Mateo 19
19
U Toldo ni Jesus Tungkol tu Págsina tu Kabanga
(Markos 10:1-12)
1Kállipas a kagiyan ni Jesus u bagay hide a iye ay lummakad siya ti Galilea. Sakay immangay siya tu lugar nu Judea a sikatan nu dinom a Jordan. 2Inunonod siya nu dapat a kakpal a tolay sakay pinagpiyya na hide hod.
3Te sangan a Pariseo hide a immadeni nikuna sakay pinurbaan di siya tu pamamagitan nu tanong a iye “Neayon beman tu Kautusan a sumina u lállake tu kabanga na ni maski anya a dahilan?” 4Timmábbeg ti Jesus, “Awan moy beman nabasa tu Kasulatan a tu sapul ay nilalang hide nu Diyos, lállake sakay bábbey? 5Sakay kinagi pa tu Kasulatan a, ‘Dipo he, lakaden nu lállake u ama na sakay tu ina na. Sakay magpisan hide tu kabanga na sakay magin essa hide.’ 6Kaya awan dán hide duwwa ni awan essa dán hide. Kanya u pinagessa nu Diyos ay dyan pagsinaan nu tolay.” 7Tinanong siya nu Pariseo hide, “Bakin inyutos ni Moises tu itod a atádden nu lállake u kabanga na ti katibayan nu págsina tu kabanga bago a sumina u bábbey?” 8Timmábbeg ti Jesus, “Dipo tu igát nu ulo moy kanya pinayagen dálla ni Moises a maari kam a sumina tu kakkabanga moy hide. Pero bakán a konna hod tu sapul. 9Kaya kagiyan ko nikam: deya man u lállake a sumina tu kabanga na ti anya man a dahilan liban tu pángalunya sakay makkabanga ti agum ay nangalunya. [Sakay u mákkabanga tu bábbey a sinina-an nu kabanga na ay nanglunya be.]”
10Kinagi nu disepulus na hide, “Ni konna hod Panginoon u kalagayan nu lállake tu kabanga na ay mas maganda pa a dyan dálla makkabanga.” 11Timmábbeg ti Jesus, “Awan atanan ay makatanggap ti iye a adal ni awan u pinagkalooban la hide nu Diyos. 12Dipo te iba iba a dahilan ni bakin te lállake a awan makkabanga: u agum ay dipo neenak hide a awan maari mákduhog; u agum ay dipo naoperaan#19:12 Naoperaan: Tu itod tu ay tanggalan de u bungaw nu essa a lállake para awan siya magenak. hide. U agum ay awan nakkabanga para mas makapagserbi hide tu Diyos ti maayos. Ni matanggap moy iye a adal ay gimetán moy.”
Pinagpala ni Jesus U Babbadit Hide a Anak
(Markos 10:13-16; Lukas 18:15-17)
13Nadid te nagtugan ti anak hide ni Jesus para tanongan de ni maari itupo na u kamát na sakay ipanalangin u anak hide. Pero pinagngallan hide nu disepulus na hide. 14Pero kinagi ni Jesus, “Pabayan moy a umadeni nikán u anak hide. Dyan moy hide bawalan dipo tu kapareho de hide u pághareyan nu Diyos.” 15Sakay intupo na tu anak hide u kamát na sakay limmakad ti Jesus.
U Mayaman a Lállaki
(Markos 10:17-31; Lukas 18:18-30)
16Sakay te bigla be a essa a lállake a immadeni ni Jesus sakay nagtanong, “Maistu, anya a maganda u gimetan ko para magkahoddák ti biyag a awan ti katapusan?” 17Timmábbeg ti Jesus, “Bakin hikán u tanongan mo ni ánya u maganda? Essa la u mabait. Ni gusto mo a magkahod ti biyag a awan ti katapusan, sunudán mo u Kautusan hide.” 18“Anya hidentod a kautusan?” tanong na. Timmábbeg ti Jesus, “Dyan ka mamuno; dyan ka mangalunya; dyan ka magtakaw; dyan ka magbulibuli tu págsestigo mo; 19igalang mo u ama sakay ina mo; sakay mahalán mo u kapareho mo konna tu págmahal mo tu sadili mo.” 20Kinagi nu ulito, “Nagimet ko dán ina a atanan. Anya pa wád u dapat ko a gimetán?” 21“Ni gusto mo a magin karapatdapat tu Diyos, angay mo ilako u ari-arian mo sakay iyatád mo tu pobre hide u naglakuwan. Ni gimetán mo iye, magkahod ka ti kayamanan ti langit. Káttapos ay sumoli ka he sakay sumunod nikán,” tábbeg ni Jesus. 22Pákkasaneg na ni iye, malungkot a humektat u ulito, dipo siya ay tunay ti yaman.
23Kinagi ni Jesus tu disepulus na hide, “Kagiyán ko nikam: mahirap mebilang u mágkayaman hide tu pinaghariyán dán hide nu Diyos! 24Sakay kagiyan ko be nikam: mas alisto pa a makasáddap u dakal a hayop a kamelyo tu ábbut nu digum nan magpasakop tu pághari nu Diyos u essa a mayaman.” 25Nagtaka u disepulus hide nikuna nasaneg de iye, kanya nagtanong hide, “Ni konna hod, deya u maligtas?” 26Inileng hide ni Jesus sakay kinagi, “Awan talaga iye magimet nu tolay, pero magimet nu Diyos u atanan a bagay.”
27Sakay nagupos ti Pedro, “Panginoon tukoy mo a nilakaden mi u atanan sakay hikame ay summunod niko. Anya u magin gantipala mi?” 28Kinagi nide ni Jesus, “Pakatandaan moy iye: ni maghare dán u Anak nu Tolay tu kapangyariyan na tu paddemát a mundo a itatag nu Diyos, hikam a sumunod nikán ay maatádden labe ti kapangyariyan para hatulan u sapulo ay ti duwwa a lahi ni Israel. 29Sakay ni deya man u manglakad tu bilay na, kapatkaka na hide, ama sakay ina na hide, anak na hide, oni u luta na hide para nikán ay makatanggap be ti pendatos a beses tu linakaden na. Sakay pagkalooban siya ti biyag a awan ti katapusan. 30Pero makpal a nagdipalongo a medimodyan, sakay makpal a dimodyan a medipalongo.”
اکنون انتخاب شده:
Mateo 19: MBJC
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.
