Lukas 4

Tinokso ni Satanas ti Jesus

(Mateo 4:1-11; Markos 1:12-13)

1Nadid, lummakad dán ti Jesus ti Jordan, putat siya tu kapangyariyan nu Banal a Ispirito. Iye i nánggiyaay nikuna tu parang. 2Appat a pulo a aldew ay ti gibi siya hod a tináttokso ni Satanas tu parang. Mentaras a katoy siya hod ay awan siya kikimman, kanya nagipehás siya ti aláp.

3Kinagi nikuna nu Diyablo, “Ni hiko ngane u Anak nu Diyos ay iyutus mo a magin tinapay i bituwan iye.”

4Pero timmábbeg ti Jesus, “Nakasulat tu Banal a Kasulatan, ‘Bakán la tu tinapay a mabiyag u tolay nan tu kada upos a lumuwas tu labi nu Diyos.’”

5Káttapos ay inyangay siya nu diyablo tu essa a malangkaw a lugar sakay impeta na ti saglit u atanan a kahariyan ti munduwáy. 6Sakay kinagi nu diyablo ni Jesus, “Iyatád ko niko u atanan a kapangyariyan sakay kayamanan ti kahariyanan iye hide. Hikán i makákkaoway ti iye hide a atanan kanya maare ko iye a iyatád tu deya man a gusto ko a páng-atáddan. 7Kaya ni hikán i sambaán muway ay magin kao mo iye hide a atanan.”

8Pero tummábbeg ti Jesus, “Nakasulat tu Banal a Kasulatan,

‘U Panginoon mu la a Diyos u dapat mo a sambaán,

sakay siya la u dapat mo a pagserbiyan.’ ”

9Sakay inyangay dámman siya nu diyablo tu toktok nu Templo ti Jerusalem sakay kinagi na nikuna, “Ni hiko ngane u Anak nu Diyos, tumákneg kaped 10dipo nakasulat a,

‘Ibilin nu Diyos tu anghel na hide a ingatan di ka,’

11sakay nakasulat be,

‘Alalayan dika,

tánni awan ka mesángdul ti bituwe hide.’”

12Pero timmábbeg ti Jesus, “Nakasulat tu Banal a kasulatan a, ‘Dyan mo subukán u Panginoon mo a Diyos!’ ”

13Káttapos a toksuwán ti Jesus tu atanan a paraan ay lummakad dán u diyablo sakay naguhay ti iba a tiyempo.

Sinapulan ni Jesus u Págtoldu na ti Galilea

(Mateo 4:12-17; Markos 1:14-15)

14Nadid, nagsole ti Jesus ti Galilea a tehhod a kapangyariyan nu Banal a Ispirito. Nebaheta tu banu-banuwan hod u tungkul nikuna. 15Nagtoldu siya tu katolayan tu sinagoga de hide sakay pinure siya nu atanan a tolay a nakasaneg nikuna.

Awan de Tinanggap ti Jesus ti Nazaret

(Mateo 13:53-58; Markos 6:1-6)

16Nadid, immangay ti Jesus ti Nazaret. U banuwan a dimmakállan na. Konna tu date na a gággimitán, immangay siya tu sinagoga tu Aldew nu Káimang sakay tummaknág para basaán u Banal a Kasulatan. 17Inyatád di nikuna u libro a insulat ni prupeta Isaias. Binuklat na itod tu piligu a te nakasulat a konna he,

18“Katoy nikán u Ispirito nu Panginoon,

dipo hikán u pinile na a mángpakapospos tu Maganda a Baheta tu mágkahirap hide a tolay.

Inutusanák na para ikagi tu pireso hide a malaya dán hide,

sakay konna bi hod, u buhák hide ay maketa dán.

Inutusanák na para palayaán u áapi-apiyán hide,

19sakay ipakapospos ko be a dumemát dán u panahun

nu págligtas nu Panginoon.”

20Káttapos ni Jesus a nangbasa tu kasulatan ay linukot na itod sakay insole na tu mágserbi tu sinagoga. Nággetnod Siya para mangaral dán. Sakay ináeleng siya nu atanan a tolay a atoy hod, 21sakay kinagi na nide, “I kasulatan iye a nasaneg moy ay natupad dán nadid.” 22Pinure siya nu atanan a tolay sakay nagtaka hide dipo malalake siya a magupos. Kinagi de, “Awan beman ina u anak ni Jose?”

23Kaya kinagi ni Jesus, “Siguradu a kagiyán moy nikán i kakagiyanan iye: ‘Nay, ta doktor ka labe ay gamután mo i sadile muwe.’ Kagiyán moy be nikán, ‘Bakin awan mo gimitán tu sadile mo a banuwan u nabaheta me a ginimet mo ti Capernaum?’ 24Pero kagiyán ko nikam,” kagi ni Jesus, “Tatahoden a awan tanggapán u prupeta tu sadile na a banuwan. 25Pero kagiyán ko nikam, makpal a bábbey a bilo ti Israel tu kapanahunan ni prupeta Elias. Nikuna awan naguden ti tállo a taon ay ti kalahate ay nagkahod ti grabi a sák-aláp tu buo a Israel. 26Pero awan pinaangay nu Diyos ti Elias a tumulung tu maski essa nide nan pinaangay na siya tu essa a bilo a bábbey ti Sarepta a sakup ni Sidon. 27Sakay tu kapanahunan be ni prupeta Eliseo ay makpal u te ketong pero awan siya ti pinagpiya maskin essa nide. Nan ti Naaman la a taga-Siria,” kagi ni Jesus.

28Nikuna masaneg de u kinagi ni Jesus ay grabi u iyamut nu tolay hide a katoy tu sinagoga. 29Tummaknág hide a atanan sakay intoglad de siya a paluwas. Inyangay di siya tu toktok nu buked tu banuwan para itákneg. 30Pero naglakad ti Jesus tu bállog de sakay linakaden na hide.

U Lállake a Sináddáp nu Madukás a Ispirito

(Markos 1:21-28)

31Nadid, ummangay ti Jesus ti Capernaum, essa a banuwan ti Galilea. Nagtoldu siya hod tu Aldew nu Káimang. 32Nagtaka u mágsaneg hide tu págtoldu na dipo tehhod a kapangyariyan u paggupos na.

33Nadid, te essa a lállake tu sinagoga a sinaddáp ni madukas a ispirito. Pimmakhaw siya ti mabegsák, 34“Jesus a taga-Nazaret,” kagi na, “Ánya i pák-alam muway nikame? Ummangay ka beman he para bunuwán mo kame? Tukoy ko ni deya ka, hiko u Banal a Anak nu Diyos.”

35Pero sinaway siya ni Jesus, kinagi na, “Dyan ka pakahehaw! Umibut ka ti tolaye!” Káttapos inlugmuk nu madukás a ispirito u lállake tu atubang nu katolayan, sakay tulos na a linakaden sakay awan na pinasakitan. 36Nagtaka hide a atanan kaya namágtanungan hide a kinagi de, “Ánya wád iye a kakalase a pággupos? Makapangyariyan sakay mabisa. Paibután na u madukás a ispirito sakay sumunud be hide tu kagiyán na!” 37Sakay kimmalat u baheta tungkul ni Jesus ti lugaran itod.

Pinagpiya ni Jesus u Makpál a Tolay

(Mateo 8:14-17; Markos 1:29-34)

38Limmakad ti Jesus tu sinagoga sakay tulos siya a immangay tu bilay ni Simon. Ti itod be ay tunay ti kahigpit u ladu nu katugngan a bábbey ni Simon kaya impákpagguhon de ni Jesus a pagpiyaán siya. 39Angay timmáknág ti Jesus tu wahes nu kákkatdugan nu maladu a bábbey sakay inyutus na a maibut u ladu tu bábbey. Ummibut ngane u ladu na kaya pagdaka siya a timmáknag sakay nagpospos nide. 40Nikuna sumaham dán u aldew ay inyangay nu tolay hide tu kán Jesus u te saket hide. Intupo na u kamát na tu balang essa, sakay pinagpiyya na hide. 41Nágpapákhawán a limmuwas u mágkadukás a ispirito tu kakpalan nu tolay hide kinagi de, “Hiko u Anak nu Diyos!” Pero sinaway hide ni Jesus sakay awan na hide pinakultadan a magupos, dipo tukoy de a siya u Cristo.

Nangaral ti Jesus ti Judea

(Markos 1:35-39)

42Tu kaldiwan ay limmakad ti Jesus, immangay siya tu tahimik a lugar a awan ti tolay. Pero inehyok padi siya nu tolay hide. Nikuna ketan di dán siya ay nákkekakagbi hide a dyan pa la siya lumakad. 43Pero kinagi ni Jesus, “Kailangan a ipangaral ko be tu agum a banuwan u Maganda a Baheta tungkul tu pághare nu Diyos dipo saiye u dahilan kayaák a pinaangay nu Diyos ti lutaáy.” 44Kaya nangaral siya tu sinagoga hide ti Judea.

اکنون انتخاب شده:

Lukas 4: MBJC

های‌لایت

به اشتراک گذاشتن

مقایسه

کپی