Judas 1
1
1Hikán ay ti Judas, a tagapagserbi ni Jesu-Cristo, a wadi ni Santiago. I sulat kuwáy ay para tu pinile hide nu Diyos, a mabiyag tu págmahal nu Diyos a Ama sakay áalagaan ni Jesu-Cristo.
2Hod nakwa nikam u kagbi kapayapaan sakay págmahal a gábwat tu Diyos.
Tungkul tu Magtoldu ti Baka-bakán
3Mahal ko hide a kákkapatkákka, gugusto ko nakwa a magsulat nikam tungkul tu kaligtasan a natanggap tamon tu pamamag-itan nu pánnampalataya tam ni Jesus. Pero mas kailangan ko nadid a magsulat tungkul tu págpabegsák tán metaknág moy u pánnampalataya tam a kompleto a nepagkaluub nikitam ti pumensan.
4Nagsulaták nikam dipo tehhod a sangan a tolay a nákpisan nikam a awan moy naripara. Iye hide a tolay ay u awan hide maka-diyos; iniba de u itáttoldu nu Banal a Kasulatan tungkul tu kagbi nu Diyos, ta u rason de ay makákkagbiyán kan u Diyos kanya tulos-tulos la hide a maggimet tu kagustuwan nu pilas de. Awan de tenggiyán ti Jesu-Cristo, u kasiya-siya tam a Puno sakay Panginoon. Tu itod pa a panahun ay nesulat dán tu Banal a Kasulatan u parusa a nelaan dán nide.
5Maskin tukoy moy dán iye hide a atanan ay gusto ko la a ipaisip nikam, a maski ni inligtas nu Panginoon u lahe a Israel ti Egipto ay pinuksa na padi u atanan a awan summampalataya nikuna. 6Isipán moy be u anghel hide a awan nagtulos-tulos tu tungkulin de sakay inwahak u lugar a inyatád nide nu Diyos. Kaya ingapus hide nu Diyos ti kadena a awan mababágsot sakay impireso na hide tu tunay ti diklám a lugar hanggan tu káddemát nu Aldew nu Pághatul. 7Isipán moy be u banuwan a Sodoma sakay Gomora sakay tu kadatig de hide a banuwan. Nagkasala hide tu mágkadukás de a gimet a pángibábbey sakay pángngilállake pate dámbe u kahalayan tu awan de kapareho. Kaya pinarusaan hide tu apoy a awan mata-matay para babala tu atanan.
8Konna be hod u tolay hide a nákpisan nikam a magtoldu ti baka-bakán, dipo tu pangitain de hide ay maggimet hide tu atanan kagustuwan nu pilas de. Sakay dipo tu pangitain de hide ay umád de a magpasakup tu kapangyariyan nu Diyos, sakay sássestiyán de u anghel hide. 9Maskin ti Miguel a pinakapuno nu anghel hide ay awan nangahas a humatul sakay magdusta, nikuna a nákpagtalo siya tu Diyablo tungkul tu bangkay ni Moises, awan na pinagupusan ti pagseste, nan u kinagi na la ay “Pagkagiyan ka nakwa nu Panginoon!” 10Pero lállaitán ni tolayan hidenye u bagay hide a awan de maintendiyan; konna hide tu hayup hide a u sássunudán dila ay u bábbatiyán de hide a siya be u mángpatibung nide. 11Kakagbi hide sakay makaánteng u demáttán ni iye hide a tolay dipo inaheg de u halimbawa ni Cain. Sakay dipo la tu pagkasoh de tu pilak ay impatibung de u sadi-sadile de a konna ni Balaam. Limmaban hide tu puno de a konna ni Core a pinuksa nu Diyos, kaya puksaan be hide nu Diyos.
12Makasanike sakay makasida maski ni makatubang moy la hide a kuman ni magipun-ipun kam a mánnampalataya. Dipo iye hide a tolay ay awan ti págsawa ti kákkan, awan hide mababássog sakay awan dán hide ti iba a páppospusan nan u sadi-sadile dila. U baka-bakán hide a tagapagtoldu ay kumán a diklám a iyáppah la nu pahás, awan hide ti seserbi ta awan magin uden. Kumán be hide a kayo a awan magbunga maski ni sákbunga na dán, nabagut pate u gimot na sakay talaga a natay dán. 13Sakay kumán hide a tagmák nu diget a u bula na ay u makasanike de hide a gimet; kumán be hide a netawtaw a biton a nelaan tu awan ti kahád a kadiklámman.
14Nadid, ti Enoc a kapitto a lahe ni Adan ay impahayag na dán tu itod pa u tungkul tu magtoldu hide ti baka-bakán, kinagi na, “Ilingán moy! Dimmemát dán u Panginoon, kaguman na u libu-libu na a anghel, 15tánni hatulan na u atanan. Parusaan na u awan hide tumenggi tu Diyos dipo tu mágkadukás de a gimet sakay awan págrespeto nikuna.” 16Iye hide a tolay ay awan makontento tu biyag de, maseste sakay u gugusto de a sunudán ay u kagustuwan nu pilas, mágkahambug sakay sanay hide a mangloko para maalap de u gusto de.
U Paalala hide sakay u Payo hide
17Mahal ko hide a kákkapatkákka, pirme moy a tandaan u kinagi hide nikam nu apostol hide nu Panginoon tam a ti Jesu-Cristo. 18Kinagi di dán nikam tu itod pa a, “Tu dimodyan a aldew ay te dumemát a tolay, pagtawaan de u upos nu Diyos, sakay u sássunudán di la ay u mágkadukás a kagustuwan nu bággi de.” 19Iye hide a tolay u mággagimitán ti paraan tánni masida u pamágkaessa moy. Awan nide u Banal a Ispirito sakay u sássunudán di la ay u makamundu de a ugale. 20Pero kákkapatkákka ko hide, magpakatatag kam tu malinis moy a pánnampalataya. Magdasal kam tu tulung nu Banal a Ispirito. 21Dyan kam sumina tu págmahal nu Diyos, mentaras a maguhay kitam ni Jesu-Cristo a Panginoon tam. Siya u mángkaluub nikitam tu biyag a awan ti kahád dipo tu kagbi na.
22Kagbiyan moy sakay tulungan u mágkahina hide ti pánnampalataya. 23Tulungan moy u agum tán maligtas hide tu kaparusaan. U agum ay kagbiyan moy pero magingat kam tu mágkadukás de a gimet. Kaiyamutan moy maskin u badu de a nadangáttan tu mágkadukás de hide a gimet.
U Págpure
24Puriyán tam nadid u kaessa-essa a Diyos tam a Tagapagligtas! Siya u mangtáttawed nikitam tánni awan kitam magkasala sakay siya u makapáng-adene nikitam tu atubang na a awan ti kapintasan sakay makapangatád ti kasayaan. 25Siya la u eessa a Diyos a Tagapagligtas tam tu pamamag-itan ni Jesu-Cristo a Panginoon tam, para la nikuna u kapuriyan, karangalan, kaluwalhatian, sakay kapangyariyan, sapul pa tu itod, nadid sakay hanggan-hanggan! Amen.
اکنون انتخاب شده:
Judas 1: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.