Galacia 2
2
Ti Pablo sakay tu Agum a Apostol
1Kállipas nu sapulo ay ti áppat a taon, ay immangayák a huway ti Jerusalem, kaguman ko di Bernabe ay ti Tito.#2:1 Basaán tu Gimet 11:30, 15:2. 2Simmoliyák dipo kinagi nikán nu Diyos a dapaták a angay hod. Nákpágguhunák ti sadiliyan tu puno hide nu mánnampalataya hide, sakay inpakapospos ko nide u Maganda a Baheta a ibábbaheta ko tu Hentil hide. Ginimet ko iye tán masigudu ko a awan masayang u pinagpaguden ko tu nakalipas hanggan tu kasalukuyan. 3Maski ni Griego u kaguman ko a ti Tito ay awan de pinilit a magpature. 4Pero ti itod ay te nagware-ware a manampalataya hide a pimmurba a nángpilit tungkul tu págture. Nákpággagum hide nikame tán sidaán de u kalayaan a natanggap tam ni Cristo Jesus, tánni alipinan kitam a huway nu Kautusan. 5Pero maskin nikan ay awan kame immayun tu gusto de, tán maingatan me u tunay a kahulugan nu Maganda a Baheta para nikam.#2:5 Basaán tu Gimet 15:23-29.
6U punu nu mánnampalataya hide ti Jerusalem ay awan be ti nakagi. Awan ti halaga nikán ni ti deyaman hide, dipo awan ti paboran u Diyos.#2:6 Basaán tu Deuteronomio 10:17. 7Nan tinenggiyák de a piniliyák nu Diyos para mangaral tu Maganda a Baheta tu Hentil hide, konna ni Pedro a pinile be tán mangaral tu Maganda a Baheta tu Judio hide. 8U Diyos a nangatád ti kapangyariyan ni Pedro a mangaral tu Judio hide ay siya labe u nangatád nikán ti kapangyariyan a mangaral tu Hentil hide. 9Kaya nikuna a matukuyan nu pinuno nu mánnampalataya hide, a di Santiago, Pedro sakay ti Juan, a ingkaluub nikán nu Diyos iye a gawain ay tinanggap dikame ay ti Bernabe bilang kapareho de a tagapagtoldu tu Maganda a Baheta. Sakay namágkasunduwan me a magtoldu kame tu Hentil hide sakay hide u magtoldu tu Judio hide. 10Inpákpágguhon dila a diyan me páppabayan u mágkahirap hide. Sakay iye be u gugusto ko a gimitán.
Pinagkagiyan ni Pablo ti Pedro
11Pero nikuna a dimmemát ti Pedro ti Antioquia ay pinagkagiyan ko siya tu atubang nu mánnampalataya hide dipo awan tama u gággimitán na.#2:11 Basaán tu Gimet 11:19-26. 12Ta dipo nikuna a awan palla u sasangan a tolay a inutusan ni Santiago ay kaguman siya a mákkan tu Hentil hide. Pero nikuna a dimmemát hide ay bimmukod siya tu Hentil hide. Ginimet na itod dipo manteng siya a te makagi u kaparehas na hide a Judio, lalu dán u Judio hide a sumássunud palla tu ugale de a págpature. 13Pati be u agum a mánnampalataya hod ay inumaheg ni Pedro, pate ti Bernabe ay nákke-aheg nikuna. 14Nikuna ketan ko a awan dán ayun tu Maganda a Baheta u gággimitán de ay kinagi ko ni Pedro tu atubang de a atanan, “Hiko ay Judio pero kumán ka dán a Hentil dipo kuman ka a kaguman de. Pero nadid ay bakin páppilitán mo u Hentil hide a mabiyag a konna tu kákkabiyag nu Judio hide? Dipo nikuna a awan ka dán kuman a kaguman de, kumán mu labe a kinagi a u kapareho mula a Judio u nebabagay a kuman a kaguman mo.”
Naligtas u Judio hide sakay u Hentil hide dipo tu Pánnampalataya ni Cristo
15Hikame a neenak a Judio, ay iba tu Hentil hide a inturing a makasalanan nu kákkapatkákka me a Judio. 16Pero tukoy me a imbilang dán nu Diyos u tolay a awan ti kasalanan tu pamamag-itan nu pánnampalataya na ni Jesu-Cristo bakán a tu kássunud tu kautusan. Kanya ngane, summampalataya kami be ni Jesu-Cristo tánni meturing kame a matuwid tu pamamag-itan nu pánnampalataya nikuna, bakán a tu kássunud tu kautusan. Dipo awan ni ti deyaman u meturing a matuwid tu pamamag-itan la nu kássunud tu kautusan.#2:16 Basaán tu Awit 143:2, Roma 3:20, 22. 17Pero ni ketan a hikame ay makasalanan pade maski tu págsikap me a meturing nu Diyos a matuwid kame tu pamamag-itan ni Cristo, u gusto beman a kagiyán ni iye ay ti Cristo u dahilan nu pagigin makasalanan me? Bakán! 18Pero ni soliyán ko u págsunud tu kautusan a inadággen ku dán, ay hikán dán u mangpatunay a makasalananák dipo tu kállabag ko ti iye. 19U tatahoden tu pamamag-itan a mismo nu Kautusan ay natukuyan ko a awan dán ti kapangayarihan u Kautusan nikán kaya malayaák dán a mabiyag para tu Diyos. 20Kumánnák a nepako sakay natay tu kudus a kaguman ni Cristo tu kudus. Bakán dán a hikán u mabiyag tu sadile ko nan ti Cristo dán. Mentaras biyagák ay mabiyagák ayun tu pánnampalataya tu Anak nu Diyos a nangmahal nikán sakay náng-alay tu biyag na para nikán.#2:20 Basaán tu Galacia 1:4. 21Ni hikán ay awan ko ituring a awan ti halaga u kagbi nu Diyos. Dipo ni ituring nu Diyos a matuwid u tolay tu pamamag-itan nu kássunud tu Kautusan, ay awan ti kabuluhan u kákkatay ni Cristo!
اکنون انتخاب شده:
Galacia 2: MBJC
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.