakay iye u mángatád nikuna ti kapangyariyan a magpaibut tu mágkadukás hide a ispirito.”

23Kanya pinaadene ni Jesus u tolay hide sakay nagupos siya nide ti sangan a talinhaga, “Mapalakad beman ni Satanas u sadili na? 24Ni mamáglaban-laban u tolay hide tu essa a banuwan ay masida i kahariyanan itod. 25Konna bi hod u mangyare tu essa a pamilya ni namágdadema hide. 26Konna bihod ti Satanas, kapag kinalaban ni Satanas u sadile na sakay u sakup na hide ay mahate-hate sakay mamágdadema ay masida u kahariyan na sakay itod dán u katapusan na.

27Awan maare a sáddáppán nu mágtakaw u bilay nu mabegsák a tolay ni awan pa siya megapus. Pero ni megapus dán ay maare dán a pagtakawan u bilay na.#3:27 Basaán tu Isaias 49:24-25. 28Tandaan moy iye: u atanan a kasalanan pate u upos a kontara tu Diyos ay maare a mapatawad, 29pero ni ti deyaman u magupos kontara tu Banal a Ispirito ay awan ti kapatawaden. U konna hina a kasalanan ay awan mapatawad hanggan-hanggan. 30Kinagi itod ni Jesus dipo kákkagiyán nu tagapagtoldu hide tu Kautusan a sináddáp siya nu madukás a ispirito.”

U Ina sakay u Wáwwadi ni Jesus

(Mateo 12:46-50; Lukas 8:19-21)

31Nadid, dimmemát u ina sakay u wáwwadi hide ni Jesus. Nágtaknág hide tu luwas nu bilay sakay impadulaw di siya. 32Makpal a tolay u mággetnod tu palebut ni Jesus. Tehhod a nagkagi nikuna, “Katoy ti luwase tena mo sakay tu wáwwadi mo hide a bábbey sakay lállake uhayán dika.”

33Timmábbeg ti Jesus, “Deya beman i ina kuway sakay wáwwadi kuway?” 34Inileng na u tolay hide a katoy tu palebut na, sakay kinagi na, “hide ina kuway sakay wáwwadi kuway! 35Ta dipo ni deya man u sumunud tu kaluuben nu Diyos ay siya u ina ko sakay u wáwwadi ko.”

اکنون انتخاب شده:

Markos 3: MBJC

های‌لایت

به اشتراک گذاشتن

مقایسه

کپی