Juan 20

U Kákkabiyag a Huway ni Jesus

(Mateo 28:1-8; Markos 16:1-8; Lukas 24:1-12)

1Nadid, tu dimadimang nu Simba, madidiklám palla ay immangay dán ti Maria Magdalena tu páglábbángngan. Káddemát na hod ay netan na a nabukasan dán u takáp nu páglábbángngan a bito. 2Kanya nagginan a sole ti Maria a immangay tu kán Simon Pedro sakay tu disepulus a mahal ni Jesus. Káddemát na ay kinagi na nide, “Inalap de u Panginoon tu páglábbángngan sakay awan mi dán tukoy ni hádya de a inyangay.” 3Kanya nagginan ti Pedro a patamo tu páglábbángngan a kaguman u essa a disepulus. 4Parehas hide a nagginan, pero mas mabilis u essa kasera ni Pedro, kanya nedipalongo a nakademát tu páglábbángngan. 5Inleget na u disalad nu páglábbángngan. Netan na u lino a damit hide a nangbalut de ni Jesus, pero awan siya simmáddáp. 6Simmunud nikuna a dimmemát ti Simon Pedro, sakay simmáddáp siya tu disalad nu páglábbángngan. Netan na u lino a damit hide a te dátton, 7maski u tela a nangbalut de tu ulo ni Jesus ay nakáppel dán, sakay nebukod. 8Sakay u disepulus a nedipalongo ay timmagubet be ni Pedro a simmáddáp tu páglábbángngan. Tu pákketa na a konna hod ay naniwala siya a nabiyag dán ti Jesus. 9Dipo awan di palla naintendiyan u nakasulat tu Kasulatan a kailangan talaga mabiyag a huway ti Jesus. 10Káttapos ni itod ay nagsole u duwwa a disepulus.

Pimmeta ti Jesus ni Maria Magdalena

(Mateo 28:9-10; Markos 16:9-11)

11Pero ti Maria ay mágtaknág tu luwas nu páglábbángngan a mágsasangitán. Mentaras a magsanget siya ay limmeget siya tu disalad nu páglábbángngan, 12sakay netan na u duwwa a anghel a nakadamit ti mapudew. Mággetnod hide tu nángdáttonan tu bangkay ni Jesus. U essa ay hod tu banda tu ulo, u essa be ay hod tu banda tu táttikádden na. 13Tinanung de ti Maria, “Bakin a magsanget ka?” Timmábbeg siya, “Te nangalap tu Panginoon ko, awan ko tukoy ni hádya de a inyangay.” 14Tu pákkakagi na ti iye ay simmuleg siya, netan na ti Jesus a mágtaknag pero awan na natengge a ti Jesus itod. 15“Bakin magsanget ka?” Kagi nikuna ni Jesus. “Ti deya u ehyukán mo?”

Tu buung akala na a siya u magmula hod ay timmabbeg ti Maria, “Maisto, ni inalap mo u bangkay nu Panginoon ko, itoldu mo nikán ni hadya mo a inyangay ta alapán ko siya.” 16Kinagi nikuna ni Jesus, “Maria!” Tu kássuleg na ay pimmákhaw siya tu upos ni Hebreo, “Rabboni!” (u gusto na a kagiyán ay “Maisto.”) 17Kinagi ni Jesus, “Diyanák mo tawiden, dipo awanák palla simmole tu Ama. Umangay ka tu kákkapatkákka ko sakay kagiyán mo a soliyák dán tu Ama ko a Ama mu be, sakay tu Diyos ko a Diyos mu be.” 18Kanya immangay ti Maria Magdalena tu disepulus hide ni Jesus sakay imbaheta na nide, “Netan ko u Panginoon!” Sakay kinagi na nide u ipekagi ni Jesus.

Pimmeta ti Jesus tu Disepulus na Hide

(Mateo 28:16-20; Markos 16:14-18; Lukas 24:36-49)

19Nadid, nikuna a gibi dán ti aldiwan itod nu Simba ay naipun u disepulus hide ni Jesus. Ingkandadu de u pintuwan hide dipo tu ánteng de tu pinuno nu Judio hide. Bigla a dimmemát ti Jesus sakay timmaknág tu bállog de, sakay kinagi na, “Magkahod kam nakwa ti kapayapaan.” 20Tu pákkakagi na ti iye ay impeta na u talingo na hide tu kamát na sakay tu hawes na. Tunay u saya nu disepulus hide nikuna a ketan de u Panginoon. 21Kinagi a huway ni Jesus iye, “Magkahod kam nakwa ti kapayapaan. Ni kodyaák he a pinaangay nu Ama ay konna be hod a suguwan takam.” 22Tu pákkakagi na ti iye ay inangássan na hide sakay kinagi na, “Tanggapán moy u Banal a Ispirito. 23U tolay a magsise tu kasalanan na sakay kagiyán moy a pinatawad dán siya nu Diyos ay talaga napatawad dán siya. Pero u tolay a umád a magsise tu kasalanan na ay kagiyán moy awan siya patawadán nu Diyos, talaga awan siya patawadán.”

24Nadid, ti Tomas a dáddulawán de a kambal a essa tu sapulo ay ti duwwa a disepulus ay awan di nakaguman nikuna a pimmeta nide ti Jesus. 25Kanya imbaheta de nikuna a netan de u Panginoon. Pero timmábbeg siya nide, “Awanák maniwala mentaras a awan ko ketan u talingo nu pako hide tu kamát na, sakay mesáddáp u kamát ko tu talingo na hide tu hawes na.”

26Kállipas nu walo a aldew ay huway a naipun u disepulus hide ni Jesus tu disalad nu bilay. Kaguman di dán hod ti Tomas. Pero maski ni nakakandadu u pintuwan hide ay dimmemát ti Jesus sakay timmaknág tu bállog de, sakay kinagi na, “Magkahod kam ti kapayapaan.” 27Kinagi ni Jesus ni Tomas, “Ilingán mo i kamát kuwáy hide sakay tawiden mo. Isáddáp mo be ikamát muwe ti hawes kuwáy. Diyan ka magalanganin; maniwala ka dán.” 28Kinagi ni Tomas nikuna, “Hiko ngane u Panginoon ko sakay Diyos ko!” 29Kinagi ni Jesus nikuna, “Maniwala ka beman dipo netanák mo? Mapalad u maniwala hide maski ni awanák de netan.”

U Layunin ni Libruwan Iye

30Nadid ay ginimet ni Jesus u makpal a makataka-taka tu atubang nu disepulus na hide. Pero awan hide nesulat ti libruwáy a iye. 31Pero i libruwan iye ay nesulat para maniwala kam a ti Jesus u Cristo a Anak nu Diyos. Ni maniwala kam nikuna, ay magkahod kam ti biyag a awan ti kahád.

اکنون انتخاب شده:

Juan 20: MBJC

های‌لایت

به اشتراک گذاشتن

مقایسه

کپی