Hebreo 4
4
1Sakay nadid, u pananto nu Diyos tungkol tu imangan a inhanda na ay para labe nikitam. Kanya ngani mangilag kam makay tehhod nikam a awan makaguman tu impananto na. 2Dipo konna nide ay nakasaneg kitam be ti Maganda a Baheta. Pero awan de napakinabangan u nasaneg de, dipo awan di iye tinanggap a tehhod a pánnampalataya. 3Hikitam a maniwala u makasáddáp sakay makaimang tu páppágyanan nu Diyos. Tu awan hide maniwala ay kinagi na a,
“Tu iyamut ko ay isumpa ko,
‘a awan hide makasáddáp sakay makaimang tu páppágyanan ko.’”
I maimanganan itod ay inhada nadán sapul a lalangán na i munduway.
4Dipo kinagi na tu essa a bahagi nu Kasulatan a, “Tu kapitto a aldew ay ummimang u Diyos tu páglalang na.” 5Sakay kinagi na pa a huway, “Awan hide makasáddáp sakay makaimang tu páppágyanan ko.” 6Awan nakasáddáp sakay nakaimang tu páppágyanan nu Diyos u dipalongo hide a nakasaneg tu Maganda a Baheta dipo awan hide summampalataya. Pero nadid ay tehhod pade a makasáddáp sakay makaimang tu páppágyanan nu Diyos, 7kanya nángtakda a huway u Diyos ti essa pa a aldew, itod a aldew ay “nadid.” Impakapospos iye nu Diyos tu pamamag-itan ni David kállipas nu nalay a panahun. Kinagi na,
“Ni masaneg moy nadid u boses nu Diyos,
ay diyan moy dán paigáttán u isip moy.”
8Ta dipo ni nakaimang u tolay hide tu pamamag-itan ni Josue tu itod ay awan dán nakwa huway a nagpananto u Diyos ti essa pa a aldew a káimang. 9Kanya ngane tehhod palla a nakahanda a imangan u pinile hide nu Diyos, a konna tu káimang nu Diyos káttapos nu pánglalang na tu kapitto a aldew. 10Ta dipo ni deyaman u makasáddáp a umimang tu páppágyanan nu Diyos, ay umimang be tu tarabaho na a konna tu káimang nu Diyos tu páglalang na. 11Kanya pagsikapan tam a makasáddáp sakay umimang tu páppágyanan nu Diyos. Dipo u sumuway tu Diyos ay awan makasáddáp a konna tu Israelita hide.
12Dipo u upos nu Diyos ay biyag sakay makapangyariyan sakay mas matalas nan u áttak a magdiluputan ti tadám, ladássán na hanggan tu paghiwalayan nu kaliduwwa sakay ispirito, kasukasuwan hanggan tu uták nu tulang. Sakay tukoy na u katoy tu isip sakay plano nu tolay. 13Awan ti metagu tu Diyos, áelingán na a atanan. Sakay tábbegan tam nikuna u atanan a ginimet tam.
Ti Jesus u Pinakadakila a Saserdote
14Kanya magpakatatag kitam tu pánnampalataya tam, dipo tehhod kitam a dakila a Pinakapuno a Saserdote, simmáddáp dán siya ti langet tu atubang nu Diyos. Siya ay ti Jesus a Anak nu Diyos. 15Maintendiyan kitam nu pinuno tam a Saserdote tu kahinaan tam hide. Dipo napurbaan na be a tinokso tu atanan a paraan, konna nikitam, pero maski nikan ay awan siya nagkasala. 16Kanya diyan kitam magduwwa-duwwa a umadene tu trono nu makákkagbiyán a Diyos, tán matanggap tam u kagbi na sakay habag na tu panahun a kailangan tam u tulung.
اکنون انتخاب شده:
Hebreo 4: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.