Colosas 3
3
1Nadid, dipo nebilang kamon a nabiyag a huway a kaguman ni Cristo, ituun moy u isip moy tu bagay hide a katoy ti langet tu páppágyanan ni Cristo a mággetnod tu kawanan nu Diyos.#3:1 Basaán tu Awit 110:1. 2Ituun moy isip moye tu bagay hide ti langet, bakán a tu bagay hide ti lutaáy 3dipo kumán kamon a natay tu date moy a kákkabiyag, sakay u tatahoden moy a biyag ay katoy tu Diyos, kaguman ni Cristo. 4Ti Cristo u tatahoden a biyag moy, ni mehayag dán siya, ay mehayag kambe a kaguman na sakay mákbahagi kam tu karangalan na.
U Date Sakay u Bigu a Biyag
5Kaya dapat moy dán a ibutan u kagustuwan nu pilas: u pángngibábbey oni pángngilállake, kahalayan, pággisip ti mágkalaswa a bagay, madukás a kagustuwan, sakay u págdámmot a essa a klase ni págsamba tu diyos-diyosan. 6Parusaan nu Diyos u tolay hide a maggimet ti konna he a bagay. 7Tu itod, nikuna paghariyan kam palla nu mágkadukás a kagustuwan nu pilas, ay nabiyag kam be a konna ti iye a kakaguman nu tolay hide a mággagimitán ti konna he.
8Pero nadid, ibutan moy dán iye a atanan, pággiyamut, subra a kákkaiyamut sakay u saket ni isip. Iwasan moy dán u pángsida tu agum a tolay sakay u mágkalaswa a pággupos. 9Diyan kam magbuli-bule tu balang essa, dipo inibutan moy dán be u date moy a pagkatolay pate u date hide a gimet, #3:9 Basaán tu Efeso 4:22. 10sakay impalit moy dán u bigu moy a pagkatolay. Tulos-tulos iye a mabagu sakay magin kahupa nu Diyos a nanglalang nikam, tánni mas lalo moy siya a matenggi.#3:10 Basaán tu Efeso 4:24, Genesis 1:26. 11Kanya awan dán ti pagkakaiba u Griego sakay u Judio, u ture sakay u awan ture, ute nagadalan sakay oni awan ti nagadalan, u alipin sakay tu tolay a malaya. Para ni Cristo, awan ti pagkakaiba u atanan, dipo siya ay para tu atanan.
12Bilang pinile nu Diyos, banal sakay mahal na, dapat makákkágbiyán kam, maganda u ugale, mapagpakumbaba, mabait sakay handa a magtiis. 13Mamágpasensiyaan kam sakay mamágpatawaden ni te saket kam ti isip tu balang essa. Magpatawaden kam konna tu págpatawad nikam nu Panginoon.#3:12-13 Basaán tu Efeso 4:2. 14Sakay higit tu atanan, magmahalan kam dipo iye u mangatád ti tunay a págkakaessa. 15Sakay paghariyán moy tu puso moy u kapayapaan a gábwat ni Cristo, dipo iye u dahilan kaya nadulaw kam nu Diyos para magin bahagi nu essa a bággi. Magpasalamat kam a pirme. 16U upos hide ni Cristo ay iyasák moy tu isip moy. Mamágpaala-alaan kam sakay mamágtolduwan tu balang essa ayun tu karunungan a kaluub nu Diyos. Mágkansiyon kam ti pang-ispirituwal a kansiyon a gábwat tu Diyos a te págpasalamat. 17Sakay ánya man u gimitán moy magin tu pággupos oni tu gimet, ay gimitán moy a atanan tu ngahan nu Panginoon Jesus, sakay magpasalamat kam tu Diyos Ama tu pamamag-itan na.#3:16-17 Basaán tu Efeso 5:19.
Tama a Pamággagum
18Bábbey hide, pasakup kam tu kákkabanga moy, dipo ina u nerarapat a gimitán bilang mannampalataya tu Panginoon.#3:18 Basaán tu Efeso 5:22, 1 Pedro 3:1.
19Lállake hide, mahalán moy u kákkabanga moy, sakay diyan moy hide pasakitan.#3:19 Basaán tu Efeso 5:25, 1 Pedro 3:7.
20Anak hide, sunudán moy sakay igalang u dáddakál moy hide tu atanan a bagay, dipo ina u makasaya tu Panginoon. #3:20 Basaán tu Efeso 6:1.
21Dáddakál hide, dyan moy págngállan ti subra u anak moy hide, bakay ni manghina hide ti isip.#3:21 Basaán tu Efeso 6:4.
22Alipin hide, sunudán moy tu atanan a bagay u amo moy ti lutaáy. Te maketa man oni awan, magtrabaho kam, bakán a para kasayaan kam nu tolay nan dipo tapat kam sakay te ánteng tu Panginoon. 23Ánya man u gimitán moy, ay gimitán moy ti buu a puso a kumán a bakán a tolay i pagserbiyan moyay nan u Panginoon.#3:23 Basaán tu Roma 12:11. 24Tukoy moy labe a te gantimpala kam tu Panginoon; tanggapán moy u inhanda na tu anak na hide. Dipo ti Cristo a Panginoon u págserbiyan moy. 25U makasalanan be hide ay parusaan na ayun tu kasalanan de hide dipo u Diyos ay awan ti kampiyan.#3:22-25 Basaán tu Deuteronomio 10:17, Efeso 6:9.
اکنون انتخاب شده:
Colosas 3: MBJC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Pahanan Agta New Testament © Philippine Bible Society and Wycliffe Bible Translators, Inc., 2017.