Hebreo 12
12
Ama Tam u Diyos
1Nadid ta napalebutan kitam ti makpal a tistigu, adággen tamon u kasalanan a alisto a mangtaw-taw nikitam sakay ibutan u ányaman a hadlang a mangpugád nikitam, sakay magtiyaga kitam a magtulos-tulos tu ginanan tam a intakda nu Diyos. 2Ituun tam u pangileng tam ni Jesus a naggábwatan nu pánnampalataya tam sakay nangpatupad ti iye. Dipo tu kasayaan a magáohay nikuna ay awan na ingkasanike a matay tu kudus, sakay siya nadid ay mággetnod tu kawanan nu trono nu Diyos.
3Isipán moy u tiniis hide ni Jesus a hirap a gábwat tu makasalanan hide a tolay, tánni awan kam manghina ti isip. 4Tu pághirap moy kontara tu kasalanan ay awan palla dimmemát tu punto a mabuno kam. 5Makay nalimunan moy dán wád u pagtoldu nu Diyos nikam bilang anak na,
“Anak ko, diyan mo baliawanan u pagdisiplina nu Panginoon,
sakay diyan ka manghina ti isip ni sawayán na ka.
6Dipo disiplinaan nu Panginoon u mahal na hide,
sakay parusaan na u imbilang na a anak.”
7Tiisán moy u atanan a hirap, bilang pángtuwid nu essa a ama, dipo iye u mángpatunay a ibilang kam nu Diyos a anak na hide. Ti deya a anak u awan disiplinaan nu ama na? 8Ni u págdisiplina a gággimitán tu atanan a anak ay awan gimitán nikam, ay awan kam tunay a anak nan mungaw kam la. 9Awan beman dáddisiplinaan kitam nu dáddakál tam hide, kaya igalang tam hide? Kanya lalo kitam a dapat a magpasakup tu disiplina nu Ama tam ti Ispirito, tánni mabiyag kitam. 10Tu alay nu sabadit a panahun ay disiplinaan kitam nu dáddakál tam hide ayun tu tukoy de a maganda. Pero u pagdisiplina nikitam nu Diyos ay palagi a tu ikapiyya tam tán magin banal kitam a konna nikuna. 11Mentaras a disiplinaan kitam ay awan kitam masaya nan masakitan. Pero káttapos ni itod ay magkahod kitam ti kapayapaan a bunga nu matuwid a kákkabiyag.
Babala sakay u Bilin hide
12Kanya ilangkaw moy i kamát moye hide a mágkalupoy sakay begsákkan i guwaláb moye hide a magpágpág. 13Sakay maglakad kam tu matuwid a dilan tánni u agum a magkahina ti pánnampalataya, ay awan mesangdul sakay mapilay nan bumegsak.
14Sikapán moy a makasundu u kapareho moy a tolay sakay magpakabanal kam, dipo awan moy ketan u Panginoon ni awan kam mabiyag ti konna he. 15Pakabantayan moy a awan adággen nu deya man nikam u pagmahal nu Diyos. Dyan kam magmula ti saket ni isip a makapangpadukás tu agum. 16Bantayan moy be a awan ti mangibábbey oni mangilállake tu maskin deya nikam, oni awan pahalagaan u bagay hide a ispiritwal, konna ni Esau a impalit na ti essa a penggan a makan u karapatan na bilang panganay. 17Sakay tukoy moy be a káttapos ay inaged na tu ama na u pagpapala a para tu panganay. Pero awan dán maare dipo awan dan mabagu u ginimet na, maski ánya man u gimitán na a pagsise sakay págsanget.
18Awan kam ummadene a konna tu káadene nu Israelita hide tu buked a Sinai a tehhod a maggehab a apoy, tunay ti diklam sakay te mabegsak a pahás. 19Tehhod hod a tánnog ni trumpeta sakay boses. Nikuna a masaneg de i bosesan itod ay nákkekagbi hide a diyan dán mákpágguhon nide, 20dipo awan de mataggád iye a utus, “Ni deyaman u gumemmak tu buked, maski ni hayup, ay batikalán hanggan a matay.” 21Talaga a makaánteng u netannawan de, kanya pate ti Moises ay nagkagi a, “Magpágpággák ti ánteng!”
22Pero hikam u inadeniyan moy ay u Buked nu Sion sakay tu banuwan nu Diyos a biyag, u makalanget a Jerusalem, a páppágyanan nu awan mabilang a anghel. 23Umadene kam tu masaya a paggipun-ipun nu imbilang nu Diyos a panganay a anak na hide a nakalista ti langet u ngaha-ngahan de. Umadene kam tu Diyos a hukum nu atanan, sakay tu ispirito nu tolay hide a inturing nu Diyos a banal sakay ginimet na dán a ganap. 24Sakay umadene kitam ni Jesus, u tagasuhog tu bigu a kasunduwan. Sakay nákkaguman kamon tu kapatawaden nu kasalanan dipo tu nebuhus a dige ni Cristo. Awan iye kapareho nu kákkebuhus nu dige ni Abel a mangaged ti katarungan.
25Kanya magingat kam, sakay diyan moy adiyan u Diyos a magupos nikitam. Dipo u awan hide nágsaneg tu nagupos hide tu itod ti lutaáy ay awan nakaligtas tu parusa! Nadid, kodya kitam makaligtas ni umád kitam a mágsaneg tu magupos a gábwat ti langet? 26Nikuna a magupos u Diyos tu itod ay nayanág u luta; pero impananto na nadid, “Pumensan ko pa a yanággán, bakán la a lutaáy nan pate be ti langet.” 27U upos a, “Pumensan pa,” ay maliwanag a mángpatukoy a ibutan nu Diyos u bagay hide a mayanág, tán manatile u bagay hide a awan mayanág.
28Kanya magpasalamat kitam tu Diyos, dipo makaguman nakitamon tu kahariyan na a awan mayanág. Sambaan tam u Diyos tu paraan a makasaya nikuna, a tehhod a paggalang sakay ánteng; 29dipo ni magparusa u Diyos tam ay kumán a apoy a makatutod.
اکنون انتخاب شده:
Hebreo 12: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.